Hae Pris Ia Kaeafas

Nomata impoten responsabiliti blong hem, fulap man i no save hem. Oli tokbaot hem naen taem nomo insaed long Niu Testeman. Wok blong hem i blong stap olsem man blong mekem Ol Man Jiu mo Ol Man Rom oli wok gud tugeta. Hem i wan Sadusi, wan man Jiu we i wan memba blong Kaonsel long taem ia blong Kraes we i no biliv long laef bakegen long ded (luk long Ol Wok 23:8).

Kaeafas i toktok long taem blong kaonsel afta we Kraes i mekem Lasaros i girap baekgen long ded, wan merikel we bae i trabolem hem mo Ol Sadusi folem ol bilif blong olgeta.

Kaonsel i gat tingting ia se sapos oli no mekem wan samting blong ansa long merikel ia we plante oli save finis, ol pipol bae oli bilivim se Jisas i Mesaea, King blong O Man Jiu, “nao bambae ol man Rom oli save kam spolem haos blong God blong yumi, wetem ol man blong kantri blong yumi” (Jon 11:48).

“Yufala i no save samting ya nating,” Kaeafas i ansa, “?weswe yufala i no luksave? I moa gud blong wan man i ded blong i sevem olgeta man, i winim we bambae olgeta man oli ded” (Jon 11:49–50).

Aposol Jon i i raetem se Kaeafas i talem se “hem i no talem long tingting blong hem nomo. Hem i hae pris long yia ya, mo hem i stap talemaot tok we God i givim long hem, we bambae Jisas i save ded blong sevem ol laen blong Isrel;

“Mo ded blong hem, i no blong sevem ol laen blong Isrel nomo, be i blong tekem olgeta pikinini blong God we oli stap wanwan olbaot long wol oli kam joen long wan kampani nomo” (Jon 11:51–52).

Nem blong Kaeafas i kamaot bakegen insaed long NiuTesteman taem oli kwestinem Kraes bifo oli Nilim Hem Antap long Kros.

“Nao hae pris i talem long hem se, “Hae God i laef, i stap we i stap, mo long nem blong hem, yu yu mas talem trutok. !Yu talem long mifala! ?Yu yu Mesaea, yu Pikinini blong God, no nogat?” (Matiu 26:63).

Jisas i talem long hem se: “Yu nao yu talem olsem. Be mi mi talem long yufala, se biaen long taem ya, bambae yufala i save luk mi, mi Pikinini blong Man, mi sidaon long raet saed blong God we i gat olgeta paoa. Mo bambae yufala i luk we mi mi sidaon long ol klaod, mi aot long heven, mi kamdaon” (Matiu 26:64). Blong ansa long hemia, Kaeafas i tanem baksaed bakegen long Sevya. “Nao hae pris ya i kros tumas, i terem klos blong hem, i talem se, “!Hem i tok nogud long God ya!” (Matiu 26:65).

Nomata we Sevya i stap long wol ia, wan ia we oli bin profesae se bae Hem i ded from sin blong evri man mo safa evri kaen soa blong bodi, harem nogud mo ol hadtaem, Kaeafas i no luksave se Jisas ia nao i Kraes, mo hem i panisim Hem.

Nem blong Kaeafas oli talem bakegen insaed long Baebol long Ol Wok 4. Rekod i talemaot olsem wanem Aposol Pita i hilim wan man we i no save wokbaot taem i bon i kam long wol ia (luk long Ol Wok 3:1–8). Afta, taem we hem mo Jon i stap prij abaot Laef Bakegen long ded blong Kraes, oli bin arestem olgeta anda long atoriti blong Sanhedrin. Oli putum olgeta long kalabus wan naet mo tekem olgeta i kam long fored blong kaonsel we i gat Kaeafas mo papa blong waef blong hem, Anas, foma hae pris. (Luk long Ol Wok 4:1–6; luk tu long Jon 18:13.)

Taem oli askem se long wanem atoriti nao oli hilim man ia, Pita i ansa se: “Oraet, yufala evriwan i mas save samting ya. Mo olgeta laen blong Isrel tu oli mas save. Man ya i stap stanap long fes blong yufala, we leg blong hem i gud finis, long paoa blong nem blong Jisas Kraes, man Nasaret. Hemia Jisas ya we yufala i nilim hem long kros, nao hem i ded, be God i mekem hem i laef bakegen” (Ol Wok 4:10).

Hemia i bin las janis we oli raetemdaon we Kaeafas i mas akseptem Kraes. Be i no olsem, kaonsel i talem ol strong toktok long Pita mo Jon. Be ol strong toktok blong olgeta i no jenisim trutok se Kraes i laef. (Luk long Ol Wok 4:13–22.)

Tru long paoa mo atoriti blong Kraes, Pita i hilim man ia we i no save wokbaot. Semmak olsem, tedei, ol merikel i save hapen tru prishud we Kraes i bin putumbak mo tru fet long nem blong Hem. Lesen we yumi save lanem long Kaeafas i simpol. Hem i no akseptem Jisas olsem Kraes, Pikinini Ia blong God, be yumi, yumi save mekem. Taem yumi biliv long Hem, ol saen, ol sapraes mo ol merikel bae oli kam (luk long Mak 16:17–18).