“Tomas: I Stap Wokbaot long Rod blong Fet,” Liahona, Maj 2026.
Oli Bin Save Sevya
Tomas: I Stap Wokbaot long Rod blong Fet
Stori blong Tomas i soem long yumi ol kwestin ia, fasin blong save wet longtaem mo blong stap kasem wan witnes, oli pat blong stap mekem fet mo bilif blong yumi i kam antap.
Pikja i kam long Laura Serra, oli no save mekem kopi
?Wanem nao i kam long maen blong yu taem yu harem nem blong disaepol blong Sevya, Tomas? Plante taem yumi tingting long nem blong hem olsem “man we i gat tu tingting” o “man we i stap gat tu tingting.”
Be i gat moa samting abaot Tomas. Insaed long gospel blong Jon, yumi luk se rod blong fet blong Tomas maet i semmak long yumiwan: Fet i nidim taem blong i save kam moa strong taem yumi biliv mo tekem aksen blong mekem fet blong yumi i kam antap.
Hem I Oraet blong Gat Ol Kwestin
Jisas Kraes i singaotem Tomas blong stap olsem wan long ol Twelef Aposol blong Hem, mo Tomas i bin folem Sevya truaot long tri yia ministri blong Hem. Hem i gat wan lav we i strong tumas long Sevya. Taem we Tomas i gat fraet from laef blong Lod, hem i askem strong long ol nara Aposol blong, “Ale, yumi evriwan i go, blong yumi ded wantaem wetem hem” (Jon 11:16).
Long taem blong wokhad blong hem, hem i gohed blong askem kwestin yet. Bifo Getsemane, Jisas i tijim ol disaepol blong Hem se Hem bae i stap go. Tomas i askem, “?Masta, mifala i no save ples ya we bambae yu yu go long hem. ?Bambae mifala i save rod blong hem olsem wanem?”
Jisas i ansa, “Mi nao rod ya, mo mi mi stamba blong trutok, mo mi stamba blong laef. I no gat man i save kam long Papa blong mi, sapos mi mi no tekem hem i kam” (Jon 14:5–6).
Olsem Tomas, maet bae yumi no andastanem evri tijing blong God o evri pat blong plan ia blong sevem man. Be blong stap askem ol kwestin we oli stret mo gud i save givimaot trutok we i kam long Lod. Hem i wan mas blong mekem fet blong yumi i gro.
Presiden Russell M. Nelson i tijim:
“Sapos yu gat ol kwestin—mo mi hop se yu gat—lukaotem ol ansa wetem wan tru hat blong wantem biliv. …
“… Ol kwestin blong yu we i kam wetem tru hat, askem wetem fet, bae oltaem i lid i go long bigfala fet mo moa save.”
Fet Vesem Fraet
Taem we Ol Aposol oli bin harem se Jisas i bin girap bakegen long ded, hemia i “olsem tok olbaot nomo, nao oli no bilif long olgeta.” (Luk 24:11). Ol taem we Tomas i gat tu tingting, maet i bin stap longwan bitim ol narawan from se hem i no bin stap long taem we Lod we i girap bakegen long ded i kamkamaot long olgeta faswan (luk long Jon 20:24).
Afta we oli talemaot long Tomas se oli bin luk Sevya, hem i ansa, “Sipos mi luk ol hol blong nil long han blong hem, mo mi putum fingga blong mi i go long ol hol ya, mo mi pusum han blong mi i go insaed long saed blong hem, bambae mi jes bilif long hem. !Be sipos no, bambae mi no save bilif” (Jon 20:25).
Afta long eit dei, Lod i kamkamaot bakegen mo askem Tomas blong tajem ol kil blong Hem. Nao Tomas i talem long hem se, “Yu yu Masta blong mi, mo yu God blong mi” (Jon 20:28). Biaen, Jisas i tijim wan impoten trutok: “Yu yu bilif long mi from we yu luk mi. Be olgeta we oli no luk mi, be oli bilif long mi, bambae oli save harem gud” (Jon 20:29).
Ol ansa bae oli kam. Elda David A. Bednar blong Kworom blong Olgeta Twelef Aposol i bin tijim se, “Evri prea we i kam long tru hat, Papa long Heven i harem mo ansarem, be ol ansa we yumi kasem maet i no kam olsem we yumi wantem o kam long yumi long taem we yumi wantem o long wei we yumi ekspektem.”
Bilif We I Stap blong Oltaem
Taem yumi kasem ol ansa tru long fasin blong stap strong, tru long prea mo revelesen, yumi save kasem tu wan bilif—wan testemoni. Sapos yumi gohed blong fidim fet blong yumi, testemoni ia i save stap wetem yumi truaot long laef. Olsem we Presiden Nelson i bin tijim: “Taem yu gat longfala tingting blong folem taemtebol blong Lod, bambae yu kasem save mo andastaning ia we yu stap lukaotem. Evri blesing we Lod i gat blong yu—iven ol merikel—bae oli kam. Hemia nao wanem we revelesen blong yuwan bae i mekem blong yu”
Eksperiens blong Tomas i soem long yumi se fet i no wan samting blong kasem nomo be hem i wan proses. God i respektem proses ia mo stap blesem yumi taem yumi gohed blong luksave mo folem Spirit blong Hem mo lukaotem witnes we i givim pis long hat blong yumi (luk long Doktrin mo Ol Kavenan 88:63).