សៀវភៅចូរមកតាមខ្ញុំ
លោកុប្បត្តិ ២២:១–១៨
ព្រះករុណាវិសេសព្រះអម្ចាស់
សូមឲ្យយើងតែងតែឆ្លើយតបទៅនឹងព្រះអម្ចាស់ដូចដែលអ័ប្រាហាំបានធ្វើ ។
រចនារូបភាពដោយ ជូលី រ៉ូជើរ
យ៉ូសែប ស្ម៊ីធ ធ្លាប់បានថ្លែងថា « នៅពេលដែលព្រះអម្ចាស់បញ្ជា សូមធ្វើវា » ។ ការបង្ហាញនូវសេចក្ដីជំនឿ និងសកម្មភាពបែបនេះ នាំឲ្យខ្ញុំនឹកចាំពីបទពិសោធន៍ផ្សេងៗដែលស្រដៀងគ្នានេះដែរ ។
ឧទាហរណ៍ នៅពេលលោកអ័ដាមត្រូវបានសួរថាហេតុអ្វីបានជាលោកថ្វាយយញ្ញបូជា ចម្លើយរបស់លោក គឺខ្ញុំមិនដឹងទេ លើកលែងតែព្រះអម្ចាស់ទ្រង់បញ្ជាខ្ញុំប៉ុណ្ណោះ( សូមមើល ម៉ូសេ ៥:៦ ) ។ ខ្ញុំក៏បានគិតដល់ឆន្ទៈរបស់លីហៃ ក្នុងការចាកចោលផ្ទះសម្បែង និងទ្រព្យសម្បត្តិរបស់លោក ដើម្បីធ្វើតាមសេចក្តីណែនាំរបស់ព្រះអម្ចាស់ផងដែរ ( សូមមើល នីហ្វៃទី១ ២:២–៤ ) ឬសេចក្តីជំនឿរបស់នីហ្វៃក្នុងការយល់ព្រមត្រឡប់ទៅយកផ្ទាំងទាំងឡាយវិញ ( សូមមើល នីហ្វៃទី១ ៣–៤ ) ។
ខ្ញុំអាចដកស្រង់នូវឧទាហរណ៍ច្បាស់លាស់ជាច្រើនទៀតនៅក្នុងព្រះគម្ពីរដែលឆ្លុះបញ្ចាំងពីស្មារតីនៃការគោរពប្រតិបត្តិ ប៉ុន្តែខ្ញុំចង់ផ្តោតលើបទពិសោធន៍របស់អ័ប្រាហាំវិញ ។
ការគោរពប្រតិបត្តិរបស់អ័ប្រាហាំ
ព្រះអម្ចាស់បានសន្យាថានឹងប្រទានពូជអំបូរដ៏ធំមួយទៅដល់អ័ប្រាហាំ និងសារ៉ា ។ វាត្រូវការពេលដើម្បីទទួលបានការសន្យានោះ ឬថាវានឹងកើតមានឡើងទៅតាមពេលវេលារបស់ព្រះអម្ចាស់ ។ ទោះជាយ៉ាងណា ព្រះអម្ចាស់បានធ្វើការសាកល្បងសេចក្តីជំនឿរបស់អ័ប្រាហាំ នៅពេលដែលទ្រង់បានសុំឲ្យគាត់បូជាកូនប្រុសរបស់គាត់គឺអ៊ីសាក ដែលជាពរជ័យដែលពួកគាត់បានអធិស្ឋាន និងបានរង់ចាំអស់រយៈពេលជាយូរមកហើយ ។ យើងប្រហែលជាបានអានដំណើររឿងបទគម្ពីរនេះច្រើនដងហើយ ប៉ុន្តែតើយើងបានដាក់ខ្លួនយើងក្នុងស្ថានភាពរបស់អ័ប្រាហាំញឹកញាប់ប៉ុនណាដែរ ?
វាពិបាកដើម្បីស្រមៃគិតពីអារម្មណ៍របស់ឪពុកដ៏ជាទីស្រឡាញ់ម្នាក់នៅចំពោះមុខការចាត់តាំងឲ្យធ្វើកិច្ចការបែបនេះ ។ ទោះជាយ៉ាងនេះក្ដី ការប្តេជ្ញាចិត្តរបស់អ័ប្រាហាំក្នុងការសម្រេចចិត្តដើម្បីគោរពតាមយ៉ាងខ្ជាប់ខ្ជួននោះ ធ្វើឲ្យខ្ញុំភ្ញាក់ផ្អើលនៅពេលគាត់រៀបចំខ្លួនទៅភ្នំមួយនៅឯស្រុកម៉ូរីយ៉ា ហើយថ្វាយយញ្ញបូជាតាមការស្នើសុំ ។ នៅក្នុងការបង្ហាញពីឆន្ទៈ និងការទទួលយកនូវព្រះឆន្ទៈរបស់ព្រះវរបិតាសួគ៌ ចម្លើយរបស់គាត់នៅតែដូចមុន « ព្រះករុណាវិសេសព្រះអម្ចាស់ » ។ ( សូមមើល លោកុប្បត្តិ ២២:១–២ ) ។
ជាថ្នូរនឹងការគោរពប្រតិបត្តិរបស់គាត់ គាត់បានមានពរដោយទទួលបាននូវការទុកឲ្យអ៊ីសាកនៅមានជីវិត ព្រមទាំងជាមួយនឹងពរជ័យដ៏អស្ចារ្យ និងគ្មានទីបញ្ចប់សម្រាប់ខ្លួនគាត់ សម្រាប់សារ៉ា និងសម្រាប់កូនចៅរបស់ពួកគាត់ផងដែរ ( សូមមើល លោកុប្បត្តិ ២២:១៥–១៨ ) ។
ការចុះចូលរបស់ព្រះអង្គសង្គ្រោះ
ដោយគ្មានការសង្ស័យ ព្រះអង្គសង្គ្រោះ ព្រះយេស៊ូវគ្រីស្ទ គឺជាចំណុចកណ្ដាលនៃគំរូដ៏ខ្ពង់ខ្ពស់នៃការគោរពប្រតិបត្តិ និងការចុះចូលនឹងព្រះវរបិតាសួគ៌ ។ ទ្រង់បានបង្ហាញពីឆន្ទៈរបស់ទ្រង់ក្នុងការគោរពប្រតិបត្តិដោយយាងមកកាន់ផែនដីនេះ ដោយបានទទួលបុណ្យជ្រមុជទឹក ដោយមានភាពស្អាតស្អំ និងល្អឥតខ្ចោះ និងដោយការប្រគល់ជីវិតរបស់ទ្រង់ធ្វើជាដង្វាយ ហើយលើកដាក់លើរូបអង្គទ្រង់នូវការឈឺចាប់ ទុក្ខវេទនា ជំងឺទាំងឡាយ អំពើបាប និងសេចក្តីស្លាប់របស់រាស្រ្តទ្រង់ ដើម្បីទ្រង់អាចញ្ញាណដឹងពីរបៀបជួយរំដោះ យើងនៅក្នុងសាច់ឈាម ( សូមមើល អាលម៉ា ៧:១១–១៣ ) ។
មានពេលមួយ ដោយបទពិសោធន៍ដ៏ខ្លោចផ្សារនោះបានបណ្តាលឲ្យទ្រង់សួរថា តើមានវិធីណាមួយដែលធ្វើឲ្យពែងល្វីងនោះរំលងហួសទៅទេ ។ បន្ទាប់មកទ្រង់បានមានបន្ទូលភ្លាមៗថា « ប៉ុន្តែកុំតាមចិត្តទូលបង្គំឡើយ សូមតាមតែព្រះហឫទ័យទ្រង់វិញ » ( លូកា ២២:៤២ )—ឬនិយាយម្យ៉ាងទៀតថា « ព្រះករុណាវិសេសព្រះអម្ចាស់ »—ដោយហេតុនេះ ទ្រង់បានបង្ហាញនូវឆន្ទៈរបស់ទ្រង់ដើម្បីធ្វើតាមព្រះឆន្ទៈរបស់ព្រះវរបិតា ។
ការគោរពប្រតិបត្តិ និងសេចក្តីស្រឡាញ់
តើយើងអាចបណ្តុះឆន្ទៈក្នុងការឆ្លើយតប « ព្រះករុណាវិសេសព្រះអម្ចាស់ » ចំពោះរាល់សំណើដែលព្រះវរបិតាសួគ៌ដាក់លើយើងក្នុងនាមជាសមាជិកនៃសាសនាចក្រ ឬពេលខ្លះក្នុងកម្រិតផ្ទាល់ខ្លួនដោយរបៀបណា ?
ប៉ុលបានបង្រៀនជនជាតិរ៉ូម « សេចក្តីស្រឡាញ់ ជាកិច្ចសម្រេចតាមក្រឹត្យវិន័យ » ( រ៉ូម ១៣:១០ ) ។ ប្រសិនបើខ្ញុំចង់ស្វែងរកពាក្យមួយដែលជំនួសឲ្យឃ្លា « កិច្ចសម្រេចតាមក្រឹត្យវិន័យ » ខ្ញុំគិតថាពាក្យ គោរពប្រតិបត្តិ ជាពាក្យដែលខ្ញុំនឹងគិតដល់ភ្លាមមុនគេ ។ ដូច្នេះយើងអាចនិយាយបានថា សេចក្តីស្រឡាញ់ គឺជាការគោរពប្រតិបត្តិ ។ ដូច្នេះហើយបន្ទូលរបស់ព្រះអង្គសង្គ្រោះ ដែលទ្រង់មានបន្ទូលថា« បើអ្នករាល់គ្នាស្រឡាញ់ខ្ញុំ ចូរកាន់តាមបញ្ញត្តរបស់ខ្ញុំចុះ » ( យ៉ូហាន ១៤:១៥ ) ធ្វើឲ្យយល់កាន់តែច្បាស់ ។
យើងអាចឆ្លើយតបដោយថា « ព្រះករុណាវិសេសព្រះអម្ចាស់ » ឬតាមពាក្យរបស់នីហ្វៃ « ខ្ញុំនឹងទៅហើយធ្វើ » ( នីហ្វៃទី១ ៣:៧ ) ។ នៅក្នុងភាសាសម័យទំនើបរបស់យើង យើងអាចនិយាយបានថា « ពិតណាស់ ខ្ញុំស្ម័គ្រចិត្តដើម្បីធ្វើតាមអ្វីដែលព្រះវរបិតាសួគ៌បញ្ជា មិនថាក្នុងកាលៈទេសៈណានោះទេ » ។
អ្វីដែលខ្ញុំចង់បញ្ជាក់នោះគឺទំនាក់ទំនងនៃសេចក្ដីស្រឡាញ់ និងការគោរពប្រតិបត្តិ ដែលមានន័យថាយើងគោរពតាមព្រះវរបិតាដោយសារយើងស្រឡាញ់ទ្រង់ ។ ខ្ញុំជឿថាការជ្រើសរើសដើម្បីគោរពប្រតិបត្តិ គឺជាវិធីដ៏ល្អបំផុតមួយដើម្បីប្រកាសយ៉ាងច្បាស់ពីសេចក្តីស្រឡាញ់របស់យើងចំពោះទ្រង់ ។ « សេចក្តីជំនឿ បើគ្មានការប្រព្រឹត្តតាម នោះឈ្មោះថាស្លាប់ » ( យ៉ាកុប ២:២៦ ) ហើយខ្ញុំផ្ទាល់ ខ្ញុំមិនគិតថាយើងស្រឡាញ់ព្រះវរបិតា និងព្រះយេស៊ូវគ្រីស្ទនោះទេ ប្រសិនបើយើងមិនគោរពប្រតិបត្ដិដល់ទ្រង់ទាំងទ្វេនោះ ។
របៀបដើម្បីបង្កើនសេចក្តីស្រឡាញ់ និងការគោរពប្រតិបត្តិរបស់យើង
តើយើងបង្កើនសេចក្តីស្រឡាញ់ និងការគោរពប្រតិបត្តិរបស់យើងចំពោះទ្រង់ដោយរបៀបណា ? ទ្រង់បានមានព្រះបន្ទូលថា « នេះគឺជាជីវិត ដ៏នៅអស់កល្បជានិច្ច គឺឲ្យគេបានស្គាល់ដល់ទ្រង់ដ៏ជាព្រះពិតតែមួយ និងព្រះយេស៊ូវគ្រីស្ទ ដែលទ្រង់បានចាត់ឲ្យមកផង » ( យ៉ូហាន ១៧:៣ ) ។ ការស្គាល់ព្រះយេស៊ូវគ្រីស្ទ—ហើយតាមរយៈទ្រង់ គឺព្រះវរបិតា—អនុញ្ញាតឲ្យយើងដឹងពីសេចក្តីស្រឡាញ់ដែលទ្រង់ទាំងទ្វេមានចំពោះយើង និងរឿងដែលមិនអាចរៀបរាប់បានដែលទ្រង់ទាំងទ្វេបានធ្វើ ហើយនៅតែនឹងធ្វើសម្រាប់យើង រួមទាំងក្នុងអំឡុងពេលដ៏លំបាកដែលយើងជួបប្រទះនៅក្នុងជីវិតរមែងស្លាប់នេះផងដែរ ។ ការស្គាល់ទ្រង់ទាំងទ្វេផ្លាស់ប្តូរចិត្តរបស់យើង ធ្វើឲ្យយើងចង់ធ្វើតាមគំរូរបស់ទ្រង់ទាំងទ្វេនៅក្នុងសកម្មភាពរបស់យើង និងមានឆន្ទៈក្នុងការនិយាយ នៅក្នុងពាក្យពេចន៍ និងទង្វើរបស់យើងថា « ព្រះករុណាវិសេសព្រះអម្ចាស់ » ។ ឆន្ទៈនេះត្រូវបានឆ្លុះបញ្ចាំងនៅក្នុងបំណងប្រាថ្នាដើម្បីអានព្រះគម្ពីរ ឬក្នុងការនិយាយទៅកាន់ព្រះវរបិតាសួគ៌តាមរយៈការអធិស្ឋាន ។
« ព្រះករុណាវិសេសព្រះអម្ចាស់ » អាចជាការឆ្លើយតបទៅនឹងការហៅឲ្យបម្រើបេសកកម្ម ឬដើម្បីឧទ្ទិសថ្វាយបន្ថែមទៀតក្នុងការគោរពប្រតិបត្តិតាមបទបញ្ញត្តិដូចជា ការរក្សាថ្ងៃឈប់សម្រាកឲ្យបរិសុទ្ធ ការគោរពឪពុកម្តាយរបស់យើង ឬស្វែងរកការរស់នៅដោយមានភាពស្អាតស្អំខាងសីលធម៌ ។ « ព្រះករុណាវិសេសព្រះអម្ចាស់ » គឺជាឃ្លាមួយដែលតែងនៅជាប់នឹងពួកសិស្សរបស់ព្រះគ្រីស្ទ សូម្បីតែនៅពេលដែលការលះបង់នោះប៉ះពាល់ដល់អ្វីដែលយើងប្រាថ្នាចង់បានបំផុត ឬដែលយើងត្រូវបង់ថ្លៃយ៉ាងខ្ពស់ក៏ដោយ ។
ឆន្ទៈនៅក្នុងការគោរពប្រតិបត្តិនេះមានតម្លៃណាស់ ជាពិសេសចំពោះសេចក្ដីសញ្ញាដែលយើងបានធ្វើនៅពេលយើងបានជ្រមុជទឹក ឬចូលក្នុងព្រះវិហារបរិសុទ្ធ ។ តើបងប្អូនអាចស្រមៃមើលថា តើជីវិតរបស់យើងនឹងទៅជាយ៉ាងណា ប្រសិនបើយើងតែងតែគិតថា « ព្រះករុណាវិសេសព្រះអម្ចាស់ » នៅពេលលើកដាក់លើខ្លួនយើងនូវព្រះនាមរបស់ព្រះគ្រីស្ទ ឬក្នុងគោលបំណងដើម្បីចងចាំដល់ទ្រង់ជានិច្ច និងរក្សាបទបញ្ញត្តិរបស់ទ្រង់នោះ ? ការទទួលទានសាក្រាម៉ង់អញ្ជើញយើងឲ្យបន្តការតាំងចិត្តនោះ ដែលគួរតែត្រូវបានឆ្លុះបញ្ចាំងនៅក្នុងសកម្មភាពរបស់យើងក្នុងរយៈពេលមួយសប្តាហ៍ ។ ការណ៍នេះក៏អនុវត្ដដូចគ្នាផងដែរ នៅពេលដែលយើងទៅព្រះវិហារបរិសុទ្ធ នៅពេលដែលយើងធ្វើ ឬចងចាំសេចក្ដីសញ្ញាដែលយើងធ្វើនៅទីនោះ ។
គំរូរបស់ភរិយាវ័យក្មេងមួយរូប
ខ្ញុំចងចាំការសន្ទនាមួយដែលខ្ញុំមានជាមួយគូស្វាមីភរិយាមួយគូ ដែលទើបរៀបការថ្មីថ្មោងកាលពីច្រើនឆ្នាំមុន ខណៈពេលដែលខ្ញុំបានបម្រើជាប៊ីស្សព ។ យប់មួយ ពួកគេបានមានការពិភាក្សាដ៏យូរ ហើយក្តៅគគុកទាក់ទងទៅនឹងការថ្វាយដង្វាយមួយភាគក្នុងដប់ ។ ស្វាមីវ័យក្មេងនោះបានមានភាពតានតឹងនៅឯកន្លែងធ្វើការ ពេញមួយសប្ដាហ៍ ហើយចង់សន្សំប្រាក់ដែលគាត់រកបានសម្រាប់ការចំណាយផ្ទាល់ខ្លួនមួយចំនួន ។ ទោះជាយ៉ាងណា ខ្ញុំចងចាំពាក្យរបស់ភរិយាវ័យក្មេងនោះដែលបាននិយាយឡើងនៅចំពោះមុខស្វាមីរបស់គាត់ថា « ប៊ីស្សព ខ្ញុំសុខចិត្តមិនចំណាយលើរបស់ទាំងនោះ ទោះបីជាត្រូវអត់អាហារផង ប្រសិនបើចាំបាច់ ប៉ុន្តែខ្ញុំចង់ថ្វាយដង្វាយមួយភាគក្នុងដប់ និងគោរពប្រតិបត្តិតាមព្រះអម្ចាស់ » ។
ការឆ្លើយយ៉ាងមុតមាំថា « ព្រះករុណាវិសេសព្រះអម្ចាស់ » បានបង្ហាញជាមួយនឹងទីបន្ទាល់ដ៏អស្ចារ្យដោយភរិយាវ័យក្មេងនេះ ដែលធ្វើឲ្យស្វាមីគាត់ និងខ្ញុំមានអារម្មណ៍ពីព្រះវិញ្ញាណយ៉ាងខ្លាំងក្នុងអំឡុងពេលនៃការសន្ទនានោះ ។ នៅទីបំផុតខ្ញុំមិនដឹងថា តើវាកើតឡើងចេញពីបំណងប្រាថ្នារបស់គាត់ជាប្ដី ឬដោយសារតែគាត់ត្រូវបានភរិយារបស់គាត់បញ្ចុះបញ្ចូលនោះទេ ប៉ុន្តែស្វាមីនោះបានសម្រចចិត្តបង់ដង្វាយមួយភាគក្នុងដប់របស់គាត់នៅចុងសប្តាហ៍នោះ ។
ថ្ងៃអាទិត្យបន្ទាប់ មុនពេលការប្រជុំ ស្វាមីវ័យក្មេងនេះបានសុំជួបនិយាយជាមួយខ្ញុំបន្ដិច ។ ដោយមានទឹកមុខខុសពីសប្តាហ៍មុន គាត់បានប្រាប់ខ្ញុំថា « ប៊ីស្សព លោកដឹងទេថាកាលពីសប្តាហ៍មុនខ្ញុំបានថ្វាយដង្វាយមួយភាគក្នុងដប់ ហើយខ្ញុំខ្លាចថាខ្ញុំនឹងមិនមានលុយគ្រប់គ្រាន់សម្រាប់អាហារ ប៉ុន្តែខ្ញុំគ្រាន់តែចង់ឲ្យលោកដឹងថា សប្តាហ៍នេះយើងមានទ្វេដងនូវចំនួនប្រាក់សម្រាប់អាហារដែលយើងមានជាងធម្មតា ។ ប៊ីស្សព វាគឺជាអព្ភូតហេតុមួយ ហើយខ្ញុំចង់ឃើញអព្ភូតហេតុទាំងនោះនៅក្នុងជីវិតរបស់ខ្ញុំជានិច្ច » ។ ចំពោះខ្ញុំ វាហាក់ដូចជាបុរសវ័យក្មេងនោះបានប្រាប់ខ្ញុំថា « ប៊ីស្សព ខ្ញុំស្ម័គ្រចិត្តក្នុងការឆ្លើយតបជាមួយនឹងពាក្យថា ‹ ព្រះករុណាវិសេសព្រះអម្ចាស់ › ទៅនឹងអ្វីដែលព្រះសុំពីខ្ញុំ » ។
ការសន្យារបស់យើង
ព្រះអម្ចាស់បានមានបន្ទូលថា ទ្រង់ជាប់សន្យា កាលណាអ្នករាល់គ្នាប្រព្រឹត្តតាមអ្វី ដែលយើងមានព្រះបន្ទូល ( សូមមើល គោលលទ្ធិ និងសេចក្ដីសញ្ញា ៨២:១០ ) ។ តើយើងពិតជាជឿលើភាពខ្ជាប់ខ្ជួននៃការសន្យានោះដែរទេ ?
ប្រហែលជាពរជ័យមិនមកតាមពេលវេលារបស់យើងទេ ឬវិធីដែលយើងចង់បាននោះទេ ប៉ុន្តែខ្ញុំសូមថ្លែងទីបន្ទាល់ទៅកាន់បងប្អូនថា ការសន្យានោះគឺពិត ។ វាទាមទារឲ្យមានសេចក្តីស្រឡាញ់ចំពោះទ្រង ការចុះចូលនឹងទ្រង់ បំណងប្រាថ្នាដើម្បីធ្វើតាមឆន្ទៈរបស់ទ្រង់ និងការរស់នៅក្នុងនាមជាសិស្សរបស់ព្រះគ្រីស្ទ ។ ទ្រង់នឹងជួយយើង ហើយប្រទានពរដល់យើងឲ្យយល់ និងរក្សាសេចក្ដីសញ្ញាដែលយើងមាន ។ បែបនេះ នៅពេលដែលទ្រង់សុំឲ្យយើងធ្វើតាមព្រះឆន្ទៈរបស់ទ្រង់ សូមឲ្យយើងឆ្លើយដោយមុតមាំឡើងថា « ព្រះករុណាវិសេសព្រះអម្ចាស់ ! »