ʻOku Fakatahatahaʻi ʻe he Fakaʻaliʻali Hiva ʻa e Toʻu Tupú ha Kakai ʻe 3,000 Tupu

ʻI he ʻaho Tokonaki 16 ʻo ʻAokosí, ʻi ha paaka fakaʻofoʻofa ʻi he matātahí ʻi he loto kolo ʻo Papeʻeté, naʻe fakatahataha mai ha kakai ʻe toko 3,000 tupu ki ha koniseti naʻe kiʻi makehe.

Naʻe ueʻi ʻe he “Fakaʻaliʻali Hiva Faka-Siasi ʻa e Toʻu Tupú” ha kau hiva mo ha kāingalotu ke mamataʻi ia mei ha ngaahi siasi faka-Kalisitiane kehekehe. Naʻe fakaʻaliʻali ʻe he toʻu tupú ʻa e ngaahi hiva mei he ʻalapama “Strive to Be (Feinga ke Hokosia)” ʻa e Siasi ʻo Sīsū Kalaisí kae pehē ki ha ngaahi hiva mei ha ngaahi siasi faka-Kalisitiane kehe.

Naʻe fakatahatahaʻi mai ʻe he fakaʻaliʻalí ʻa e toʻu tupu faka-Kalisitiane mei he ngaahi siasi kehekehe ʻe fā: Siasi Katoliká, Siasi Palotisani Maʻohí, Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, mo e Komiunitī ʻo Kalaisí.

Naʻe fokotuʻu ai ha faingamālie lahi maʻá e toʻu tupú ke nau fakamoʻoni ki ha kakai tokolahi ʻoku moʻui ʻa e tui kia Sīsū Kalaisí pea ko Ia ʻa e tupuʻanga ʻo e ʻamanaki leleí maʻá e kakai kei talavoú.

Naʻe fakahaaʻi ʻe he kakai kei talavoú ʻa e ongoʻi houngaʻia, tauʻatāina, mo e loto-lahi moʻoni ke fakahaaʻi ʻenau tuí ki he kakaí. Naʻe feʻilongaki ha kakai tui kei talavou ʻi honau ʻapiakó pe komiunitií, ʻo toʻo atu ai ʻenau ongoʻi tuenoa fakalaumālié.

Naʻe fakalotolahiʻi kinautolu ʻe he ngaahi ʻekitivitií ke nau lea, lotu, fakamoʻoni, mo hiva fakataha, ʻo fakatupu ai ha ngaahi feohi fakakaungāmeʻa mo fakamālohia ʻenau mateakiʻi ʻa e tui faka-Kalisitiané.

Naʻe pehē ʻe Tehea mei he Komiunitī ʻo Kalaisí, “ʻI he kamataʻangá, naʻe ʻikai ke u fuʻu fie kau ki ai. Naʻá ku fakakaukau ʻe faingataʻa ke hiva mo e kakai kei talavou mei he ngaahi siasi kehé. Ka ʻi he lolotonga ʻa e ngaahi ako hivá, naʻe liliu ʻa e meʻa kotoa. Naʻa mau maheni, kakata fakataha, mo fevahevaheʻaki ʻemau tuí. ʻI he efiafi ʻo e fakaʻaliʻalí, naʻa mau uouongataha, pea naʻá ku fuʻu fakalataʻia ʻaupito ai. Naʻá ku fakatokangaʻi naʻe ʻikai ko ha ngaahi siasi kehekehe kimautolu, ka ko e toʻu tupu pē ʻe taha naʻe kau fakataha ke fakafetaʻi ki he ʻEikí.”

Naʻe pehē ʻe Kainuku mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, “Naʻá ku fiefia ʻaupito ʻi he māhina ʻe ua kuo ʻosí. Neongo naʻa mau omi mei ha ngaahi tui fakalotu kehekehe, ka ne ʻikai taʻofi ai hono fakatahatahaʻi ʻemau ʻofa ki he ʻOtuá ʻo fakafou ʻi he hivá. Neongo ʻa e loto-mafasiá, ongosiá, pea aʻu pē ki he fokoutuá, naʻa mau kātekina pē ki he ngataʻangá. Naʻe foaki ʻe he tokotaha takitaha honau lelei tahá maʻá e ʻEikí. Naʻe fakahaaʻi mai ʻe he aʻusia ko ʻení ko e taimi ʻoku tau hiva ai maʻá e ʻOtuá, ʻoku mole atu hotau ngaahi faikehekehé, pea ʻoku tupulaki ʻo mālohi ange ʻetau tuí.”

Ko ha lavameʻa maʻongoʻonga ʻa e Fakaʻaliʻali Hiva Faka-Siasi ʻa e Toʻu Tupú ʻo ne ueʻi fakalaumālie ʻa e kakai kei talavoú, fakamālohia ʻenau tuí, mo faʻu ha ngaahi fehokotaki ʻo e femahinoʻakí mo e fakakaungāmeʻá.