“Ko Ho Kaungāmeʻá Haʻu, ʻo Muimui ʻIate Aú,” Liahona, Sānuali 2026.
Ko Ho Kaungāmeʻá Haʻu, ʻo Muimui ʻIate Aú
ʻOku tānaki mai ʻe he maʻuʻanga tokoni ʻo e taʻu ní ha ngaahi ʻilo fakaʻaati foʻou mo fakatupu fakakaukau ki hoʻo ako ʻo e Fuakava Motuʻá.
Te U Fakahaofi Moʻoni Koe, tā fakatātaaʻi ʻe Eva Timothy, ʻoua naʻa hiki hano tatau
ʻIkai nai ʻe lelei kapau ʻe tangutu hao kaungāmeʻa ʻi ho tafaʻakí ʻo fakalotolahi atu he lolotonga hoʻo lau ho folofolá? Mahalo ko ha taha ʻoku manako ʻi he folofolá pea ʻoku mātuʻaki fiefia ʻi hoʻo lau iá, ʻo ʻikai ai ke ne faʻa mapuleʻi ia. ʻE faʻa lea ʻaki ʻe hoʻo kaungāmeʻá ha ngaahi meʻa hangē ko e, “ʻIkai nai ko ha konga fakaofo ia?” “Ko e hā haʻo fakakaukau ki he ngaahi veesi ko iá?” “Mani ē, ʻoku hange tofu pē ʻena ko ʻetau moʻuí, ʻikai ko ia?” Kapau ʻe faifaiangé pea faingataʻa pe te ke puputuʻu ʻi ha potufolofola, mahalo ʻe pehē atu ho kaungāmeʻá, “Sai, ko e founga ʻeni ʻe taha ke vakaiʻi ʻaki. ʻOku tokoni nai ia?”—neongo te ne tokanga ke ʻoua naʻá ne tala atu ha faʻahinga meʻa ʻoku totonu ke ke toki ʻilo pē ʻiate koe. Ka ko hoʻo kaungāmeʻa foki ia.
Ko e Haʻu, ʻo Muimui ʻIate Aú ʻoku meimei hangē ko e faʻahinga kaungāmeʻa ko iá. Ko hono taumuʻá ke tokoniʻi koe ke ke maʻu ha aʻusia fakaofo ʻi hono lau ʻo e folofolá. Te ne lava ʻo fakahinohino atu ʻa e ngaahi potufolofola ʻe tokoni ke langaki hoʻo tui ki he Tamai Hēvaní mo Sīsū Kalaisí—pea te ne lava ʻo tokoniʻi koe ke fakafehokotaki ʻa e ngaahi potufolofola ko iá ki he ngaahi meʻa ʻoku hoko ʻi hoʻo moʻuí. ʻE lava ke tokoni ia ʻi he taimi ʻoku ʻi ai haʻo ngaahi fehuʻi, ka ko e taimi lahi ʻe hanga ʻe he Haʻu, ʻo Muimui ʻIate Aú ʻo ʻeke atu kiate koe ha ngaahi fehuʻi—he ko e kaungāmeʻa moʻoní he ʻikai te ne teitei toʻo meiate koe ʻa e fiefia ʻo hono ʻiloʻi pē ʻiate koe ʻa e ngaahi moʻoni fakalaumālié.
ʻE lava ʻe he Haʻu, ʻo Muimui ʻIate Aú ʻo fai kotoa ʻa e ngaahi meʻa angaʻofa ko ʻení ʻi ha faʻahinga taimi pē ʻokú ke lau ai ʻa e folofolá. ʻIo, ʻo aʻu ki he taimi e ke lau ai ʻa e Fuakava Motuʻá he taʻu ní.
Makehe mei he ngaahi fehuʻi fakatupu fakakaukaú mo e ngaahi fakakaukau ki he ʻekitivitií, te ke ʻilo ha ngaahi meʻa kehe ʻe ʻaonga ʻi he Haʻu, ʻo Muimui ʻIate Aú. Ko ha ngaahi meʻa ʻeni ʻe niʻihi:
Vakai Fakalūkufua ki he Fuakava Motuʻá
ʻI he ofi ki he kamataʻanga ʻo e Haʻu, ʻo Muimui ʻIate Au, 2026, te ke maʻu ai ha vakai fakalūkufua ki he Fuakava Motuʻá. ʻOku hangē ia ko ha fakahokohoko ʻo e ngaahi meʻa ne hokó ʻa ia ʻoku kau ai e hingoa ʻo e kau palōfitá, ngaahi tuʻí, mo ha kakai mahuʻinga kehe. ʻOku ʻaonga ʻeni he ko e ngaahi tohi ʻi he Fuakava Motuʻá ʻoku ʻikai ke fakahokohoko totonu kotoa ia. Hangē ko ʻení, ʻe lava ke fakahaaʻi atu ʻe he vakai fakalūkufuá ʻa e feituʻu ʻoku fenāpasi ai ʻa e ngaahi tohi ʻa e kau palōfita hangē ko ʻĪsaia mo Selemaiá mo e hisitōlia ʻo e Puleʻanga ʻo Siutá. Te ke lava ʻo ʻiloʻi ʻa e feituʻu ʻoku fenāpasi lahi ange ai ʻa e talanoa ʻo Taniela mo ʻĒsetá mo e konga lahi ange ʻo e Fuakava Motuʻá. Kapau ʻe faifaiangé peá ke ongoʻi hē ʻi he Fuakava Motuʻá, ʻalu ki he “Vakai Fakalūkufua ki he Fuakava Motuʻá” ke fakataukeiʻi koe.
Ngāue Fakaʻaati Foʻou
Naʻe aleaʻi ha ʻū tā-vaivali foʻou ʻe hongofulu mā uá ki he Haʻu, ʻo Muimui ʻIate Au ʻo e taʻu ní. ʻOku kau he ʻū tā-valivali mahuʻingá ʻa e:
-
Ko e Mamata ʻa ʻĪnoke ki he Vaeuaʻangamālie ʻo Taimí, tā ʻa Jennifer Paget, ko ha fakataipe ʻo e mata meʻa-hā-mai ʻa ʻĪnoke ki he feilaulau ʻa e Fakamoʻuí (vakai, Mōsese 7).
-
Tuʻu ko ha Fakamoʻoni, tā ʻe Kwani Povi Winder, ʻo fakamamafaʻi ʻa e “taʻahine siʻi” ʻa ia naʻe iku ʻene fakamoʻoni mahinó ki ha mana maʻongoʻonga (vakai, 2 Ngaahi Tuʻi 5).
-
ʻOku ʻI Ai Haʻaku Ngāue Lahi ke Fai, tā ʻe Tyson Snow, ʻokú ne fakafōtunga ʻe loto-fakapapau ʻa Nehemaia ke toe langa e ngaahi ʻā ʻo Selusalemá, neongo e fakafepaki mei hono ngaahi filí (vakai, Nehemaia 4).
-
Ko e Moʻoni Te U Fakamoʻui Koe, tā ʻe Eva Timothy, ko hano fakafōtunga ʻo hono fakatauʻatāinaʻi ʻo Selemaia mei ha luo kelekele ʻe ʻIpetemeleki, ko ha tangata ʻItiopea (vakai, Selemaia 38–39).
“Ngaahi Fakakaukau ke Manatuʻi”
ʻI he taimi lahi, ʻoku faʻa taʻofi fakataimi e ngaahi fakahinohino hokohoko ʻo e ako fakauike ʻo e Haʻu, ʻo Muimui ʻIate Aú ki ha “Ngaahi Fakakaukau ke Manatuʻi.” Ko ha ngaahi fakamatala nounou ʻeni fekauʻaki mo ha ngaahi tefito hangē ko e ngaahi fuakavá, feilaulaú, ko hono tānaki ʻo ʻIsilelí, mo e ngaahi taʻanga ʻo e Fuakava Motuʻá. ʻOku ʻomai ʻe he “Ngaahi Fakakaukau ke Manatuʻi” ha puipuituʻa fakahisitōlia, ngaahi fakakaukau mei he ngaahi ʻaho kimui ní, mo ha ngaahi fakakaukau mahinongofua te ne ala fakafaingofuaʻi ʻa hono maʻu ha ngaahi aʻusia ʻoku langaki ai e tuí ʻi he taimi ʻoku ako ai ʻa e Fuakava Motuʻá.
Hangē pē ko e ngaahi taʻu kuo hilí, ko e Haʻu, ʻo Muimui ʻIate Aú ʻoku ʻikai ko e taumuʻa ia hoʻomou akó. Ko ha hoa tokoni ʻaonga pē ia ʻi hoʻomou ako e folofola ʻa e ʻOtuá ʻi he ngaahi folofolá. Ko e ʻaonga ia ʻo e ngaahi kaungāmeʻá.