Ko Hono Tokonaki mei Langi ʻa e Iká

Ko hoku hingoá ko Petelu Mamoe (ʻEletā Pilita), pea ʻoku ou fie vahevahe ha talanoa naʻá ne akonekina au ki he founga ʻoku tali ai ʻe he Tamai Hēvaní ʻa e ngaahi lotú—ʻo ʻikai maʻatautolu pē, kae fakafou ʻiate kitautolu.

ʻI he ʻaho ʻe taha, naʻe meimei ʻosi ʻemau tukuʻanga meʻakaí. Naʻe ʻi ai haʻamau laise, kae ʻikai ha toe meʻa kehe. Naʻá ku tūʻulutui ʻo lotu mo kole ki he Tamai Hēvaní ke tokonaki mai ʻemau ngaahi fiemaʻú. Naʻá ku kole fakapatonu ke maʻu ha ika—ko ha meʻa faingofua ka ko ha tānaki fakafiu ki heʻemau houa kaí. Naʻá ku falala te Ne tokonaki mai, ka naʻe ʻikai ke u ʻiloʻi pe te Ne fakahoko fēfē ia.

Kimui ange ʻi he ʻaho ko iá, naʻá ku tangutu ʻi tuʻa homau ʻapí, pea lue hake ha tangata mo ha tangai fonu ʻi he iká. Naʻe kei fufulu peleti hoku hoá ofi ki he ʻaá ʻi he fakafokifā pē, kuo mahae ʻa e tangaí pea ngangana hifo ʻa e iká ki he kelekelé. Naʻe mahino pē ʻa e faingataʻaʻia ʻa e motuʻá, ka naʻe vave pē hono ʻoatu ʻe hoku uaifí ha tangai foʻoú. Naʻá ne houngaʻia ʻi heʻene angaʻofá, naʻá ne tuku ke tokangaʻi ʻe [hoku uaifí] ʻa e iká ka ne ʻalu ʻo kumi hono ngaahi tokouá ke tokoni.

ʻI he foki mai ʻa e tangatá, naʻá ne foaki ange ki hoku uaifí ha mataʻiika lalahi ʻe ua ke fakahaaʻi ʻene houngaʻiá. Naʻe hulu fau ʻema fiefia! Naʻe ʻikai ngata pē ʻi he maʻu ha ika ki heʻemau houa kaí, ka naʻe feʻunga ia ke vahevahe. Naʻá ku ongoʻi naʻe ueʻi au ke ʻave ha konga ʻo e iká ki ha kaungāmeʻa naʻe ʻikai haʻane ngāue maʻuʻanga moʻui pea faingataʻaʻia ke tokonaki maʻa hono fāmilí. ʻI heʻeku aʻu atu ki hono ʻapí, naʻá ku ʻilo ai naʻe ʻi he falemahakí hono uaifí mo ʻena tamá, pea kuó ne lotua ha founga ke maʻu ai ha meʻatokoni.

Naʻe loʻimataʻia hoku kaungāmeʻá ʻi heʻene tali ʻa e iká. Naʻá ne talamai kuo ʻosi teuteuʻi ʻe hono uaifí ʻa e mei ki heʻenau houa kaí, ka ko ʻeni te nau kai ika foki. Naʻá ku toki ʻilo kimui ange naʻe vahevahe ʻe hono uaifí ʻa e konga ʻo e iká mo ha uitou mo haʻane fānau ʻe toko ua naʻá na puke ʻi he falemahakí. Naʻe lotua ʻe he uitoú ni ha meʻakai, pea naʻe tali ʻe he ʻOtuá ʻene lotú ʻo fakafou ʻi he angaʻofa ʻa e niʻihi kehé.

ʻI heʻeku fakakaukau atu ki he hokohoko ʻo e ngaahi meʻa ko ʻení, naʻá ku ongoʻi ʻa e lahi ʻo e ʻofa ʻa e Tamai Hēvaní. Naʻe ʻikai ngata pē ʻi Heʻene tali ʻeku lotu ki ha iká, ka naʻe toe fakafou foki ʻiate au ʻa e tali ʻo e lotu ʻa hoku kaungāmeʻá mo e uitoú. Ko ha fakamanatu mālohi ia ʻoku faʻa ngāue ʻa e ʻOtuá ʻo fakafou ʻiate kitautolu ke tāpuekina ʻa e niʻihi kehé. ʻI he folofola ʻa e Fakamoʻuí, “He ko ia ia kuo tuku ki ai ʻa e meʻa lahí, ʻe ʻamanaki lahi ʻiate ia” (Luke 12:48).

Naʻe akoʻi au ʻe he aʻusiá ni ʻoku ʻikai fakangatangata ʻa e ʻofa ʻa e ʻOtuá ki heʻetau ngaahi fiemaʻu fakafoʻituituí. ʻOkú Ne ʻafioʻi kakato ʻa e meʻa kotoa mo fakaʻaongaʻi kitautolu ko ha ngaahi meʻangāue ʻi Hono toʻukupú ke tāpuekina ʻEne fānaú. Talu mei he ʻaho ko iá mo ʻeku anga ʻaki ʻa e lotu ʻo ʻikai ki heʻeku ngaahi fiemaʻú pē, ka ki he ngaahi fiemaʻu foki ʻanautolu ʻoku mau feohí. Kuó u mātā hono ngāue ʻaki ʻe he ʻOtuá ha lotu faingofua—hangē ko ʻeku kole iká—ʻo liliu ia ki ha mana ke aʻu atu ki ha ngaahi moʻui lahi ange.

ʻOku ou fakamoʻoni ʻoku ʻafioʻi ʻe he Tamai Hēvaní mo Sīsū Kalaisi ʻetau ngaahi faingataʻaʻiá mo ʻetau ngaahi fiemaʻú. ʻOkú Na fanongo ki heʻetau ngaahi lotú, pea ʻokú Na tali kinautolu ʻi ha ngaahi founga ʻoku fakamālohia ai ʻetau tuí mo tāpuekina ai ʻa e niʻihi kehé. Fakatauange te tau ngāue maʻu pē ʻo fakatatau ki he ngaahi ueʻi fakalaumālie ʻoku tau maʻú, ʻo ʻilo te tau lava ʻo hoko ko ha ngaahi meʻangāue ʻi he toʻukupu ʻo e ʻOtuá ke vahevahe ʻEne ʻofá mo e tokonakí mo kinautolu ʻoku tau feohí.

ʻOku lolotonga ngāue ʻa ʻEletā mo Sisitā Pilita ko ha ongo faifekau matuʻotuʻa ʻi he Kolo Napeiná, Talauā Napeina Noate, Talauā, Motu ko Kilipatí.