Ongoʻi Fiemālie mo ʻOfaʻi

Ko e hā ha meʻa te u tokoni atu ai?” Naʻe ʻeke ange ʻe Miseli. Naʻe hoko ʻa Miseli ko ʻeku fefine ngāue fakaetauhí pea ko e taha ia hoku ngaahi kaungāmeʻa mamaé. Naʻá ku fakakaukau maʻu pē ki he fehuʻi ʻa Miselí, pea ú ongoʻi hohaʻa ʻi he ʻikai ke u lava ʻo fai ange ha tali hangatonú.

Naʻe hoko ha ngaahi tūkunga fakamamahi ʻaupito kimuí ni ʻo ne fakamamahiʻi ai hoku kāingá, pea ne u ʻiloʻi naʻá ku fiemaʻu ha tokoni. Ka neongo ia, naʻe ʻikai ke u loto ke u hā ngali vaivai ke kole tokoni kia Miselí.

ʻOku ou faʻa fakafehoanaki au ki he niʻihi kehe ʻo hangē ko e kau paionia he Siasí ʻa ia naʻa nau feilaulauʻi e meʻa kotoa pē ko ʻenau tuí pe ko e kaungāmeʻa ko ia ʻi he Facebook ʻoku hangē ʻoku ngali lelei ʻa e meʻa kotoa peé. Naʻá ku ʻiloʻi naʻe ʻikai tonu e ngaahi fakafehoanaki ko ʻení. Ka naʻe hokohoko atu pē ʻeku fakamavaheʻi au mei he niʻihi kehé hili ko iá naʻe mei lava ʻe ha fakafiemālie ʻa ha mēmipa tangata pe fefine ʻi he uōtí ʻo fai ha meʻa makehe ʻi he tūkunga ʻoku hokó.

Kuo laui taʻu ʻeku fakahangahangakehe pē mei he ngaahi kaungāmeʻa leleí ʻaki ha ngaahi kupuʻi lea kehekehe “ʻOku ou sai pē.” Ko hono moʻoní, naʻá ku loto-foʻi ke maʻu mo e tali tatau meiate kinautolu ne u tokoniʻí. Kuo tuʻo fiha nai ʻeku fakamamaʻo koeʻuhi ko ʻeku loto-hīkisiá mei he kakai kuo fekauʻi mai ʻe he ʻOtuá ko ha ngaahi tali ki heʻeku lotú? Ka neongo ia, naʻe fakakounaʻi au ʻe hoku ngaahi tūkunga kimuí ni maí ke taʻofi ʻeku loto-hīkisiá kae fai ha kole tokoni.

ʻI he kamataʻangá, naʻe ʻikai ke u ʻilo pe ko e hā e meʻa te u lea ʻakí ʻi heʻeku tā kia Miselí, ka ʻi heʻeku huaʻi atu ʻeku ongoʻi loto-mamahí mo e ongoʻi liʻekiná, naʻá ma tangi fakataha mo ne fanongo mai kiate au. Naʻá ku talaange ʻoku ou loto pē ke ʻomi ʻe ha taha ha kiʻi meʻakai maʻamaʻa, fakakafuʻi ʻaki au ha sipi kafu, pea fakamohe au ʻaki ʻa e ongoʻi fakapapau ʻe LELEI ʻa e meʻa kotoa pē.

Naʻe talamai ʻe Miseli naʻá ne lotua ke ne ʻiloʻi e founga ke fakafiemālieʻi ai aú ka naʻe ʻikai ke ne ʻilo e foungá he naʻe ʻikai ke u tala ki ai hoku mamahí. Ka ʻi he hili ʻeku vahevahe moʻoni atu hoku lotó mo e fakakaukaú, naʻe lava leva ke mahino lelei ange kiate ia mo ne ʻiloʻi e founga ke tokoniʻi ai aú.

ʻI he ʻaho hono hokó naʻá ne haʻu ki hoku ʻapí mo ha tangai cherry mo e sipi kafu māfana mo molū taha kuó u ala ki aí. Naʻe vave mo e aʻu mai hono hoa ngāue fakaetauhi ko Linitaá mo ha meʻatokoni maʻa hoku fāmilí mo haku sitōkení fulufulu.

ʻI he taimi ʻoku ou aʻusia ai ha fuʻu mamahi lahí, ʻoku ou ongoʻi fiemālie pē ʻi he ʻofa mo e tokanga ʻoku fai ʻe Miseli mo Linitaá mo ʻiloʻi te u SAI pē. ʻOku fakamanatu mai heʻena ʻofá ʻa e ʻofa ʻa Kalaisí—ko ha faʻahinga meʻa te u lava ʻo kole mo fakaʻaongaʻi ʻi ha faʻahinga taimi pē te u fiemaʻu ai (vakai, Loma 8:35, 38–39).