Ol Ae blong Luk Gud Samting

Pikja i kam long Briana Kranz

Long Jenuware 2025, waef blong mi, Kayla, i stat blong fesem hadtaem blong lukluk. Hem i gohed blong filim hed i soa oltaem mo soa long lefsaed ae blong hem. Hem i no save lukluk gud, mo mitufala i stat blong wari.

Taem mitufala i go long wan dokta blong ae, hem i faenem se se lef ae blong hem i gat hae presa. Hem i sendem mitufala i go long wan speselis blong givim tritmen blong ae blong jekem hae presa blong ae. Ae blong Kayla i stap long bigfala denja. Mitufala i ringim sam dokta be plante ofis oli klos yet from ol holidei. Wanem we mitufala i save mekem i blong wet nomo.

Wari i bigwan long maen blong mitufala. Mitufala i tanem mitufala i go long Papa long Heven tru long prea blong kasem help, mo stap askem se bae evri samting i wok folem plan blong Hem. Mitufala i wantem tumas blong kasem sapot, mo filim lav blong Hem. Mitufala i save se evri samting bae i Oraet.

Long en, mitufala i kasem wan apoenmen afta long fo dei nomo wetem speselis we oltaem i stap gat wan lis blong nem blong olgeta we oli stap wet blong sam manis. Speselis blong ae tritmen i faenemaot se ae presa blong Kayla i bin godaon. Hem i raetem sam meresin blong aedrop mo mitufala i go long rod blong mitufala.

I no gat wan jenis we ae blong waef blong mi i tekem i kam long laef, be mitufala i bin lanem blong luk gud samting taem mitufala i stap tanem mitufala i go long Atonmen blong Jisas Kraes. Sevya i helpem mitufala blong stap positif mo stap glad nomata ol tes blong laef ia. Mitufala i save se Hem i save hilim yumi folem taem blong Hemwan mo folem wei blong Hemwan.

Jisas Kraes i no pemaot ol sin blong yumi nomo—Hem i safa tu long evri “soa bodi mo hadtaem [blong yumi] … blong evri kaen; … blong mekem se insaed blong hem i save kam fulap long sore, long saed blong bodi blong mit mo bun, mekem se hem i save, … olsem wanem blong helpem ol man blong hem long saed blong ol samting … we oli no strong long olgeta” (Alma 7:11–12).

Yumi filim kamfot from se yumi save se Jisas Kraes i andastanem harem nogud blong yumi. From se yumi joenem yumiwan long Hem, yumi faenem “spel long ol sol [blong yumi]” (luk long Matiu 11:28–30).

Presiden Camille N. Johnson, Rilif Sosaeti Jeneral Presiden i bin tijim se:

“Jisas Kraes i save mekem ol trabol ia i kam laet.

“Jisas Kraes i save leftemap ol hevi trabol blong yumi. …

“Jisas Kraes i help blong yumi.”