“Tufala Disaepol long Rod i go long Emeas: Wan Wokbaot blong Fasin blong Kasem Revelesen mo blong Luksave Man,” Liahona, Maj 2026.
Oli Bin Save Sevya
Tufala Disaepol long Rod i go long Emeas: Wan Wokbaot blong Fasin blong Kasem Revelesen mo blong Luksave Man
Semmak long wanem we ol disaepol ia oli bin eksperiensem, hat blong yumi oli save harem gud abaot Atonmen mo Laef Bakegen blong Sevya.
Pikja i kam long Laura Serra, oli no save mekem kopi
Long Sandei, aftenun blong Resureksen, tu disaepol tufala i stap wokbaot blong 13 kilomita long Jerusalem i go long Emeas. Hem i bin wan dei we i gat filing—wan filing blong sore blong sam dei.
Hat blong olgeta i bin hevi. Maen blong olgeta i miks wetem plante tingting mo harem nogud. Oli tokbaot Jisas blong Nasaret—ded blong Hem, toktok i stap go raon se bae Hem i girap long ded, mo tingting we i fasfas abaot wanem we evri samting ia, i stap minim.
Taem oli stap wokbaot, wan strenja i kam sloslo mo joen long storian blong tufala. Hem i Jisas, nomata se oli no luksave Hem. Ol ae blong olgeta i blok mo klaod i kavremap andastaning blong olgeta. Strenja i askem, “?Tufala. ?Wanem samting ya we yutufala i stap storian long hem i kam,? Wantaem nomo, tufala i stanap we fes blong tufala i nogud” (Luk 24:17).
Wan long ol disaepol, Kleopas, i ansa mo no bilivim se i gat eniwan we i nosave, mo i no luksave wanem samting we i stap hapen we i bin seksekem Jerusalem long wiken ia. “?Ating yu nomo yu wan strenja long Jerusalem, we yu no save ol samting ya we i hapen long ol dei ya we i jes pas?”
“?Wanem ol samting?” Jisas i askem.
Ansa blong olgeta i kam long hat blong olgeta mo i kam kwik se: “Ol samting ya we i hapen long man Nasaret ya, Jisas. Hem i wan profet, mo long fes blong God, mo long fes blong ol man, ol wok blong hem mo ol toktok blong hem oli gud tumas” (Luk 24:18–19). Oli talem se oli bin trastem Jisas ia se bae Hem i sevem Isrel, be hem i namba tri dei nao we Hem i ded. Mo nomata se sam woman oli ripotem se ol enjel we oli visit mo stap talemaot se Hem i laef, be Ol Aposol we oli bin go blong faenemaot, oli no bin luk Hem.
Afta, Jisas i toktok—i no olsem wan strenja be olsem wan tija. “Man. Yutufala i no gat hed nating. Yutufala i tektaem tumas blong bilif long ol tok blong ol profet” (Luk 24:25). Hem i eksplenem ol skripja long olgeta, stat long Moses i go kasem evri profet, we oli stap talemaot ol samting long saed blong Hemwan. Pikjarem long maen se yu stap wokbaot blong plante aoa wetem Pikinini blong God, Lod blong laef, mo stap harem Hem i stap profesae abaot ol wok blong Mesaea. Harem nogud blong tufala i stat blong kamaot mo filing blong sapraes i fulumap tufala.
Stap wetem Mitufala
Taem oli kam kolosap long Emeas, Jisas i mekem olsem we bambae Hem i lego olgeta, i wokbaot i go. Be oli wantem Hem blong stap mo askem Hem se, “Ei, i gud yu stap wetem mitufala fastaem. Naoia i let finis ya. Bae i no longtaem san i godaon” (Luk 24:29). Hem i stap wetem olgeta, i sidaon mo i brekem bred.
Folem nekis samting we i hapen, Elda James E. Talmage (1862–1933) blong Kworom blong Olgeta Twelev Aposol i bin raetem se: “Maet i gat wan samting long naesfala filing ia we i kam long blesing ia o fasin ia blong stap brekem mo pasem bred, we i tekem i kambak ol memori blong ol dei bifo; o we i save posibol se ae blong olgeta i luk mak blong nil long han blong Hem; be nomata wanem i hapen, oli lukluk wetem tru hat i go long Strenja [Jisas] ia, ‘Nao ae blong tufala i open, mo tufala i luksave hem, se Jisas. Be hem i lus long fes blong tufala, tufala i no moa luk hem’ [Luk 24:31].”
Afta long taem ia tufala i tanem tufala mo talem long tufala wanwan se, “?Man taem hem i stap toktok long yumitu long rod, i stap talemaot ol tok ia blong Baebol, tok blong hem i nambawan, i mekem yumi harem gud tumas?” (Luk 24:32). Filing ia we i stap bonem insaed blong tufala ia i no filing blong konfius o fraet—hem i filing ia blong luksave wan man. “Ol filing ia we oli tokbaot ia oli paoa ia we i givim witnes abaot tabu Pikinini blong God,” Elda Bruce R. McConkie (1915–85) blong Kworom blong Olgeta Twelef Aposol i bin tijim.
Rod blong Yumiwan i go long Emeas
“?Wanem bae Hem i talem long yu sapos yu save wokbaot mo toktok wetem Hem?” Elda Patricio M. Giuffra blong Olgeta Seventi i askem.
Hem i talem se, semmak long ol disaepol, maet yumi save mestem blong luksave se Sevya i stap wokbaot wetem yumi. “Bae yumi no save luk olsem wanem Hem i stap wetem yumi, i traehad wetem yumi, i stap wok wetem yumi, mo stap krae wetem yumi.” Ol samting we oli pulum tingting blong yumi—nomata ol hadtaem o ol sakses—oli save haedem filing ia se Hem i stap ia.
Wanwan long yumi i stap wokbaot long rod blong hemwan i go long Emeas. Folem rod ia, yumi fesem sik, wiknes, ol wari long saed blong faenens o iven hae tingting we i save kam from sakses. Be yet, yumi neva wokbaot yumiwan, Elda Giuffra i talem. “Yumi save askem Sevya blong stap wetem yumi.”
Taem yumi lanem abaot Kraes, obei ol komanmen blong Hem, prea, stadi ol skripja, folem ol profet we oli stap laef, mo invaetem Hem blong stap wetem yumi, bae yumi stat blong luksave paoa blong Hem. Rikwes blong tufala disaepol—“Stap wetem mitufala”—i mas blong yumiwan, Elda Giuffra i talem. Mo taem i hapen olsem, ol hat blong yumi tu bae oli gat filing ia we i stap bonem yumi insaed.