Naʻe Tonu pē ʻEku Faʻeé

Naʻe puke lahi ʻeku faʻeé ʻi hoku taʻu 13. Naʻá ne puke lahi ʻi he kanisaá pea ʻoku ʻi he tuʻunga fakaʻosi ʻo ʻene moʻuí pea ʻoku toe pē ʻa e māhina ʻe ono ke ne moʻui ai. Naʻe ʻikai loto ʻa e tangataʻeikí ke mau ʻiloʻi ko e fānaú ʻa e puke ʻa e faʻeé, pea naʻe ʻikai ke u ʻiloʻi ʻokú ne fuʻu puke lahi kae ʻoua kuo toe pē ha māhina ʻe taha ke ne moʻui ai.

Naʻá ku fuʻu kei siʻi ke mahino kiate au ʻa e meʻa naʻe hokó, pea naʻá ku kiʻi momou ke ʻaʻahi ki ai ʻi falemahaki. Naʻe fakalotolahiʻi au ʻe heʻeku pīsopé ke u ʻave ʻa e sākalamēnití kiate ia, ka naʻe ʻikai ke u loto ki ai. Naʻá ku fakakaukau ʻe vave pē haʻane foki mai ki ʻapi. Ka naʻe vivili pē ʻeku pīsopé [ke u ʻave ʻa e sākalamēnití] he naʻá ne ʻiloʻi naʻe ʻikai ke toe lahi hono taimí.

ʻI he faifai peá u loto ke ʻalú, naʻe tāpuakiʻi ʻe heʻeku pīsopé ʻa e sākalamēnití, peá u tufa ia ki heʻeku faʻeé. Naʻá ne fuʻu puke lahi pea ʻikai ke ne loko lea. Ka naʻá ne talamai kiate au, “ʻOua naʻá ke tukuange ʻa e vaʻa ukameá” (vakai, 1 Nīfai 8:19–20, 24, 30).

Naʻe ʻikai ke fuoloa mei ai kuo mālōlō ʻeku faʻeé, ka naʻá ku manatuʻi ʻene lea tuku mai kiate aú. Kuo tāpuekina ʻeku moʻuí ʻi heʻeku muimui ki heʻene faleʻí.

Kimui ange aí, naʻá ku loto ke tokoniʻi ha ongo mēmipa ʻo ha fāmili naʻe nofo ofi mai pē ka naʻá na faingataʻaʻia. Naʻá na tali ʻeku tokoní peá na hoko ko ha konga ʻo hoku fāmilí.

Ka neongo ia, naʻe ʻikai ke ʻi ai haʻaku paʻanga feʻunga ke tokoniʻi ʻaki kimautolu. Ko ia naʻe pau ai ke u ngāue mālohi ange ʻi ha toe taimi kimuʻa, ʻo tokoniʻi ha kakai ʻe toko tolu ʻo ʻikai ko ha toko taha pē. Ko ha liliu lahi moʻoni ia ki he tōʻonga moʻuí.

Ke lava ʻo fakahoko lelei ʻa e liliu ko iá, naʻá ku ʻiloʻi ʻoku fiemaʻu ke u muimui ki he ngaahi lea ʻeku faʻeé mo piki maʻu ki he vaʻa ukameá. ʻOku kau ʻi he piki maʻu ki he vaʻa ukameá ʻa hono manatuʻi ʻo e Fakamoʻuí mo ako ʻa e folofola ʻa e ʻOtuá. Naʻe fiemaʻu ke u tā ha sīpinga lelei, fetuʻutaki lahi ange mo e ʻOtuá, mo ako ʻa e folofolá ʻi he ʻaho kotoa pē. Ko ia, naʻa mau kamata ako fakataha leva ʻa e folofolá. Naʻe vave ʻa e fonu Laumālieʻia homau ʻapí.

Naʻe maʻu ʻa e ngaahi taimi fakalata mo fakaʻofoʻofa taha ʻo ʻeku moʻuí mei he piki maʻu ki he vaʻa ukameá. Kuó u toe ʻiloʻi foki “ʻi hoʻomou piki ki he vaʻa ukameá, te mou ʻaʻeva fetākinima mo Sīsū Kalaisi. Te Ne tataki kimoutolu, pea te Ne akoʻi kimoutolu.”