“Ko Hotau Lotó ʻi Hono Toʻukupú,” Liahona, ʻOkatopa 2025.
Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko Hotau Lotó ʻi Hono Toʻukupú
ʻI he hoko ʻa Sīsū Kalaisi ko hotau Fakamoʻuí, ʻoku Ne finangalo ke tokoniʻi ke tau fiefia ange ʻi he taimi ʻoku tau puputuʻu aí.
ʻOku hoko ʻeku tui kia Sīsū Kalaisí ko e fakavaʻe ia ʻo ʻeku moʻuí, pea ko e ʻofa ʻa e Tamai Hēvaní ʻa e uho ʻo ʻeku moʻuí. ʻOku ou ongoʻi ʻoku ou kau fakataha mo e Tamai Hēvaní mo Sīsū Kalaisi. ʻI heʻeku fakahoko mo tauhi ʻa e ngaahi fuakava ʻo e temipalé, ʻoku ou ongoʻi ai Hona mālohí ʻi heʻeku moʻuí.
ʻOku ou ongoʻi ofi ange kiate Ia ʻi he fale ʻo e ʻEikí. ʻOku ou ongoʻi ʻa e ivi mo e mālohi ʻo Hono lakanga fakataulaʻeikí. ʻOku hangē ʻokú Ne fakafiemālieʻi mo tokoniʻi aú.
Kuo kau ʻi heʻeku fononga ʻi he moʻuí ha ngaahi ako fakafaitoʻo, ʻa ia naʻe hā mahino lelei ai kiate au ʻa e anga ʻo e fekauʻaki ʻa e tuí mo e faitoʻó. ʻI ha taimi ʻe taha lolotonga ʻeku ako ki he tafa mafú, naʻá ku tokoni ai ʻi ha tafa mafu. Naʻe ʻi ai ha tokotaha mahaki naʻe fiemaʻu ke fai ha faitoʻo ki hono mafu ʻoku mahamahakí. Naʻe kau ʻi he ngaahi sitepu ʻo e teuteu ki hono fakafehokotaki ʻo ha mīsini ki he mafú mo e maʻamaʻá ʻa hono fakapapauʻi ʻe vilo takai lelei ʻi he sinó ʻa e toto mo e ʻosikena ʻoku fiemaʻú.
ʻI hono fakaʻaongaʻi ha huhuʻa makehe, naʻe lava ʻa e toketā faitafá ʻo taʻofi fakataimi ʻa e mafú koeʻuhí ka ne lava ʻo fai ʻa e tafá lolotonga ʻa e tuʻu ʻa e tā ʻo e mafú. Naʻá ku siofi fakalelei ʻa e nima ʻo e toketā faitafá ʻou sio ki heʻene kiʻi hikiʻi hake ʻa e foʻi mafú ʻi muʻa ʻi he fatafatá. ʻI he momeniti ko iá naʻá ne tafoki mai kiate au mo kiʻi ngaungaue pē hono ʻulú. Naʻá ne kole mai ke u puke fakalelei ʻa e foʻi mafú ʻaki hoku nima toʻomataʻú koeʻuhí ke lava ʻo tuʻumaʻu ki he tafa ʻoku teuaki ke fakahokó.
ʻI he taimi naʻá ku puke ai ʻa e foʻi mafu ʻo e tokotaha mahakí ʻi hoku nimá, naʻá ku ongoʻi ʻi he taimi pē ko iá ʻa e mafatukituki ʻo e fatongiá, pea mo ofoofo lahi moʻoni. Naʻá ku fakakaukau ki he ngaahi lea ko ʻeni mei he Tokāteline mo e Ngaahi Fuakavá 101:16: “Ke mou fakalongolongo, pea ʻiloʻi ko e ʻOtuá au” (vakai foki, Saame 46:10).
ʻOku ou fakafekauʻaki ʻa e ʻīmisi ko eni ʻo ha loto fiemālié ki he ʻilo fakalaumālie ʻoku hanga ʻe Sīsū Kalaisi, ko hotau Fakamoʻuí, ʻo tokoniʻi ke tau fiefia ange ʻi he taimi ʻoku tau puputuʻu aí.
Kuó u ʻiloʻi ʻa e moʻoni ʻo e ngaahi lea ʻa Palesiteni Lāsolo M. Nalesoni lolotonga ha konifelenisi lahi kimuí ni mai: “Ko e lelei tahá ʻoku teʻeki ai hoko mai ʻi haʻatau liliu kakato hotau lotó mo ʻetau moʻuí kia Sīsū Kalaisí.”