“ʻE Fēfē Haʻaku Lāunga? Liahona, Sānuali 2026.
Ngaahi ʻAta ʻo e Tuí
ʻE Fēfē Haʻaku Lāunga?
Naʻe hoko ʻemau hiki tuʻo fā ko ha fāmili kumi hūfangá, ko ha sivi mātuʻaki faingataʻa moʻoni. Ka naʻa mau pīkitai ki he vaʻa ukameá mo fakapapauʻi ʻoku hanga ʻe he ʻEikí ʻo ʻunuakiʻi kimautolu ki muʻa ki ha kahaʻu lelei ange.
ʻI he faʻahitaʻu fakatōlau ʻo e 2019, naʻá ku tūʻuta ai ki Sipeini mo ʻeku fānaú, ko ʻĒlone, taʻu 8, pea mo Siaosi, taʻu 17, ʻa ia ʻoku fokoutua ʻi he ʻōtisimí. Ko ʻeku ngaahi fakaʻānauá pē ne mau ō mo iá, pea naʻá ku pīkitai ki he ʻOtuá mo falala kakato kiate Ia.
Naʻe talitali lelei kimautolu ʻe ha Samēlia lelei ki hono ʻapí, ʻa ia ne mau nofo ai ʻi ha uike ʻe ua. Ka naʻe ʻikai faingofua hono fakamavaheʻi ʻo Siaosi mei he ʻātakai naʻá ne maheni mo iá. Koeʻuhí ko e tuʻunga ʻokú ne ʻi aí, ʻokú ne muimui ai ki ha ngaahi founga pau. ʻI he ngaahi ʻuluaki poó, naʻá ne faʻa tuki ʻaki hono ʻulú ʻa e holisí pea naʻe pau ke u tuʻu fakavave hake ke taʻofi ia mei hono fakaʻaaki e toengá. Naʻá ku tūʻulutui ʻi hono tafaʻakí ʻo lotu, ʻi heʻeku manatuʻi ʻa e ʻĪsaia 41:10: “ʻOua naʻá ke manavahē; he ʻoku ou ʻiate koe: ʻoua ʻe loto vaivai; he ko au ko ho ʻOtuá, te u fakamālohi koe; ʻio, te u [tokoniʻi] koe; ʻio, te u poupou hake koe ʻaki ʻa e nima toʻomataʻu ʻo ʻeku angatonú.”
Lolotonga e fakaʻosinga uike hono ua ʻo ʻemau ʻi Sipeiní, ne mau toki aʻu atu ki he lotú ko e mātuku mai ia ʻa e houalotu sākalamēnití. Naʻá ku fakalea ki ha finemui naʻe ngāue mo e fānau Palaimelí, ʻo fakamatala ange ko ha mēmipa au ʻo e Siasí ka ʻoku ʻikai ke u maheni mo ha taha. Naʻá ne fakafeʻiloaki leva kimautolu ki ha kāingalotu kehe.
ʻI he ʻaho hono hokó naʻe tali ai kimautolu ʻe he kōsilio ʻo Salakosá ko ha kau kumi hūfanga pea ʻave kimautolu ki ha fale nofo totongi naʻe ʻikai ha vai pe ʻuhila ai. Naʻe omi e kau pīsopelikí, Fineʻofá, mo e kōlomu ʻo e kaumātuʻa he uooti ne mau ʻi aí, ʻo tokoni mai ʻaki hano ʻomi ha ʻū kafu, meʻakai naʻe ʻikai fiemaʻu ke toe fakamafana, vala ki he faʻahitaʻu momokó, pea mo ha ngaahi fiemaʻu kehe.
Naʻe kamata ako ʻeku fānaú, peá u kamata ako ngāue mo au. Naʻe faingataʻa ʻa e taimi maʻu meʻatokoní kia Siaosi, he naʻá ne anga ki he kai he taimi hoʻataá. Naʻe talamai ʻe heʻene faiakó ʻe tatau ai pē pe ko hai ʻoku faiakó, ka ko e hoko pē ʻa e 12 hoʻatā, te ne toʻo hake leva ʻene meʻakaí peá ne kamata kai.
“Te U ʻAukai mo Au Foki”
Naʻe hoko ʻemau hiki tuʻo faá ko ha sivi mātuʻaki faingataʻa moʻoni. Naʻá ku lotu ke u kei toʻa ka naʻe lahi e taimi naʻá ku faʻa tangi toko taha aí. Naʻe lahi ha ngaahi uike naʻá ku mohe pē ʻi ha houa ʻe ua pe tolu ʻi he pō. Hili ha ngaahi ʻaho lahi ʻo ʻeku kumi ngāué, ne u monūʻia ke maʻu ha ngāue ko hono tokangaʻi ha finemui kuo kapu ʻe he kanisaá hono ʻutó. ʻI he ʻosi ʻa e taimi ngāue takitaha, naʻá ku ʻalu ʻo ʻomai ʻeku ongo kiʻi tamaikí, tokoniʻi kinaua ʻi heʻena meʻa fakaakó, pea toki fai ʻeku ngāue fakaako mei ʻapí.
Naʻá ku tokangaʻi e finemui fakaʻofoʻofá ni ʻo feʻunga mo ha taʻu ʻe taha, ʻo aʻu ki siʻene mālōlō ʻi hono taʻu 48, kae kei moʻui siʻene ongo kiʻi tamaiki iiki ʻe toko ua. Naʻe ueʻi au ʻe he tūkunga naʻá ne ʻi aí ke u fehuʻi ai kiate au, “ʻE fēfē haʻaku lāunga?” Naʻe hoko ʻeku tokangaʻi iá ke feau ai ʻemau ngaahi fiemaʻú mo fakafonu hoku laumālié ʻaki ha loto-houngaʻia ki heʻeku Tamai Hēvaní.
Ko e ʻaho kotoa pē naʻa mau lau e folofolá ʻi ʻapi, lotu, mo fokotuʻu ha ngaahi founga pau ke malu ai ʻa Siaosi. ʻI he konga kimuʻa ʻo e 2024, ne mau kamata teuteu ai ke ō ki he Temipale Metuliti Sipeiní. Naʻá ku ongoʻi ʻoku totonu ke mau ʻaukai fakafāmili, ke mau ofi ange ai ki he Tamai Hēvaní. Naʻe loto ki ai ʻa ʻĒlone, pea ʻi he pongipongi hono hokó naʻe talamai ʻe Siaosi kiate au, “Mami, te u ʻaukai mo au he ʻahó ni.” Naʻe hoko ia ko ha momeniti fakafiefia taʻe-hano-tatau.
ʻOku pehē ʻe Iesimini, “Naʻá ku ongoʻi ʻoku totonu ke mau ʻaukai fakafāmili, ke mau ofi ange ai ki he Tamai Hēvaní, ʻi heʻemau kamata teuteu ke ō ki he Temipale Metuliti Sipeiní. Naʻe talamai ʻe Siaosi kiate au, ‘Mami, te u ʻaukai mo au he ʻahó ni.’ Naʻe hoko ia ko ha momeniti fakafiefia taʻe-hano-tatau.”
Talu mei heʻemau ō ki he temipalé, mo e fakalakalaka lahi ʻaupito ʻa Siaosi. ʻOku faingofua ange ʻene taimi-tēpilé. ʻOkú ne teuteu hono valá ʻi he ʻaho Tokonakí koeʻuhí ke mateuteu ke ne tufa ʻa e sākalamēnití ʻi he Sāpaté. Kuó ne toe fakalakalaka lahi fakaʻatamai foki.
Ko e ʻaho ní ʻoku mau tokonaki pē maʻa ʻemau ngaahi fiemaʻú, mo tokoniʻi ʻe ha Tamai Hēvani ʻofa. Kuo fokotuʻu hake kimautolu ʻe Sīsū Kalaisi mei he efuefú (vakai, ʻĪsaia 61:3). ʻI hono totongi ʻo ʻemau vahehongofulú, kuo mau maʻu ai ha ngaahi tāpuaki lahi. ʻOku mau piki ki he vaʻa ukameá (vakai, 1 Nīfai 8:24, 30; 11:25; 15:23) mo e ʻilo pau ʻoku mau laka atu ki muʻa ki ha kahaʻu lelei ange.