Stap Mekem Wok blong Hem

Pikja i kam long Briana Kranz

Wan laef eksperiens we i gulap long ol filing we i had blong stap strong from wan samting we i mekem wan i harem nogud tumas, wan ded blong wan we yumi lavem we yumi no ting se bae i olsem, mi ting se nambatu eksperiens we i moa had tumas, maet bae i hapen taem we fas man we bae i ansa i lukluk long ae blong wan mama mo papa mo talem long tufala se pikinini blong tufala i ded.

Wan moning oli bin sendem mi blong go talemaot long wan famli se lasbon gel blong olgeta i bin ded taem hem i stap draev i go hom afta long kolej. Hem i bin silip long stia mo ded stret taem we trak blong hem i ron i kamaot long rod afta i bang mo brokbrok. Hemia i long Ista moning.

Mi fraet mo harem nogud tumas from bigfala harem nogud ia we bae mi mekem long famli ia. Long wan wei we i no nomol, mi filim olsem se blong kamaot long famli ia wetem nius ia, long sam wei, mi mi responsibol.

Mi prestem bel blong doa, mo wan man i kam. Ae blong mitufala i mit tru long windo long doa. Hem i sek, mo fes blong hem i soem sapraes. Hem i save se mi stap ia blong eksplenem weaples pikinini gel blong hem i stap long hem. Kwiktaem spirit i toktok kwaet long mi:

“Jason, yu no tingting long yuwan. Yu stap mekem wok blong mi mo yu gat raet long paoa blong mi. Yusum paoa ia. Trastem paoa ia. Tabu Spirit bae i lidim yu blong tekem andastaning mo wei blong stretem i kam long olgeta we oli harem nogud mo konfius.”

Man ia we i openem doa i gat wan strong han. Tras we i kam long spirit i tekem ples blong filing ia blong fraet, taem mi introdiusum miwan mo askem blong go insaed. Nomata se Spirit i givim moa paoa long mi, hat blong mi soa bigwan from hem. Mi wantem blong serem harem nogud ia wetem hem, harem nogud wetem hem mo krae wetem hem (luk long Mosaea 18:8–9), mo mi filim se sapos mi mekem olsem maet bae i mekem safaring blong hem i godaon.

Mitufala i wokbaot i godaon folem wan smol rod bitwin ol rum we i go kasem wan rum we waef blong hem mo ol pikinini oli kam tugeta long hem. Tru long sapot we Tabu Spirit i givim long mi, mi filim hop mo maen i klia. Mi ansarem ol kwestin blong olgeta mo afta, mi serem testemoni blong mi se from se tru long Jisas Kraes, sakrifaes mo Laef Bakegen long Ded blong Hem, bae tufala i pikinini gel blong tufala bakegen.

Tru long eksperiens ia, fet blong mi long Lod i stat blong jenis i kam long tras. Mi hop se i semmak long olgeta tu.

Elda Paul B. Pieper blong Olgeta Seventi i tin tijim se, “Samtaem bes wei blong lanem blong trastem God i simpol olsem blong trastem Hem nomo.”

Blong stap trastem Lod i bin helpem mi blong gat paoa blong helpem ol narawan. Mo tu hemia i mekem testemoni blong mi kam moa strong mo mekem gud rod blong plante janis blong givim seves long ol narawan long bihaf blong Hem.