Ko e Ngāue Fakafaifekau Taimi Nounou (Mini Mission) ʻi he Fakaʻosinga ʻo e Uiké Naʻá Ne Liliu ʻa e Meʻa Kotoa Pē

Naʻe ʻikai ke u fie ʻalu.

Naʻe mahinongofua pehē. Naʻá ku taʻu 16, pea naʻe talanoa ʻa e taha kotoa fekauʻaki mo e “ngāue fakafaifekau taimi nounou ʻi he fakaʻosinga ʻo e uiké” naʻe fakalele ʻe homau siteikí. Naʻe ʻikai mahino kiate au hono taumuʻá. Naʻe ʻikai ke u palani ke ngāue fakafaifekau, ʻo ʻikai ʻi he taimi ko iá, pe ha toe taimi pē.

Naʻe fuʻu fiemaʻu ʻe heʻeku fineʻeikí ke u ʻalu. Naʻe poupouʻi au ʻe heʻeku kau takí. Naʻa nau talamai, “Ko e fakaʻosinga pē ʻo e uiké Talia!” Kae naʻa mo ia, naʻe ʻikai ke ne fakalotoʻi au. Naʻá ku tangi ʻi he pō kimuʻá. Naʻá ku pehē ange, “Ko e hā ʻoku ou fai ai ʻeni kiate aú?”

Naʻá ku ʻio ange pē ʻi he ʻikai ke u fie fakatupu lotomamahi ki he kakaí. Ka ʻi hoku lotó, naʻá ku ʻosi lau lau houa pē kae ʻoua kuo fai mo ʻosi.

ʻI he kamataʻangá, naʻe ʻikai fuʻu kovi fēfē. Naʻa mau fakahoko ha ngaahi ako, akoako ʻa e faiakó, pea mau hoa mo ha kau faifekau ki he ngaahi fakatahaʻanga akó. ʻOku ou manatuʻi ʻeku fakakaukau, “Sai, te u lava pē ʻo ikuʻi eni.” Ka naʻe teʻeki ke tō mamafa ia kiate au. Naʻá ku pehē loto pē, “Ko e ʻuhinga pē ʻeku ʻi hení ke ʻoua toe hohaʻa mai ʻa e kakaí kiate au.”

Pea hoko mai ʻa e ʻaho hono uá.

Ko hoku hoá ko Sisitā Fale. Naʻá ma ʻalu ki he loto koló—ʻo ʻalu holo ʻi he Holo Tauʻanga Lēlue ʻi Koló—ke fetuʻutaki mo ha kakai ʻi he halá. Naʻá ku muimui ki heʻene tatakí ʻi heʻene tuʻu ʻo talanoa ki ha talavou fekauʻaki mo e palani ʻo e fakamoʻuí. Naʻá ku tuʻu pē hono tafaʻakí, fakamāmā mo fakalongolongo, ʻo fakakaukau, “Ko e meʻa eni ia ʻoku manako ki aí, ka ʻoku ʻikai ke u pehē au.”

Ka naʻe liliu ha meʻa.

Lolotonga pē ʻene talanoá, naʻá ne hanga mai kiate au ʻo kamo mai, ʻo hangē ko e taimi ʻeni ʻoʻokú. Naʻe fakaava hoku ngutú … peá u lea ʻaki ʻe au ʻeku fakamoʻoní! Naʻe ʻikai ke u toe fakakaukau au ki he meʻa naʻá ku lea ʻakí. Naʻá ku lea pē.

Pea naʻe mālohi fau ʻa e Laumālié.

Naʻe ongo kiate au ʻa e momeniti ko iá. Naʻá ku taʻu 16, ʻo tuʻu ʻi he lotolotonga ʻo ha hala femoʻuekina, ʻo talanoa ki ha sola fekauʻaki mo Sīsū Kalaisi, pea ko ha fuofua taimi ia ʻi ha vahaʻataimi lōloa, naʻá ku ongoʻi naʻá ku ʻi he feituʻu tonu pē naʻe fiemaʻu ke u ʻi aí.

Naʻe ʻikai mole atu ʻa e ongo ko iá. Naʻe nofoʻia ia ʻiate au ʻi he kotoa ʻo e fakaʻosinga ʻo e uiké. Ko e momeniti akoʻi kotoa pē, lotu fakakulupu kotoa pē, fepōtalanoaʻaki kotoa pē mo e kakai naʻe ʻikai ke u ʻiloʻí—naʻá ku ongoʻi naʻe ʻi ai ha meʻa ʻi loto ʻiate au naʻe fakaake.

… Naʻá ku foki ki ʻapi ʻi he fakaʻosinga ʻo e uike ko iá kuó u liliu.

Naʻe ʻikai ke u talaange leva ki he taha kotoa ʻi he taimi pē ko iá, ka ʻi hoku lotó, naʻá ku ʻiloʻi ia. Naʻe kamata leva ke u ʻalu mo e kau sisitā taimi kakató ʻi he uike kotoa pē. Naʻá ku toe fie ongoʻi ʻa e Laumālie ko iá—ʻa e ongoʻi ʻoku ʻi ai ʻa e taumuʻá. Naʻe faifai pē peá u kamata ngāue ki heʻeku foomu faifekaú.

Ko e taimi ní, ʻoku ou taʻu 19, pea te u 20 ʻi he taʻú ni. ʻOku ou ako ki he Pule Polōseki ʻi he Langa Falé ʻi he UTS peá u ngāue ko ha fakafofonga taautaha ʻi hoku uōtí. Naʻá ku kau atu foki ki he Konifelenisi ʻa e Feohiʻanga ʻAositelēlia ki he Ako ʻo e Pasifikí ʻi he 2025, pea ʻoku ou ako ʻa e founga ke fakakau atu ai ʻeku tuí ki he ngāue maʻuʻanga moʻuí mo e anga fakafonuá, mo fakaʻamu ke tokoni ki hono vahevahe lahi ange ʻo ʻEne ongoongoleleí.

ʻOku teʻeki ai ke u ʻalu ʻo ngāue fakafaifekau—ka te u ʻalu. ʻOku kei fakailifia pē ʻa e fili ko iá, ka ʻoku toe toputapu foki ia. Pea ʻi he ʻaho kotoa pē, ʻoku tupulaki mālohi ange ʻeku fakamoʻoní.

Ko e taimi naʻe mahino taha aí—ʻa e ʻuhinga kiate au ʻo e ngāue fakafaifekau taimi nounoú—ʻa e taimi naʻá ku ʻi ʻapi toko taha ai ʻo tohi ʻeku tohinoá. Naʻe kamata ke u tangi. Naʻá ku ongoʻi mālohi ʻaupito ʻa e Laumālié. Ko e taimi ia naʻá ku fakatokangaʻi ai ko e ngaahi fakahā kuó u maʻú naʻe moʻoni ia. Kuó Ne folofola mai kiate au. Pea naʻá ku fanongo.

ʻOku ou ʻiloʻi ko e meʻa kotoa pē kuó u lava ʻo faí—lavameʻa kotoa pē, mo e laka ki muʻa kotoa pē—naʻe tuʻunga ia ʻi Heʻene ʻaloʻofá mo ʻEne ʻofá. ʻOku ou fakaʻamu te u lava ʻo hoko ko ha pou maama ʻo e ʻamanaki leleí ki he niʻihi kehé, koeʻuhí he kuó Ne tokoniʻi ʻeku moʻuí. Pea ko e ʻuhinga ia, ʻo laka ange ʻi ha toe meʻa, ʻoku ou fie ʻalu ai ʻo ngāué.