“?Wan Sevya we I Stret Gud Evriwan I Save Andastanem Wanem I Minim blong Stap Traehad?,” Liahona, Maj 2026.
I kam long YA Evri Wik
?Wan Sevya we I Stret Gud Evriwan I Save Andastanem Wanem I Minim blong Stap Traehad?
From se Jisas Kraes i stret evriwan, samtaem yumi foget se Hem i save wanem i minim blong traehad.
Pikja i kam long Brandon Gonzales
Oltaem mi tingting se mi no stap insaed long tabu help blong Kraes taem mi stap gat wan hadtaem. Samtaem mi tingting se Hem, wan Sevya we i no gat sin mo i stret gud evriwan, bae i neva andastanem wanem i minim blong traehad.
Mi tingbaot speseli taem mi stap filim olsem taem mi wan misinari. I bin tekem wan bigfala traehad blong mi luksave se Kraes i save wanem i minim blong gat wan hadtaem.
?Hao Nao Bae Hem I save Wanem Mi Bin Stap Filim?
Mi ting se mi stap long impoten pat blong misin blong—mi stap trenem wan niufala misinari, stap rere long ol baptaes, mo stap kam blong save moa gud abaot misin laef. Mi filim glad tumas.
Be mi no luksave wari mo fraet we i stap gro insaed long mi.
Mi leidaon blong silip wan naet taem problem ia i stat blong mekem mi harem nogud mo gat wan seken panik atak we mi gat long ful laef blong mi—faswan we mi bin kasem i bin hapen naen yia pas. !Naen yia!
?From wanem afta long wan sot taem blong wari taem mi bin smol mo naoia i kambak kwik?
Wetem stronghed blong mi, mi gohed long misin blong mi long nomol wei mo stap tingting se mi save stretem ol problem blong miwan.
Taem mi stap traehad wetem sik blong mi ia long saed blong tingting, wan i serem wetem mi wan niu lukluk we oli bin gat taem oli stap rid abaot eksperiens blong Sevya long Getsemane.
Jisas i bin talem, “Tingting blong mi i hevi tumas, we klosap mi mi ded from.” Mo afta, Sevya i prea se, “Papa, sapos yu save mekem, plis yu tekemaot ol samting ya we i stap mekem mi mi harem nogud tumas. Be yu no mekem olsem we mi mi wantem, yu mekem olsem we yu nomo yu wantem” (Matiu 26:38–39).
?Yu bin eva filim hamas harem nogud blong yuwan i hevi? Yu eva askem God se, “?I no gat wan nara wei?”
Wetem tingting blong Hem we i stret gud evriwan blong wantem mekem, wetem fasin blong stap obei mo lav blong Hem we i stret gud evriwan, Ridima blong yumi i akseptem tingting blong Papa. Hem i stret gud evriwan from se Hem i no gat sin be yet, Hem i filim soa long bodi, harem nogud mo Hem i stap Hemwan.
Afta evri samting ia, Hem i kamdaon long evri samting—mekem se Hem i save leftemap yumi.
Presiden Jeffrey R. Holland, Akting Presiden blong Kworom blong Olgeta Twelef Aposol i bin tijim se, “[Jisas] i wan man we i harem nogud plante taem’ [Aesea 53:3], ol skripja i talem. Hem i sore, Hem i taed, Hem i filim nogud, mo Hem i harem nogud tumas Long ol taem ia mo evri nara taem, lav blong Jisas i neva sot, semmak long Papa blong Hem.”
Kraes I Save Stret Wanem Yumi Filim
Blong save se Kraes i fesem ol had samting i rimaenem mi se Hem i andastanem hat we i brok, bigfala wari, taet long saed blong tingting mo bodi, filing blong no agri, wari mo filing blong stap yuwan, Hem i andastanem ol samting ia moa bitim eniwan.
Hem nao i bin krae long ded blong Lasaros (luk long Jon 11:33–36). Mo i Hem nao i bin askem taem Hem i stap ded long kros se, “God blong mi, God blong mi. ?From wanem yu lego mi mi stap olsem ya?” (Mak 15:34).
Be Jisas Kraes i save tu glad, lav, fasin blong gat sore mo lav, sore mo pis moa bitim eniwan. From se Hem i stret gud evriwan. Hem i save i stret gud evriwan wanem yumi stap filim.
Presiden Holland i testifae se: “Wan long ol bigfala samting we i stretem tingting long Ista taem ia i we, from Jisas i bin wokbaot long wan longfala wokbaot ia, Hemwan, yumi yumi no nid blong mekem olsem. Longfala wokbaot blong Hem we Hem i bin mekem Hemwan, bae i mekem Hem i stap long saed blong yumi long sot wokbaot blong yumi long rod ia—yumi gat kea blong Papa blong yumi we i stap long Heven, kampani we i stap oltaem blong Pikinini blong Hem we Hem i Lavem Tumas, mo hae presen we i Tabu Spirit.”
Blong kam blong luksave se Jisas Kraes i andastanem i stret gud evriwan wanem we mi stap filim taem mi stap traehad wetem ol wari blong mi, long en, mi letem Hem blong helpem mi blong karem ol hevi samting long solda blong mi.
Wari blong mi i no kamaot kwiktaem. Mi gohed blong gat ol dei we i had. Be blong stap kolosap long Kraes i givim long mi wan glad we i stap oltaem from se mi save Hem i stap long ples ia wetem mi mo stap talem se, “Mi save. Mi save i stret gud evriwan wanem yu stap filim.”
Long taem blong eksperiens ia, Kraes i kam bes fren blong mi.
Mi ting se samtaem yumi wantem blong tingting se fasin blong Kraes blong stap stret evriwan i minim se Hem i stap longwe mo yumi no save kasem Hem, se ol bigfala samting we Hem i mekem mo ol laef blong Hem we i gud tumas i mekem se Hem i stap longwe tumas long yumi, from we yumi no stret evriwan mo yumi gat hae tingting. Be Hem i stap moa kolosap long yumi taem yumi stap fesem ol strong faet, ol harem nogud blong yumi we i bigwan tumas mo ol ol samting we oli mekem yumi harem nogud moa.
Long Ista sisen ia, yumi save tingbaot se Jisas Kraes i save gud wanem i minim blong stap traehad from se Hem i stret evriwan—Man Ia nomo we i save filim soa bodi mo karem ol hevi samting blong yumi.
Mekem se, taem yu stap traehad, tanem yu i go long Hem. Hem i andastanem samting i stret gud evriwan.