ʻOku ʻIkai Ke u Fiemaʻu ha Toe Meʻa Kehe

Tā fakatātaaʻi ʻe Caitlin Droubay

ʻI Tīsema ʻi he kei taʻu hiva ʻeku faʻeé, naʻe mavahe ʻa e mali ua ʻo ʻene faʻeé mei he fāmilí ke kumi ngāue. Naʻá ne tuku ʻeku kui fefiné, ʻeku faʻeé, mo e tuongaʻane siʻisiʻi ʻo ʻeku faʻeé ʻo ʻikai ha paʻanga, ʻikai ha meʻakai, ʻikai ha fuʻu ʻakau Kilisimasi, ʻikai ha ngaahi meʻaʻofa. Naʻe pehē ʻe heʻeku Mamí, “Naʻe ʻikai ke ʻi ai haʻamau meʻa ʻe maʻu.”

Naʻe ʻalu ʻeku faʻeé ʻo luelue ʻi he Efiafi kimuʻa ʻo e Kilisimasi ko iá. Naʻá ne manatu ki heʻene sio atu ʻi he matapā sioʻata ʻo ha ʻapi kaungāʻapi ʻo sio ki ha fānau fiefia mo malimali ʻoku nau takatakaiʻi ha fuʻu ʻakau Kilisimasi, mo ha ngaahi meʻaʻofa mo ha kau mēmipa ʻo e fāmilí naʻe ofi mai pē. Naʻe tangi ʻa Mami ʻi heʻene vahevahe ʻa e manatu ko iá kimuʻa ʻi he Kilisimasí ʻi ha ngaahi taʻu siʻi kimuʻa peá ne mālōloó. Ko e taha ia ʻo e ngaahi Kilisimasi lahi naʻe ʻikai haʻane meʻa ʻe maʻú.

Fakalaka kimuʻa ki he 1969, ʻa ia ko e hili ia ha taʻu ʻe 14 mei he mali ʻeku ongomātuʻá. Naʻa mau nofo ʻi ha kiʻi kolo siʻisiʻi ʻi he feituʻu lotoloto ʻo Kalefōnia, USA. Ko e feituʻu ia naʻe tukituki mai ai ha ongo faifekau taimi kakato ʻi homau matapaá pea ʻomi kiate kimautolu ʻa e ongoongolelei ʻo Sīsū Kalaisi kuo fakafoki maí. Hili ha taʻu ʻe taha mei ai, naʻe silaʻi ʻeku ongomātuʻá ʻi he Temipale ʻOkalani Kalefōniá, pea naʻe silaʻi ai au mo hoku ongo tuongaʻané kiate kinaua.

Ki heʻeku ongomātuʻá, naʻe muimui mai ha ngaahi taʻu lahi ʻo e tuʻunga fakaākongá, kau ai ʻa e fuafatongia ʻi ha ngaahi uiuiʻi lahi ʻi he Siasí, ngāue fakaetauhi ki ha niʻihi kehe tokolahi, fakamālohia ʻena fakamoʻoní ʻi ha misiona ki Folōlita, mo fiefia ʻi he tupulaki hona hakó, mo e fiefia ʻi he ngaahi tāpuaki ʻoku maʻu mei he “fiefia ʻia Sīsū Kalaisí” mo e mēmipasipi ʻi he “siasi ʻo e fiefiá.”

Hili ha taimi nounou mei he mālōlō ʻeku tangataʻeikí ʻi he 2018, naʻe fai ʻe heʻeku faʻeé ha tohi Kilisimasi ki heʻene fānaú, ʻo lisi ai ʻa e ngaahi tāpuaki kuó ne ʻai ʻene moʻuí ke kakato mo koloaʻiá.

Naʻá ne tohi ʻo pehē, “ʻI he taimi ʻoku ou maʻu ai ha ngaahi momeniti lōngonoa, ʻoku haʻu kiate au ha ngaahi fakakaukau mo ha ngaahi manatu melie—ʻa e meʻa kuo tuku mai kiate aú. Naʻe kau ʻi he ngaahi meʻaʻofa naʻá ne maʻú, naʻá ne pehē ko “ha husepāniti taʻengata” mo ha fāmili ʻe lava ke fakataha ʻo taʻengata ʻi he ʻao ʻo e Tamaí mo e ʻAló; ko e ongoongolelei kuo fakafoki maí; kau palōfita mo e kau ʻaposetolo moʻuí; ngaahi folofola ʻo e ngaahi ʻaho kimui ní; ko e meʻafoaki ʻo e Laumālie Māʻoniʻoní; ko ha fakamoʻoni ki he Fakamoʻui ko Sīsū Kalaisí; mo e “taimi makehe ko ʻeni ke fakamanatua ai Hono ʻaloʻí.”

ʻI he kei siʻi ʻeku faʻeé, naʻe ʻikai haʻane meʻa ʻe maʻu. ʻI he taimi naʻá ne mālōlō aí, naʻá ne maʻu ʻa e meʻa kotoa pē naʻe mahuʻingá.

Naʻá ne fakaʻosi ʻaki ʻene pehē, “Ko ʻeku moʻuí ʻa kimoutolu mo e ongoongoleleí. ʻOku ʻikai ke u fiemaʻu ha toe meʻa kehe. ʻOfa ke mou maʻu ha Kilisimasi Fiefia. ʻOfa atu ʻo taʻengata.”