ʻE Tataki Au ʻe he ʻEikí

Tā fakatātā ʻa Allen Garns

Naʻá ku tupu hake ʻi ha ʻātakai ʻo e hivá mo e mūsiká. Ko ʻeku fakaʻānaua ʻi heʻeku kei siʻí ke u hoko ko ha tokotaha hiva fakapalōfesinale. Naʻe aʻu ʻo u ikunaʻi ha ngaahi feʻauhi hiva lahi. Ka naʻe ʻi ai ha taimi ʻe niʻihi ʻi heʻeku moʻuí, naʻá ku ongoʻi taʻeʻaonga ai ʻi heʻeku fakakaukau ki he taumuʻa ʻa e ʻOtuá maʻakú, ʻo ʻikai ha fakalāngilangi mo e fakahīkihiki mei he niʻihi kehé.

ʻI he fakautuutu ke kaunga ʻa e ongoongolelei ʻo Sīsū Kalaisí ki heʻeku moʻuí, kuo faitokonia ai au ke u maʻu e tuí ʻi he ngaahi taimi ʻo e taʻepaú. Kuó ne toe tokoni foki ke mahino kiate au ʻoku finangalo ʻa e Tamai Hēvaní ke u fakaʻaongaʻi ʻa e talēniti naʻá Ne foaki maí ke u ofi ange ai kiate Ia mo fakalāngilangiʻi Ia.

Neongo naʻá ku tukuange ʻeku fakaʻānauá, ka naʻá ku ongoʻi ʻoku totonu ke hokohoko atu ʻeku hivá mo e ako ki he mūsiká.

ʻI hoku taʻu 25, kuó u ʻosiki ʻeku ako langa falé pea ʻosi foki mo ʻeku ako ʻi he BYU–Pathway Worldwide mo e ʻUnivēsiti Pilikihami ʻIongi–ʻAitahoó, ʻa ia naʻá ne tokoniʻi au ke fakaleleiʻi ʻeku malava ke lea faka-Pilitāniá.

Naʻe hoko leva ha meʻa fakaofo.

Naʻá ku maʻu ha fakaafe ke u hoko ko ha faifekau he mūsiká, ko ha konga ʻo e Polokalama Kau Mai Fakaemāmani Lahi ʻa e Kuaea Tāpanekalé. Naʻe ʻikai ke u fakatokangaʻi, ka ko e meʻa kotoa pē kuó u fai ʻi ha ngaahi taʻu lahí kuó ne teuteuʻi au ki he momeniti ko ʻení. Naʻe hoko e fakaafé ko ha tali ia ki heʻeku ngaahi lotú mo e fakaʻānauá. ʻOku ʻafioʻi ʻe he Tamai Hēvaní ʻa e ngataʻangá mei he kamataʻangá pea fakaʻatā ke u hiva mo e Kuaea Tāpanekalé ʻi he Temipale Sikueá lolotonga e konifelenisi lahi ʻo ʻOkatopa 2024.

Te u lava ʻo fakamoʻoniʻi, ʻi he meʻa ko ʻeni kuó u aʻusiá, ʻa e mālohi ʻo hono tataki ʻe he Laumālie Māʻoniʻoní, faʻa-kātakí, mo e falala ʻoku ʻi ai e taumuʻa ʻa e ʻOtuá, neongo he ʻikai mahino kiate kitautolu ʻa e taumuʻa ko iá. Hangē ko ia kuo talaʻofa mai kiate kitautolú, “Mahalo he ʻikai te ke ʻilo maʻu pē ʻa e meʻa ke fai ʻi he kahaʻú, ka te tau lava ʻo muimui ʻi he Fakamoʻuí ʻi he tui ʻe fakaiku lelei mo ikuna ʻetau fonongá koeʻuhí he te Ne tataki malu kitautolu ki he feituʻu ʻoku fiemaʻu ke tau ʻi aí.”

Kiate kinautolu ʻoku nau fekumi honau hala ke laka atu ki muʻá, ʻiloʻi kuo teuteu ʻe he ʻEikí ha meʻa maʻau ʻoku maʻongoʻonga ange ʻi he meʻa te ke ala mafakakaukauá. Kapau te tau muimui kiate Ia, te tau maʻu ʻa e meʻa kuó Ne teuteu maʻatautolú. Mahalo he ʻikai mahino ʻa e halá, pea ʻe ala faingataʻa mo e moʻuí, ka ʻoku kei fakahoko pē ʻe he ʻEikí ha ngaahi mana maʻa ʻEne fānaú.

Kuó u toki ʻilo ʻe tataki au ʻe heʻEikí ʻo fakafou ʻi he tuí, talangofuá, faʻa kātakí, mo e lotú.