“Ko ha Lotu ʻi Hoku Lotó,” Liahona, Sānuali 2026.
Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko ha Lotu ʻi Hoku Lotó
Kuo fakahoko ʻe he faleʻi fakaʻaho ʻeku faʻeé fekauʻaki mo e lotú ha liliu lahi ʻi heʻeku moʻuí.
Tā fakatātā ʻa Allen Garns
Ko e taimi naʻá ku ako ai ʻi he lautohi puleʻangá, naʻe ʻomi maʻu pē ʻe heʻeku faʻeé ʻeku meʻatokoni hoʻataá, ʻuma ki hoku laʻé, mo pehē mai, “Fai hoʻo lelei tahá he ʻahó ni, pea manatuʻi ke tauhi maʻu pē ha lotu ʻi ho lotó.” Naʻá ne lea ʻaki ʻa e meʻa tatau ʻi he pongipongi kotoa pē, ʻo aʻu pē ki he ako māʻolungá.
Ko hono moʻoní, ko e “tauhi ha lotu ʻi ho lotó” ko e meʻa fakamuimuitaha ia naʻá ne talamai kiate au ʻi he taimi naʻá ku heka ai he vakapuná ke mavahe ki heʻeku ngāue fakafaifekau taʻu ʻe ua ʻi Folōlitá. Naʻe fakaʻau ke u anga he fanongo ki he fakalea ko iá naʻe ʻikai ai ke u fakakaukau fakamātoato ki ai ʻi heʻeku tupu haké. Naʻá ku fakakaukau ko ha meʻa pē ia ʻoku faʻa lea ʻaki ʻe hono toʻu tangatá, hangē ko e “Fakatauanga te ke maʻu ha ʻaho lelei.”
ʻI heʻeku hoko ko e faifekau taimi kakató, naʻá ku ako ke lea faka-Sipeini he lolotonga ʻeku ngāue ʻi Maiami, Folōlita, USA. Naʻá ku ʻiloʻi ai naʻe tatau pē homau ngaahi kaungāmeʻa foʻoú, ko hanau tokolahi mei Kiupa mo Pueto Liko, mo ʻeku fineʻeikí. Ko e fāmili kotoa pē naʻa mau ʻaʻahi ki aí naʻa nau pōpoaki māvae mai ʻaki ha fakaʻānaua loto-ʻofa naʻe meimei tatau: “Vaya con Dios” (Mo ō mo e ʻOtuá).
ʻI he faifai pea mahino kiate au ʻa e ʻuhinga ʻa ʻeku fineʻeikí, naʻá ku kamata leva ke kumi ha ngaahi founga ke tauhi moʻoni ai ha lotu ʻi hoku lotó. ʻI heʻeku fai iá, naʻe tupulaki leva ʻeku fakahoungaʻi e Tamai Hēvaní mo Hono ʻAlo ko Sīsū Kalaisí. Naʻá ku aʻusia ha kātaki lahi ange ʻi he ngaahi taimi ʻo e ʻahiʻahí mo e faingataʻá. Naʻá ku ongoʻi ha ʻofa lahi ange ki heʻeku ongomātuʻá mo ha houngaʻia ʻi he ngaahi feilaulau naʻá na fai maʻakú.
ʻI ha ʻaho ʻe taha naʻá ku laukonga ai fekauʻaki mo e ʻaʻahi ʻa e Fakamoʻuí ki he kakai Nīfaí, ʻi he hili ʻo ʻEne Toetuʻú. ʻI he ʻaho hono ua ʻo ʻEne ʻaʻahí, “naʻá ne fekau ki heʻene kau ākongá ke nau lotu.” Lolotonga ʻenau lotú, naʻe lotu foki mo e Fakamoʻuí, ʻo Ne folofola ʻaki ha ngaahi lea “maʻongoʻonga mo … fakaofo.” Hili ʻEne fai iá, naʻá Ne fekau ki he kakaí “ke ʻoua ʻe tuku ʻa ʻenau lotu ʻi honau lotó” (3 Nīfai 19:17, 34; 20:1).
Ko ha founga ʻe taha ke fai ai iá ko haʻate fakakaukau ki he lotú ʻo hangē ko ha ʻesiaʻi tā ʻokú ne ʻātakaiʻi ʻetau ngaahi ngāue fakaʻahó. ʻOku tokoni ʻa e ʻesia ko ia ʻo e lotú, fakataha mo e ʻofá mo e loto-houngaʻiá ke tau tokanga ki he Fakamoʻuí mo tauhi ʻetau ngaahi fuakavá.
ʻOku ou houngaʻia ʻi he faleʻi fakaʻaho ʻa siʻeku fineʻeikí ke “ʻoua [naʻa] tuku ʻa e lotu” ʻaki hoku lotó. Kuó ne fai ha liliu lahi ʻi heʻeku moʻuí.