Ol Nius We I Givim Glad

Pikja i kam long Briana Kranz

Olsem ol neba, Maritza mo mi i bin mit taem we mitufala i yangfala. Nomata se hem yia blong hem i bigwan smol bitim mi, mitufala i kam ol gudfala fren mo mitufala i wok kolosap oltaem.

Taem we mi bin gat 19 yia mo speseli mi gat nid blong kasem daereksen, hem i introdiusum mi long gospel blong Jisas Kraes we i bin kambak tru long ol fultaem misinari. Mi save smol finis abaot Jos Ia blong Jisas Kraes blong Ol Lata-dei Sent tru long angkel mo bubuwoman blong mi. Tufala i bin ol paeonia memba blong Jos insaed long famli blong mi.

Maritza i bin stap wetem mi truaot long taem we mi bin jenisim laef blong mi, i helpem mi blong developem wan testemoni abaot Sevya mo gospel blong Hem mo i bin helpem mi evri taem we mi nidim hem.

Mi lanem long hem, glad ia blong stap laef folem gospel wetem simpol laef mo strong paoa long tingting. Mi laekem wei we hem i sosol wetem ol narawan, wei blong mekem famli mo ol fren i kam wan, mo strong paoa long tingting blong stap wok from ol gol blong hem long saed blong ol samting long wol ia mo long saed blong spirit. Mi lanem tru long hem se taem we yumi kasem trutok, yumi mas putum wanem we yumi lanem long praktis, stap obei ol komanmen mo stap yusum ol tijing blong gospel long laef blong yumi mo ol famli. Blong stap gohed fetful, yumi mas gat strong paoa long testemoni blong yumi mo traehad blong holem strong fet blong yumi, nomata long ol hadtaem.

Long 2010, Maritza i ded long wan trak aksiden. Hem i bin wan nogud taem blong mi, be mi save se tru long plan ia blong sevem man mo Atonmen blong Jisas Kraes, bae mi luk hem bakegen. Mi save se hem i gohed long ples we hem i stap long hem naoia wetem semmak fasin blong hem ia blong stap glad mo mekem ol samting we i soemaot fasin blong hem long ples ia long wol.

Mi save se “laef ia i kam wan ples blong tes” (Alma 12:24) i no gat evri samting long ples ia. Mi save se bae yumi luk famli mo ol fren blong yumi bakegen long narasaed blong vel. Bae yumi luk olgeta, talem halo long olgeta mo stap tugeta bakegen. Bae yumi eksperiensem semmak filing blong lav we yumi gat long wanwan long yumi long wol ia (luk long Doktrin mo Ol Kavenan 130:2). Ol memba blong famli blong mi oli stap long ples ia. Mi save Maritza i stap long ples ia tu.

Maritza i glad mo toktok wetem evriwan abaot gospel long ples ia long wol. Mi sua se hem i stap mekem semmak samting long spirit wol (luk long Doktrin mo Ol Kavenan 138:57). Hem i stap tij abaot Atonmen blong Sevya we i no gat en mo gud nius ia se tru long Hem mo tru long ol odinens blong tempol, yumi save gobak long ples blong Hem mo Papa, blong laef olsem ol famli blong taem we i no save finis.