Ko hono Langa ha Fakavaʻé

ʻI he ʻaho 18 ʻo Siulai 2023, naʻe mole meiate au ʻa e tokotaha mahuʻinga taha ʻi heʻeku moʻuí. Naʻe hoko ʻeku faʻeé ko hoku mālohinga, ko hoku fakavaʻe, pea toe hoko pē ko hoku vaivaiʻangá . ʻI he taimi ko iá, naʻe ʻikai ke u toe ʻalu ki he lotú koeʻuhí he naʻá ku ngāue ʻi he ʻaho kotoa pē ʻo aʻu ki he Sāpaté mo e ngaahi ʻaho mālōloó, pea naʻe lotu homau uōtí ʻi he 8:00 a.m. Naʻe feliliuaki holo pē ʻa e taimí . . . ʻo aʻu ki heʻene hoko ko ha foʻi meʻa fakatuʻutāmaki.

ʻI he mole ʻeku faʻeé, naʻe mahino kiate au ʻa e fuʻu siʻisiʻi hoku taimi mo iá. Naʻe kamata ke u fakatomala ʻi he ʻikai ke tuku ʻeku ngāué ka u nofo mo ia ʻi ha taimi lahi ange hili ʻene pā kālava ʻi Māʻasi 2020. Naʻá ne moʻui atu ʻi ha toe taʻu ʻe tolu, ka koeʻuhí naʻá ku faʻa ʻalu maʻu pē ki he ngāué, naʻá ku ongoʻi hangē naʻe ʻikai ke u fuʻu tokanga kiate ia ʻi hono ngaahi mōmeniti fakaʻosí. Naʻe lōmekina au ʻe ha ongoʻi halaia. Naʻá ku fakakaukau ʻoku ou fihia ʻi ha foʻi meʻa pau: ngāue, ngaahi ʻapoinimeni fakafaitoʻo, tokangaʻi ʻeku faʻeé, mohe pea hokohoko atu pē ʻa e meʻa tatau. ʻOku ʻikai ke toe lava ʻo fai ha meʻa kehe.

Ko e taimi ia naʻe mahino kiate au ʻa e foʻi moʻoni: naʻe ʻikai ke feʻunga ʻeku falala ki he ʻOtuá. Naʻe lahi ange ʻeku fakamahuʻingaʻi ʻeku ngaahi fiemaʻu fakatuʻasinó ʻi heʻeku moʻui fakalaumālié.

Ka naʻe hoko ʻa e mālōlō ʻeku faʻaé ke u toe ofi ange ai ki he ʻEikí. Naʻá Ne hoko ko hoku tokoni. Naʻá ku maʻu meiate Ia ʻa e nonga mo e ʻofa naʻá ku fiemaʻu ki he taimi ʻo e loto mamahí. Naʻá ku fakatukupaaʻi au ʻi he 2024 ke u toe kamata maʻulotu sākalamēniti maʻu pē.

ʻI he fakalotolahi hoku pulé, naʻá ku kau atu ki he uooti Puurai ʻi he kamataʻanga ʻo e 2024. Naʻe talitali lelei ai au ʻe ha kāingalotu angaʻofa mo fofonga malimali maʻu pē. Naʻe hoko ia ko hoku feituʻu hūfangaʻanga ʻi he Sāpate kotoa pē. Ko e lahi ange ʻeku ʻalu ki he lotú, ko e lahi ange ia ʻeku ongoʻi ʻa e tupulaki mālohi ange ʻa e ʻofa ʻa ʻetau Tamai Hēvaní. Ko e taimi ia naʻe kamata ai ke u fakakaukau lahi ange ki he ngaahi meʻa ʻoku ou fakamahuʻingaʻi ʻi heʻeku moʻuí.

Ko hono moʻoní ʻoku tau fiemaʻu ha ngāue mo ha paʻanga ke moʻui ai, ka naʻe kamata ke u fuʻu ongoʻi ongosia fakaeloto, fakaesino, mo fakaʻatamai. Ko e taimi ia naʻe fakahā mai ai ʻe heʻeku pīsopé kau kia Sisitā Tararaina Mana, ko ha faiekau ngāue tokoni pea mo ha faiako ki he maʻu ngāué ʻi homau uōtí. Naʻá ne talamai te u lava ʻo feʻiloaki mo ia kapau te u fiemaʻu. Naʻá ku tokanga ki ai ʻi he taimi pē ko iá. Naʻá ku aʻu ki ha tuʻunga ʻo e fuʻu puputuʻu lahi pea ʻikai ke toe ʻiloʻi ʻa e meʻa ke u faí.

ʻI he ʻaho 2 ʻo Sune 2024, naʻe fakahoko ai ʻeku fuofua fakataha ako mo iá. Naʻe makehe ʻaupito ʻa e fuofua fakataha ko iá mei he meʻa naʻá ku ʻamanaki ki aí. Naʻá ku fakakaukau au ʻe hangē ko e fakataukei fakaakó ʻa ia ko hoʻo fili ha ngāue ʻo fakatatau ki ho tuʻunga fakaakó, ka naʻe ʻikai ke pehē ia! Ko e fuofua taimi ʻeni ke ʻeke mai ai ʻe ha taha kiate au ha ngaahi fehuʻi ʻoku fekauʻaki moʻoni mo au. Makehe mei hoku puipuituʻa fakaakó, naʻe nofo taha ʻa e faiakó ʻi heʻeku ngaahi fiemaʻú, mo e ngaahi meʻa ʻoku ou fakaʻamuá—meʻa kotoa pē ʻoku fekauʻaki mo au.

Naʻá ma kamataʻi ha ngaahi foʻi ngāue naʻe ʻikai ke fuʻu mahino kiate au ʻi he kamatá. Naʻá ma kamata ʻaki ʻa e ngaahi “meʻa naʻá ku fifili ki aí.” Fakamālō ki he foʻi ngāue ko iá, naʻe kamata leva ke u fakakaukau lahi ange ki heʻeku ngaahi taumuʻá mo e vīsone ki heʻeku moʻuí. Naʻe lava ke u toe ʻiloʻi ko hai au. Naʻá ku ako ke fakafanongo kiate au, ke u ʻiloʻi au, mo falala kiate au. Naʻá ku fakatokangaʻi hake kuo ngalo ʻiate au hoku tuʻunga totonú. Naʻe lahi ange ʻeku fakamahuʻingaʻi ʻa e ngaahi fiemaʻu fakatuʻasinó mo e ngaahi meʻa ʻoku ʻamanaki mai ki ai ʻa e sosaietí.

ʻOku fakamālohiʻi ʻe he sosaietí ʻa e meʻa ke tau muimui ki aí: ako, fakaʻilonga fakaako, ngāue lelei, fale, kā, pea toki fāmili. Ka ʻoku fuʻu faingataʻa ange ʻa e tuʻunga moʻoni ʻo e moʻuí. Kuo kāsia ʻeku tupulaki fakalaumālié ʻe he manavasiʻí, veiveiuá, mo e loto hohaʻá.

ʻI he ʻaho ní, ʻoku fuʻu faikehekehe lahi ʻaupito ʻa e tuʻunga naʻá ku ʻi aí pea mo hoku tuʻunga ʻi he taimi ní. Mei Sepitema 2024 ki ʻEpeleli 2025, naʻá ku fai ha fanga kiʻi ngāue iiki ke maʻu ai ʻeku ngaahi fakamole angamahení pea hanga ʻe he akó ʻo fakalotolahiʻi au mo akoʻi mai ke mapuleʻi au. Naʻá ku loto ke fokotuʻu haku ngaahi faingamālie fakapalōfesinale, ko ia ai naʻá ku lesisita ki ha ngaahi sivi kehekehe ʻe tolu: ko e leʻo ʻi he pilīsoné, fakaʻilonga fakaako fakapalōfesinale ʻi he taki mamatá, pea mo e polokalama ako ʻa e SEFI (ko ha kautaha kumi ngāue fakalotofonua).

Fakamālō ki heʻeku tui ki he ʻOtuá, ko ʻeku matuʻuakí, mo e ngaahi fakataha fakaakó, ʻoku ou maʻu ai ʻi he taimí ni ha fakaʻilonga fakaako fakapalōfesinale ʻi he taki mamatá. Naʻá ku lava ʻi he sivi ki he fatongia ko e leʻo ʻi he pilīsoné pea ʻoku ou lolotonga hū ʻi he taimí ni ʻi he ako ki he “Business Creator and Manager [Fokotuʻu mo Puleʻi ha Pisinisi]”, ko ha polokalama ako hokohoko ʻi ha māhina ʻe tolu. ʻOku lahi ha ngaahi faingamālie ʻoku ou maʻu ʻi he taimi ní!

ʻI he tūkunga fakatāutahá, ʻoku ou lolotonga fakakaukau ki hano kumi haku hoa taʻengata, ko ha taha ke ma faʻu ha fāmili taʻengata. ʻOku hoko hono ʻai ʻa Kalaisi ko e uho ʻeku moʻuí ko ha foʻi fili ʻoku mahino mo fakanatula.

Kuo ʻi ai ha fuʻu ivi mālohi ʻo e tokotaha faiakó ʻi heʻeku moʻuí. Kapau naʻe ʻikai ʻa e ngaahi kalasi hokohoko ko iá, naʻá ku kei puputuʻu pē—kei maʻu pē ʻe he manavasiʻí, veiveiuá, mo ʻikai falala kiate au. ʻI he ʻahó ni, ʻoku ou ʻiloʻi ʻa e meʻa ʻoku ou fiemaʻú. ʻOku ou mateuteu ke laka atu ki muʻa. Pea te u lava ʻo pehē ʻoku ou fiefia ʻiate au pea mo e hala naʻá ku fonongaʻiá, neongo naʻe mohu faingataʻa.

ʻI he tuʻu tafaʻaki ʻa e ʻEikí mo ha kakai tataki fakalaumālie ʻo hangē ko ʻeku faiakó, ʻoku ou ʻiloʻi ʻa e feituʻu ʻoku ou taumuʻa ki aí. ʻOku ʻikai ke u faʻa tatali ki he ngāue totonu ke u fakahokó koeʻuhí kae lava ke u tokoni mo fakamālō kiate kinautolu naʻa nau tokoniʻi au ʻi he taimi naʻá ku fuʻu fakaʻofa aí. Naʻe fuʻu mahuʻinga ʻaupito ia kiate au.