Ko e Hā Naʻe ʻIkai Ke Ne Fakamoʻui Ai Iá?

Naʻe ʻi ai ha taimi lolotonga ʻa e kei valevale homa ʻofefine ko Silí, naʻe ʻikai ke fakalakalaka ia ʻo hangē ko e fānau kehé pea hangē naʻe faʻa lōmekina ia ʻe hono ʻātakaí. Hili ha ngaahi lotu lahi mo ha ngaahi meʻa fakalangi naʻe hoko, naʻa mau ʻiloʻi ʻoku ʻikai ke lelei ʻene fanongó.

ʻI hono māhina 18, naʻe fai ha tafa kia Sili ʻo toe lava ai ke ne fanongo. Ko ha taimi fakaofo ia, ʻi he sio ki heʻene fakalakalaká ʻi he kamata ke ne fetuʻutaki mo kimautolú. Ka ʻi ha ngaahi taʻu siʻi mei ai, naʻe ʻi ai ha ngaahi faingataʻa foʻou ia naʻe hoko. Naʻá ma toe feinga leva ke ʻiloʻi pe ko e hā ʻoku hoko ai ʻa e ngaahi meʻá ni.

Hangē ko e meʻa naʻe hoko kimuʻá, ʻo fakafou mai ʻi ha ngaahi meʻa mana, naʻá ma ʻiloʻi ʻoku toe hoko ha palopalema ki he fanongo ʻa Silí, ʻa ia ʻoku ʻikai ke lava ʻe hono ʻatamaí ʻo puke lelei ʻa e ongó. Naʻá ma kamata ngāue mo ha kau faifaleʻi mo e kau toketā ke tokoniʻi ke lava ʻo mahino ki ai ʻa e meʻa ʻokú ne aʻusiá .

Naʻá ku tui ʻaki hoku lotó kotoa kapau te u lotu mo faivelenga maʻu ai pē, ʻe fakamoʻui ʻe he ʻOtuá homa ʻofefiné. Naʻá ku ʻiloʻi ʻokú Ne maʻu ʻa e mālohi ke fai ia, ko ia ko e hā ʻoku ʻikai ke Ne fakamoʻui ai iá?

ʻI he ngaahi meʻá ni kotoa, naʻá ku ongoʻi tatau mo Mele mo Māʻata ʻi he Fuakava Foʻoú. Naʻá na fakaʻamu ke fakamoʻui hona tuongaʻane ko Lāsalosí, ka naʻe fakakaukau ʻa e ʻOtuá ia ki ha mana ʻoku lahi angé. ʻI he tatali ke aʻu ki honau ʻapí, naʻe fakaʻatā ai ʻe Sīsū ʻenau tuí ke tupulaki ʻi ha ngaahi founga te ne ʻomi ʻa e lāngilangí ki he Tamaí mo e ʻAló mo sio ki he tuʻunga te Na malava ke aʻusia ʻi heʻetau moʻuí.

Naʻe tangi ʻa Mele kia Sīsū hili ʻEne aʻu atú, “ʻEiki, ka ne ke ʻi heni, pehē, ne ʻikai mate, hoku tuongaʻané.” (Sione 11:32). Naʻá Ne fokotuʻu leva ʻa Lāsalosi mei he maté, ʻo fakamoʻui kakato ia.

Pea hangē pē ko Mele mo Māʻatá, naʻe maʻu ʻeku talí ʻi ha founga taʻeʻamanekina. ʻI ha pongipongi ʻe taha, naʻe haʻu kiate au ʻa e fakakaukau nonga ko ʻení: “ʻOku ʻikai ke fiemaʻu ʻe ho ʻofefiné ha fakamoʻui; ʻoku ne fiemaʻu ʻa e ʻofá mo hono tali lelei.”

ʻI he kamataʻangá, naʻe faingataʻa ke u loto ki he tali ko ʻení. Naʻá ku loto ke tauʻatāina ʻa Sili mei he ngaahi faingataʻaʻiá. Ka ʻi heʻeku fakaʻatā hoku lotó, naʻá ku fakatokangaʻi ʻoku fakaʻofoʻofa ange ʻa e palani ʻa e ʻOtuá maʻa homa ʻofefiné ʻi he meʻa naʻá ku fakakaukau ki aí. Naʻá Ne ʻafioʻi ʻe tokoni ʻa e aʻusia ko ʻení ki hono fakatupulaki ʻa e tui mo e falala ʻa homau fāmilí.

Naʻe ʻikai ke faingofua ʻa e sio ki he fehangahangai ʻa Sili mo hono ngaahi faingataʻaʻiá. Ka ʻi he fononga ko ʻení, kuó u ʻiloʻi ai ʻoku haohaoa maʻu pē ʻa e taimi mo e ngaahi palani ʻa e ʻOtuá. ʻOkú Ne ʻafioʻi ʻa e taimi ke ʻi ai maʻatautolú. Ko e meʻa pē ʻoku fiemaʻu ke tau faí ko e falala te Ne ʻi ai maʻu pē.