Ko e Taimi ʻOku Liliu ai ʻe he ʻOtuá ʻa e Mamahí ki he Fiefiá

Ko hoku hingoá ko Le Veni Ngoni ʻIolani pea ko ʻeku haʻú mei Niu Kaletōnia. ʻOku ou taʻu 14, pea ko au ʻoku lahi taha ʻi hoku fāmilí. ʻOku ʻi ai hoku tehina, pea ʻi ai hoku kiʻi tuofefine kuó ne mālōlō ʻi hono taʻu taha mo e kongá mei haʻane puke lahi.

Kimuʻa pea fāʻeleʻi mai hoku tufofefiné, naʻe talamai ʻe he toketaá kiate kimautolu ʻoku ʻikai ke tonu ʻa e faʻunga hono mafú pea te ne mālōlō pē hili ha ngaahi houa siʻi mei hono fāʻeleʻí. ʻI hono maʻu ʻa e ongoongo ko ʻení, naʻe tūʻulutui leva hoku fāmilí ʻo fai ha lotu, ʻo kole ki he ʻEikí ke Ne toe kiʻi fakalōloa atu ʻa e moʻui hoku tuofefiné. Naʻa mau fai ʻa e kole tatau ʻi he pō kotoa pē.

ʻI he ʻaho 13 ʻo Fēpueli 2019, naʻe fāʻeleʻi ai ʻe heʻeku faʻeé ʻa hoku kiʻi tuofefiné. Naʻe hili atu ha ngaahi houa naʻá ne kei moʻui pē. Naʻe ʻosi atu ha ngaahi ʻaho mo ha ngaahi uike, ʻokú ne kei moʻui pē. Naʻe ʻikai ke lava ʻa e kau toketaá ʻo fakamatalaʻi ʻa e mana ko ʻení.

Naʻe lahi ʻa e fiefia homau fāmilí mei he moʻui ʻa hoku kiʻi tuofefiné ʻi he foʻi māhina ʻe 18. Naʻa mau fakamahuʻingaʻi ʻa e ʻaho kotoa pē naʻa mau feohi aí.

Pea ʻi he ʻaho 28 ʻo ʻAokosi 2020, naʻe mālōlō ai hoku kiʻi tuofefiné. Naʻá ku fuʻu loto mamahi moʻoni—naʻe fuʻu ongo moʻoni ki hoku lotó, pea ʻikai ke u fie tali ʻe au ʻene mālōloó. Naʻe ʻikai ke u loto ke ʻiloʻi ʻe ha taha ʻeku faingataʻaʻiá, pe loto ke talanoa ki he meʻa ʻoku ou ongoʻí.

Naʻe kiʻi fuofuoloa pea toki mahino kiate au, ka naʻe toki kamata māmālie ʻeku ʻiloʻi naʻe ʻosi tali pē ʻe he ʻEikí ʻemau lotú. Naʻá Ne tuku mai kiate kimautolu ha māhina mahuʻinga ʻe 18—ʻo lahi ange ia ʻi he taimi naʻe talamai ʻe he kau toketaá. Pea naʻe hoko mai ha meʻa toe fakaofo ange ai.

ʻI he ʻaho 28 ʻo ʻAokosi, 2022—hili pē ia ha taʻu ʻe ua mei he mālōlō hoku tuofefiné—naʻe papitaiso ʻeku tamaí. Naʻá ku fuʻu fiefia ʻi he fili naʻá ne faí hili haʻane hoko ko ha kaungāmeʻa ʻo e Siasí ʻi ha taʻu ʻe 15. Naʻe ongo ki hono lotó ʻa e mana naʻá ne sio tonu naʻe hoko ki hoku tuofefiné. Naʻá ne liliu ʻa e ʻaho fakamamahi ko ʻení—ʻaho 28 ʻo ʻAokosí—ko ha ʻaho fakafiefia ia ki homau fāmilí.

ʻOku teuteu atu ʻi he ʻahó ni ʻa ʻeku ongomātuʻá, ko hoku tehiná, mo au ke mau hū ki he fale ʻo e ʻEikí ke mau lava ʻo sila ai ki hoku kiʻi tuofefiné pea hoko ko ha fāmili taʻengata. ʻOku mahino kiate au ʻi he taimí ni ʻoku ʻikai ko e ngataʻangá ʻa e mālōlō hoku tuofefiné—ka ko e kamataʻanga ia ʻo ha fononga ʻa hoku fāmilí ki ʻitānití.

ʻOku ou ʻiloʻi ʻoku moʻui ʻa e ʻOtuá, pea ʻe lava ke fakamālohia kotoa kitautolu lolotonga ʻa e ngaahi ʻahiʻahi mo e faingataʻa ʻoku tau fehangahangai mo iá ʻo fakafou ʻi Hono ʻAlo ko Sīsū Kalaisí.

ʻOku ou faʻa fai ʻa e meʻa kotoa pē ʻia Kalaisi ʻokú ne fakamālohia au (Filipai 4:13).