Harem Nogud blong Mi Bae I Tanem i Kam Glad

Pikja i kam long Briana Kranz

Taem mi bin gat 18 yia, bubuman blong mi long saed blong mama blong mi i ded. Long taem ia blong laef blong mi, mi no bin lusum eniwan we i kolosap long mi. Mi save se wan dei bae i hapen, be mi no ting se bae i hapen kwiktaem.

Bubuman blong mi i gat gudfala helt, be i no gat wan woning, mo hem i safa long wan strok. Kwiktaem bubuwoman blong mi i tekem hem i go long hospital, be afta long fo dei, hem i ded.

Blong lusum wan kwiktaem olsem blong fas taem, i soa bigwan. I no nomol se bubuman blong mi i save kam atendem evri impoten samting we i stap hapen long laef blong mi mo afta, hem i lus.

Afta long fenerol, mi faenem wan wei blong givim ona long memori blong bubuman blong mi mo taem we mitufala i bin gat tugeta. Hem i laekem tumas blong wok long trak blong hem mo mekem ol nara projek. I tru, taem we hem i safa long strok blong hem, hem i stap long karaj blong hem mo i holem wan tul blong slakem o taetem samting long strong han blong hem mo stap wok olsem oltaem.

Mi jusum se bae mi wok long ol trak tu. Blong stap mekem olsem i helpem mi blong filim kolosap long hem. Mo tu, mi tanem mi i go long prea mo ol skripja, long ples we mi faenem pis blong muv i go fored wetem fet mo hop long taem we hem i no stap.

“I gat wan laef bakegen afta long ded,” profet Abinadae i rimaenem mi se, “be i gat wan laef bakegen long ded, from hemia nao gref i no win, mo harem nogud blong ded i lus long Kraes” (Mosaea 16:8).

Ded blong bubuman blong mi i bin helpem mi blong kasem wan lukluk we i mekem Atonmen blong Jisas Kraes i gat moa mining long laef blong mi. Semmak olsem we mi givim ona long bubuman blong mi taem mi stap wok wetem ol trak, mi luksave se yumi givim ona long Jisas Kraes—mo save filim kolosap long Hem—taem yumi traehad blong laef olsem we Hem i stap laef, stadi ol toktok blong Hem, stap serem gospel blong Hem mo stap mekem “ol wok blong Papa [blong Hem]” (Jon 10:37). Blong stap mekem olsem ia, i givim moa mining abaot Atonmen blong Sevya mo i mekem tras blong yumi long Hem i kam antap.

“Taem yumi stap krae long taem blong harem nogud o long taem blong glad, Jisas Kraes i andastanem yumi stret evriwan,” Elda Gerrit W. Gong blong Kworom blong Olgeta Twelef Aposol i bin tijim. “Hem i save stap long ol taem we yumi nidim bigwan ol bigfala presen blong God we i no save finis: Atonmen blong Jisas Kraes, Resureksen mo Restoresen.”

Jisas Kraes i bin tanem harem nogud blong mi i kam glad. From se tru long Hem mo Atonmen blong Hem, mi save se bae mi luk bubuman blong mi bakegen.