Tabu Aedentiti: Gospel Trutok We I Jenisim Laef blong Mi

Wan trutok blong gospel blong Jisas Kraes we i jenisim laef, i we yumi yumi ol pikinini blong wan papa mo mama long heven.

Elda Patrick Kearon blong Kworom blong Olgeta Twelef Aposol i bin tijim se “evri nara samting, we i mekem se yumi save gat paoa blong akseptem evri nara samting we Papa blong yumi i wantem blong givim long yumi—wan impoten presen blong save, we taem oli kasem fulwan mo akseptem dip long sol, hem i mekem yumi andastanem ol glad mo hadtaem blong laef, mo ol kwestin blong yumi we i nogat ansa yet: Hem i we i tru se yumi ol pikinini blong God.”

Stat long eksperiens ia blong misin kol blong mi, mi bin filim trutok blong ol toktok ia. Mi neva fogetem olsem wanem tingting blong mi i go daon mo paoa we mi bin filim taem mi luksave se God i save mi mo lavem mi.

Nomata long trutok ia, wol raon long mi i no traehad blong rimaenem mi abaot tabu famli laen blong mi. Mi kam blong luksave se mi mas gat tingting ia blong wantem blong stap tingbaot tabu aedentiti blong mi mo paoa we i kam tru long hemia.

Long mi, hemia i tekem tu ol samting olsem, blong stap tingting hevi long merikel blong bodi blong mi mo wanem hemia i letem mi blong mekem mo kasem eksperiens long hem evri dei.

Mi filim tu se mi konek wetem Man We Krietem mi taem mi stap long wan kwaet ples blong neja. Blong stap luk ol naesfala samting long ol bigfala hil o blong san taem i godaon, oli rimaenem mi se God i no nid blong mekem wol i naes. Be Hem mo Jisas Kraes Tufala i bin mekem hemia blong yumi from se Tufala i wantem yumi blong gat wan gudtaem long ol samting raon long wol ia mo tingbaot lav blong Tufala (luk long Moses 6:63).

Mo blong stap prea long Papa long Heven evri dei—blong stap letem Hem i save abaot wanem mi filim mo stap luksave se Hem i wantem blong lisin mo toktok long mi—i helpem mi blong mekem koneksen blong mi wetem Hem i kam moa strong. Prea i rimaenem mi se mi no stap miwan mo se Hem i stap lidim mi, iven sapos wanem we mi wantem i no stap hapen naoia. Mi trastem se Hem, wan Papa we i gat lav, i save wetaem hem i stret taem blong ol blesing i kam long laef blong mi.

Misin blong mi i no wanem we mi tingting long hem, be mi bin gat ol eksperiens we i bin helpem mi blong luk from wanem Papa long Heven i wantem mi blong stap long hom eria blong mi. Blong stap serem trutok abaot tabu aedentiti wetem olgeta we oli neva save abaot hemia bifo, i fulumap mi wetem glad.

Mi no save se laef bae i olsem wanem sapos mi no save huia mi stret—bae mi filim emti mo lus.

Taem mi tingting long stamba tingting blong laef blong mi, i givim mi bigfala hop blong save se laef long wol ia i wan smol pat nomo long plan blong Papa long Heven long mi. Mi gat janis blong mekem samting, lanem samting mo kam moa olsem huia mi stap kam olsem tedei tru long tabu presen ia blong laef we Hem i bin givim olsem pikinini blong Hem. Mi glad tumas se Hem i givim Pikinini blong Hem we i lavem tumas olsem Sevya blong mi mo we Hem i letem mi blong jusum blong kam long wol ia blong kam olsem Hem mo gobak long Hem.

Nomata wanem we wol i sakem long yu, mi hop se oltaem bae yu tingbaot huia stret yu. Trutok ia bae i givim paoa long yu blong fesem eni samting we i kam long rod blong yu.

Semmak olsem we God i bin harem mi long stret taem we mi nidim, mi save se oltaem Hem i stap harem mo lavem yu tu.