Liahona
20 Aedia blong Ista Sisen blong Yu
Maj 2026 Liahona

“20 Aedia blong Ista Sisen blong Yu,” Liahona, Maj 2026.

20 Aedia blong Ista Sisen blong Yu

I Kam long Kimmy Badal

Ol Magasin blong Jos

Stat long olgeta we yumi save gud i go long niu wan, i gat plante wei blong krietem ol kastom we Kraes i stap long medel.

ol defdefren aetem we i go wetem Ista

Ol pikja i kam long Christina McMaster

Long taem blong toktok blong hem long Epril 2023 jeneral konfrens, Elda Gary E. Stevenson blong Kworom blong Olgeta Twelef Aposol i askem se, “?Long wanem wei nao yumi save soem tru long tijing mo fasin blong selebretem Laef Bakegen long Ded, blong Jisas Kraes, stori blong Ista wetem semmak fasin, we i fulwan, mo ol tradisen we oli rij olsem taem ia we Jisas Kraes i bon i kam long wol, mo Krismes stori?”

Ol memba raon long wol oli stap lukluk nomo naoia long Ista sisen. Hemia sam long ol simpol mo ol gudfala aktiviti blong mekem Ista i kam moa gud mo i kam moa bigwan—mo wosip blong Sevya—blong wanwan long yumi, ol grup mo ol kongrekesen.

Ol Aedia blong wanwan man mo woman mo Famli

  1. Krietem wan pepa jen mo putum ol skripja o ol kwot we oli tokbaot Kraes mo ridim wan evri moning long manis we i lid i go long Ista.

  2. Ol samting we yumi yusum oli save stap olsem ol simpol blong ol samting we oli stap hapen insaed long ol skripja. Eksampol, sam pipol oli mekem ol naesfala kait oli flae blong tingbaot Kraes we i stap girap long tumb. Lukaotem ol samting we oli save rimaenem yu abaot Sevya long taem blong holidei sisen ia.

  3. Blong stap mekem ol Ista kad i wan gudfala wei blong serem laet blong Jisas. Tingting blong stap givimaot ol kad we yu mekem ia long ol fren mo ol neiba we yu givhan long olgeta.

  4. Ol man we oli folem Jisas, oli yusum ol spaes blong givim ona long Hem long taem we oli berem Hem (luk long Jon 19:39–40). Blong yusum ol spaes long ol kaekae we yu mekem blong Ista, oli save lidim ol tingting blong yu i go long tabu taem ia.

  5. Taem Kraes i stap long wol ia, Hem i givim seves long ol narawan, mo yumi save tingbaot Hem long Ista ia taem yumi stap mekem semmak. Askem wanwan memba blong famli blong jusum wan nem mo spenem Tabu Wik ia blong stap givim seves long man o woman ia.

  6. Sam pipol oli yusum ol branj mo oel blong oliv blong stap olsem wan rimaenda blong pis mo atonmen mo sakrifaes blong Kraes. Ol memba blong Jos oli save tingting blong putum ol samting ia long ol dekoresen o ol kaekae we i tekem tingting i gobak long pis we Sevya i stap givim.

  7. Ol stret mesej blong Ista oli moa tabu, mo blong stap tekem taem long taem blong Tabu Wik blong gat wan kwaet taem blong stadi mo lukluk i gobak, i wan wei blong tingbaot ol pat ia.

  8. Ista i wan selebresen blong gat fasin blong talem tangkyu long evri samting we Kraes i bin mekem blong yumi. Faenem taem truaot long sisen ia blong fulumap wan wol o wan posta wetem ol wei we yu wantem talem tangkyu long Sevya.

  9. Long sam pat blong wol, Ista oli selebretem long wan taem blong niu laef [niu bon bebi, niu bon animol, niu kaekae i gro], blong mekem se, sisen ia hemwan i hapen blong soem wan rimaenda blong Laef Bakegen blong Kraes. Lukaotem spes blong wokbaot tru long neija mo glad long simpol ia.

  10. Mit blong sipsip i wan tradisen kaekae we i simpol blong Jisas Kraes olsem Smol Sipsip blong God, we i mekem Pasova i hapen mo soemaot se yumi kam fri tru long sakrifaes blong Hem (luk long Eksodas 12; Jon 1:29). Blong stap serem mit blong sipsip blong oli kakae i wan wei blong ol famli oli save tingbaot rol blong Sevya we i mekem yumi fri aot long sin tru long Atonmen blong Hem.

kamera, ol not blong miusik mo ol nara samting

Ol Aedia blong Wod mo Stek

  1. Blong stap livim kaekae mo prea, oli ol aksen blong stap konek wetem Kraes. Tingting blong putum wan taem blong wod i livim kaekae long taem blong Tabu Wik, from wan spesel samting blong hapen long lokol komuniti.

  2. Long taem blong Krismes, ol pipol oli laekem blong stap aktem bakegen vidio blong taem we Kraes i bon i kam long wol ia. Blong soem se yumi gat respek, yumi no stap aktem bakegen samting we i hapen long Ista, be ol wod oli save gat ol divosen we i haelaetem ol tijing blong Sevya long taem blong Tabu Wik mo tokbaot mining blong ol pat ia.

  3. From se Laef Bakegen long Ded blong Kraes, Ista hem i wan taem blong riniu. Stap oganaesem wan grup blong klinim hom o yad blong wan narawan, maet hem i save help blong rimaendem stamba toktok ia.

  4. Long sam eria blong wol, oli stap laetem ol bon faea long taem blong Ista blong stap olsem wan simpol blong laet we i winim tudak. Blong laetem wan faea o kandel i save ripresentem Sevya olsem Laet blong Wol we i bin winim ded mo sin.

  5. Olsem pat blong wan lesen, serem ol toktok blong ol Ista hym. Tokbaot doktrin mo testemoni insaed long wanwan ves.

  6. Invaetem ol memba blong soem ol art wok o ol foto we i pulumbak tingting i go long ol stamba toktok blong Ista.

  7. Jisas i gat plante nem mo ol taetol, mo wanwan long olgeta i talemaot wan samting we i defren abaot fasin blong Hem. Blong stap tugeta olsem wan wod blong mekem art so abaot olgeta, i wan gudfala wei blong lukluk nomo long ol defdefren pat blong Kraes blong Ista.

  8. Tingting blong stap krietem wan tradisen blong stap wosip tru miusik, stap yusum skripja mo singsing blong stap tingting hevi long sakrifaes mo lav blong Sevya. Wan wod o stek i save kam tugeta blong lanem mo singsing ol hym blong Ista mo serem ol skripja we oli tokbaot Ista.

  9. Tru long Jisas Kraes, ol famli oli save stap blong taem we i no save finis. Blong stap mekem plan blong wan famli histri aktiviti o tempol trip i save rimaenem ol memba abaot prinsipol ia long taem blong Ista.

  10. Blong stap dro wetem jok i wan aktiviti blong gat gudtaem we eni wan wetem defdefren yia i save mekem, mo wan Ista jok art blong ol defren jos oli kam tugeta, i save kam wan wei blong serem mo kasem ol testemoni abaot Kraes.