Ուրախալի լուրը

Նկարը` Բրիանա Կրանցի

Ես և Մարիցան հարևաններ էինք և ծանոթացել էինք երիտասարդ տարիքում։ Չնայած նա մի քանի տարով մեծ էր ինձանից, մենք դարձանք շատ մտերիմ լավ ընկերներ։

Երբ ես 19 տարեկան էի և հատկապես ուղղորդման կարիք ունեի, նա ինձ ծանոթացրեց Հիսուս Քրիստոսի վերականգնված ավետարանին՝ լիաժամկետ միսիոներների միջոցով։ Ես արդեն մի փոքր գիտեի Հիսուս Քրիստոսի Վերջին Օրերի Սրբերի Եկեղեցու մասին հորեղբորս և տատիկիս միջոցով։ Նրանք Եկեղեցու ռահվիրա անդամներն էին իմ ընտանիքում։

Մարիցան ինձ հետ էր իմ դարձի գալու ողջ ընթացքում․ նա օգնեց ինձ զարգացնել իմ վկայությունը Փրկչի և Նրա ավետարանի մասին և օգնում էր ամեն անգամ, երբ ես նրա կարիքն ունեի։

Ես նրանից սովորեցի, թե ինչ ուրախություն է ավետարանով պարզությամբ և վճռականությամբ ապրելը։ Ես հիանում էի, թե նա ինչպես էր շփվում մյուսների հետ, միաբանում ընտանիքին և ընկերներին ու հաստատակամորեն հասնում աշխարհիկ և հոգևոր նպատակներին։ Ես նրանից սովորեցի, որ երբ մենք սովորում ենք ճշմարտությունը, պետք է կիրառենք մեր սովորածը՝ պահելով պատվիրանները և կիրառելով ավետարանի ուսմունքները մեր կյանքում և ընտանիքներում։ Հավատարիմ մնալու համար մենք պետք է համարձակ լինենք մեր վկայության մեջ և ձգտենք հավատարիմ մնալ մեր հավատքին՝ չնայած դժվարություններին։

2010 թվականին Մարիցան մահացավ ավտովթարից։ Դա տխուր պահ էր ինձ համար, բայց գիտեմ, որ փրկության ծրագրի և Հիսուս Քրիստոսի Քավության շնորհիվ, ես կրկին կտեսնեմ նրան։ Գիտեմ, որ նա ապրում է այնտեղ, որտեղ հիմա գտնվում է՝ նույն ուրախ տրամադրությամբ և եռանդով, որը բնորոշ էր նրան այստեղ՝ երկրի վրա։

Ես գիտեմ, որ այս «փորձնական վիճակը» (Ալմա 12․24) միակ տեղը չէ։ Գիտեմ, որ մենք կրկին կտեսնենք մեր ընտանիքի անդամներին և ընկերներին վարագույրի մյուս կողմում։ Մենք կտեսնենք նրանց, կողջունենք նրանց և կրկին միասին կլինենք։ Մենք կզգանք նույն սերը, որը զգացել ենք միմյանց հանդեպ երկրի վրա (տես Վարդապետություն և Ուխտեր 130․2): Իմ ընտանիքի անդամները հոգևոր աշխարհում են։ Գիտեմ, որ Մարիցան նույնպես այնտեղ է։

Մարիցան ուրախությամբ կիսվում էր ավետարանի մասին բոլորի հետ երկրի վրա։ Վստահ եմ, որ նա նույն բանն է անում հոգևոր աշխարհում (տես Վարդապետություն և Ուխտեր 138․57): Նա ուսուցանում է Փրկչի անսահման Քավության և այն ուրախալի լուրի մասին, որ Նրա շնորհիվ և տաճարային արարողությունների միջոցով, մենք կարող ենք վերադառնալ Նրա և Հոր ներկայություն՝ որպես ընտանիքներ հավերժ ապրելու համար: