Luk, Mi Hemia

Lod i promesem wan bigfala famli laen long Ebraham mo Sera. Blesing ia i tekem plante taem blong i kam o i hapen folem taem blong Lod. Be, Lod i testem fet blong Ebraham taem Hem i askem hem blong sakrifaesem pikinini boe blong hem, Aesak, we hem i blesing ia we tufala i bin prea mo bin wet from blong wan longfala taem. Maet yumi bin ridim skripja stori ia plante taem, be ?hamas taem nao yumi bin putum yumiwan insaed long ol situesen olsem blong Ebraham?

Hem i had tumas blong iven pikjarem long maen wan sofsof hat blong wan papa long wan asaenmen olsem. Be, strong filing blong Ebraham we i mekem hem i jusum blong obei i neva stop blong mekem mi sapraes taem hem i stap rere blong go long wan hil long Moraea mo givim i go antap sakrifaes we Lod i askem hem blong mekem. Long aksen blong hem blong soem tingting blong hem blong wantem mo akseptem tingting blong Papa long Heven, oltaem ansa blong hem i stap semmak , “Luk, mi hemia.” (Luk long Jenesis 22:1–2.)

From we hem i gat fasin blong stap obei, hem i kasem blesing blong gat proteksen long laef blong Aesak, mo tu, wetem ol naesfala blesing we i no gat en blong hemwan, blong Sera mo blong famli laen blong tufala (luk long Jenesis 22:15–18).

Fasin blong Sevya blong Akseptem Mo Mekem

I tru se bigfala eksampol blong stap obei mo blong akseptem tingting blong Papa long Heven, Sevya, Jisas Kraes i stamba long hem. Hem i soem tingting blong Hem blong wantem obei taem Hem i kam long wol ia; taem Hem i kasem baptaes; mo taem Hem i givim laef blong Hem olsem wan ofring blong stap tekem long Hemwan ol soa bodi, ol harem nogud, ol samting blong olgeta we oli no strong, ol sin mo ded blong ol pipol blong Hem, mekem se maet Hem bae i save olsem wanem blong givhan long yumi long bodi blong mit mo bun (luk long Alma 7:11–13).

From se eksperiens ia i bigwan tumas mekem se, blong wan sot taem, hemia i mekem Hem i askem sapos i gat eni wei blong karemaot ol samting ya we i stap mekem Hem i harem nogud. Mo afta, kwiktaem Hem i talem se, “Be yu no mekem olsem we mi mi wantem, yu mekem olsem we yu nomo yu wantem” (Luke 22:42)—long nara toktok, “Luk, Mi hemia”—we i soem tingting blong Hem blong wantem blong mekem tingting blong Papa.

?Olsem wanem nao yumi save developem tingting ia blong wantem blong talem “Luk, Mi hemia” olsem wan ansa long evri rikwes we Papa long Heven i askem long yumi olsem ol memba blong Jos, o samtaem long yumi wanwan?

Pol i tijim Ol Man Rom se, “Man we i lavem ol man, hem i mekem olgeta samting we Loa blong God i talem” (Rom 13:10). Sapos mi wantem blong faenem wan toktok we i kolosap semmak long toktok ia “mekem olgeta samting we Loa blong God i talem,” Mi ting se toktok ia bae i fasin blong stap obei bae i kam kwiktaem long maen blong mi. From hemia, yumi save talem se lav hem i fasin blong stap obei. Mo from hemia, toktok ia blong Sevya we i talem se “Sipos yufala i lavem mi, bambae yufala i save obei long ol tok blong mi” (Jon 14:15) i gat bigfala mining.

Maet bae yumi ansa wetem wan “Luk, mi hemia” o, o long ol toktok blong Nifae, “Bae mi go mo mekem” (1 Nifae 3:7). Long lanwis blong yumi long taem blong yumi tedei, maet yumi save talem se, “Yes, mi wantem mekem wanem we Papa long Heven i askem mi blong mekem, nomata wanem bae mi fesem.”

Wanem we mi wantem blong tokbaot bigwan hem i rilesensip ia bitwin lav mo fasin blong stap obei, we i minim se yumi obei long Papa from se yumi lavem Hem. Mi biliv se blong stap jusum blong obei i wan long ol bes wei blong talemaot klia lav blong yumi long Hem. “Man we i bilif be i no mekem gudfala wok, bilif blong hem tu i ded” (Jemes 2:26), mo long miwan, mi luk se i no stret blong talem se yumi lavem Papa long Heven mo Jisas Kraes sapos yumi no obei long Tufala.

?Olsem wanem yumi mekem lav blong yumi long Hem mo fasin blong yumi blong stap obei long Hem i kam antap? Sevya i bin talem se, “Mo laef ya, hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam” (Jon 17:3). Blong save Jisas Kraes—mo tru long Hem, Papa—i mekem yumi save abaot lav we Tufala i gat long yumi mo tu ol naesfala samting we Tufala i bin mekem mo bae hemia we bae Tufala i givim yet long yumi, we i tekem tu, ol hadtaem we yumi stap fesem long laef ia blong wol. Blong save abaot Tufala i save jenisim hat blong yumi, mo mekem yumi wantem blong folem ol eksampol blong Tufala tru ol aksen blong yumi mo tingting blong wantem tekem aksen ia mo talem se, “Luk, mi hemia.” Tingting ia blong wantem blong mekem samting, yumi soem taem yumi wantem blong ridim ol skripja o blong stap toktok wetem Papa long Heven tru long prea.

“Luk, mi hemia” i save wan ansa long singaot ia blong givim seves long wan misin o blong kam moa tabu taem yumi stap obei ol komanmen olsem blong stap kipim Sabat i tabu, stap givim ona long papa mo mama blong yumi o blong stap traehad blong stap laef long klin fasin. “Luk, mi hemia” i oltaem soem fasin blong ol disaepol blong Kraes , iven sapos sakrifaes ia i afektem wanem we yumi wantem tumas o wanem we yumi bin pem praes from.

Tingting ia blong wantem obei i gat bigfala valiu, speseli taem yumi respektem ol kavenan we yumi bin mekem taem yumi kasem baptaes o go insaed long tempol. ?Yu save pikjarem long maen wanem bae i hapen long laef blong yumi sapos oltaem yumi tingting, “Luk, mi hemia” taem yumi stap tekem long yumiwan nem blong Kraes o blong save tingbaot Hem oltaem mo obei ol komanmen blong Hem? Blong stap tekpat long sakramen i invaetem yumi blong riniu komitmen ia, we yumi mas soemaot tru ol aksen blong yumi truaot long wik. Hemia i semmak long taem we yumi go long tempol, taem yumi mekem o tingbaot ol kavenan we yumi mekem long ples ia.

Mi tingbaot wan storian we mi bin gat wetem wan kapol we tufala i jes mared plante yia i pas taem mi stap givim seves olsem wan bisop. Wan naet, tufala i gat wan longfala mo bigfala rao long saed blong taeting. Yangfala hasban ia i bin go tru wan wik we i had tumas long wok mo wantem blong sevem mane we hem i bin kasem, blong pem sam samting blong tufalawan. Be mi tingbaot ol toktok blong yangfala waef ia, we long fored blong hasban blong hem, i talem se, “Bisop, mi wantem blong no pem ol samting ia mo iven blong no kakae, sapos i nid blong mekem, be mi wantem blong pem taeting mo obei long Lod.”

Toktok ia i laod mo klia se “Luk, mi hemia,” we i kamaot wetem wan kaen strong testemoni olsem tru long yangfala waef ia, we i mekem se mi mo hasban blong hem i bin filim wan strong spirit long taem blong storian ia. Long en, mi no save sapos hemia i wanem hem i wantem o from se waef blong hem i jenisim tingting blong hem, be long en, hasban ia pem taeting blong hem long wiken ia.

Long fas Sandei bifo long taem blong ol miting, hasban ia i askem blong gat wan kwik storian wetem mi. Wetem wan fes we i defren long las wik, hem i talem long mi, “Bisop yu save se long las wik mi jes pem taeting blong mi, mo mi bin fraet se bae mi no gat inaf mane blong pem kaekae, be mi wantem blong yu save nomo se long wik ia, mitufala i gat dabol long amaon blong mane we mitufala i stap yusum blong pem kaekae. Bisop, hem i wan merikel mo mi wantem blong luk ol merikel ia oltaem long laef blong mi.” Long mi, i olsem se yang man ia i stap long mi se, “Bisop mi mi wantem blong ansa wetem wan ‘Luk, mi hemia’ long wanem samting we God bae i askem long mi.”

Lod i talem se, Hem i mas mekem folem promes blong Hem taem yumi mekem wanem Hem talem (luk long Doktrin mo Ol Kavenan 82:10). ?Yumi biliv long strong kondisen blong promes ia?

Maet ol blesing bae oli no kam folem taem blong yumi o long wei we yumi wantem, be mi testifae long yu se promes ia i stap mo i tru. I nidim blong gat lav long Hem, akseptem mo gat tingting blong hat blong wantem mekem tingting blong Hem mo stap laef olsem ol disaepol blong Kraes. Hem bae i helpem yumi mo blesem yumi blong andastanem mo kipim ol kavenan blong yumi. Long wei nao taem Hem i askem yumi blong mekem tingting blong Hem, letem yumi ansa wetem laod voes se “!Luk, mi hemia, Lod!”