Ngāue Tokoni ʻi he Huafa ʻo Sīsū Kalaisí

Tā fakatātaaʻi ʻe Caitlin Droubay

Naʻe hoko ʻeku kui fefiné ko e tokotaha foaki lelei tahá. Naʻe faʻa fakakaukauʻi mo fakataautaha ʻene ngaahi meʻaʻofá, naʻe kofukofuʻi takitaha ʻaki ha pepa fakaʻofoʻofa pea haʻi ʻaki ha līpine fakaʻofoʻofa ʻaupito. Ko ʻene meʻaʻofa Kilisimasí ʻa e meʻaʻofa naʻe ʻikai ke ke faʻa tatali ke maʻú.

ʻI he konga kimui ʻo e 2016, naʻe puke ʻa Kulenimā ʻi he kanisaá. Ko e fefine ko ʻeni naʻá ne vahevahe ʻa e fiefia lahi ʻi he Kilisimasí, ʻe ʻi falemahaki ia ʻi he ʻaho mālōlō ʻokú ne saiʻia taha aí. ʻI heʻeku fakakaukau kiate iá, naʻá ku fifili pe te u lava fēfē ʻo tokoni ke hoko ʻa e faʻahitaʻu Kilisimasí ko ha faʻahitaʻu fakafiefiá. ʻI heʻeku ʻiloʻi ʻa Kulenimaá, te ne palaniʻi fuoloa pē ʻene ngaahi meʻaʻofa ki he Kilisimasí pea te ne loto-mamahi ʻaupito ka ʻikai fakahoko ia.

Naʻe pehē ʻe Kulenipā ko e meʻa moʻoni ʻeni ʻoku hokó. ʻI heʻeku fie tokoní, naʻe tuku mai ai kiate au ʻa e fatongia ki hono teuteuʻi ʻo e ngaahi meʻaʻofa maʻá e makapuna takitaha ʻe toko 13, honau ngaahi malí, pea mo ha makapuna ua ʻe 27 pe lahi ange. Naʻá ku feinga ke kofu ʻa e meʻaʻofá ʻo hangē pē ko hono kofu ʻe Kulenimaá. Naʻá ku fili fakalelei ʻa e ngaahi kato meʻaʻofá, pepa teuteú, mo e ngaahi silá.

ʻI hono sikeni ha kaati mei ha taʻu kimuʻá, naʻá ku fakakau ʻene pōpoaki fakataʻu naʻe tohinimá: “ʻOfa taʻengata atu, Kulenimā mo Kulenipā.”

Naʻá ku fiemaʻu ke haohaoa ʻa e meʻa kotoa pē—ʻo hangē ko ia naʻá ne mei fakahokó. ʻI he mei vaeua hono faʻo ʻo e ngaahi kató, meʻa ngingilá mo e ʻū kātí, naʻe fanafana mai ʻa e Laumālié, “Ko e founga ʻeni ʻo hono toʻo kiate koe ha hingoa ʻo ha taha. Ko e founga ʻeni ʻo e ngāue ʻi ha hingoa ʻo ha taha kehé.”

ʻI he momeniti fakataautaha moʻoni ko iá, naʻe akoʻi lahi ange ai au fekauʻaki mo e ʻuhinga ke toʻo kiate au ʻa e huafa ʻo Sīsū Kalaisí.

ʻI heʻetau maʻu ʻa e sākalamēnití ʻi he uike takitaha, ʻoku tau fakamoʻoni ai ʻoku tau loto-fiemālie ke toʻo kiate kitautolu ʻa e huafa ʻo Sīsū Kalaisí pea manatu maʻu ai pē kiate Ia (vakai, Molonai 4:3; Tokāteline mo e Ngaahi Fuakava 20:77). ʻOku ou toʻo fakataautaha ange ʻa e fakaafe ko iá ʻi he taimí ni. ʻOku mahino lelei ange kiate au ʻoku kau ʻi he founga ʻa hono toʻo kiate au ʻa e huafa ʻo Kalaisí ʻa e moʻui hangē ko Iá.

Naʻá ku ʻiloʻi ʻa e founga ʻo e foaki ʻa Kulenimaá koeʻuhí he kuo tā tuʻo lahi ʻeku maʻu ʻene ʻofá mo e faʻa fakakaukaú. ʻOku ou ʻiloʻi ʻa e founga ʻoku ʻofa mo foaki ai ʻa e Tamai Hēvaní mo Sīsuú koeʻuhí ʻoku ou fakamoʻoniʻi Hona toʻukupú ʻi heʻeku moʻuí. ʻOku ou maʻu ʻa e ʻaloʻofa ʻa Kalaisí. ʻOku ou fie fakahoko ʻa e meʻa te Ne fakahokó. ʻOku ou fiemaʻu ke tatau ʻa e moʻui ʻoku ou moʻui aí, ngāue tokoni ʻoku ou faí, mo e ʻofa ʻoku ou vahevahé mo ʻEne moʻuí, ngāue tokoní, mo e ʻofá—ke ongoʻi ʻo hangē naʻe haʻu pē ia meiate Iá.