Bwana Aliniongoza Nyumbani

Kielelezo na David Malan

Nilipokuwa nikifanyia kazi shahada yangu ya udaktari na kufundisha muziki nchini Marekani, nilijitahidi kuishi injili na kuhisi ushawishi wa Mungu katika maisha yangu. Nilikuwa mbali na nyumbani na wakati mwingine nilihisi mpweke, lakini nilihisi upendo Wake na sauti Yake ikiongoza maamuzi yangu.

Siku moja hisia zilinijia kwamba ninapaswa kurudi katika nchi yangu ya nyumbani ya Bolivia. Kurudi haikuwa uamuzi niliofanya kwa wepesi. Mambo yalikuwa yanakwenda vizuri. Lakini baada ya kusali, nilihisi kwa dhati kwamba nilipaswa kurudi kwa sababu kitu muhimu kilinisubiri.

Baada ya kurejea kwangu, programu ya shahada ya kwanza katika muziki ilifunguliwa katika moja ya vyuo vikuu vya juu vya Bolivia, ambapo nilipata kazi kama profesa.

Katika kata yangu ya nyumbani, punde nilikutana na msichana ambaye sikuwahi kumwona hapo awali. Wazazi wake walikuwa wameongolewa kanisani wakati nikijiandaa kuondoka kwenda Marekani miaka mingi awali. Tulianza kufanya miadi na kufunga ndoa, ambayo imekuwa baraka kubwa katika maisha yangu.

Miaka miwili iliyopita, bibi yangu aligundulika kuwa na saratani. Tulikuwa karibu sana. Nilipokuwa mdogo, angeniambia, “Daima utakuwa pamoja nami, na ninajua utanitunza.”

Kwa sababu nilikuwa nimerudi nyumbani, nilikuwa pale wakati aliponihitaji, nikitumia muda pamoja naye kila siku wakati wa miezi yake ya mwisho. Hakujiunga na Kanisa kabla ya kifo chake, lakini alilipenda jarida la Liahona, Kitabu cha Mormoni, na mkutano mkuu. “Ninaamini yote,” alisema.

Baadaye, nilibarikiwa kuwa katika Hekalu la Cochabamba Bolivia pamoja na wazazi wangu wakati bibi yangu alipounganishwa na mumewe, ambaye alikuwa amefariki akiwa mdogo. Hakuolewa tena kamwe. Nilihisi kwamba walikuwa pale hekaluni pamoja nasi, wenye furaha na pamoja tena. Kuwaona wazazi wangu katika chumba cha kuunganisha wakiwa wamesimama kama mawakala kwa ajili yao ilikuwa ni uoni mzuri.

Hatujui jinsi mambo yatakavyokuwa katika maisha yetu, lakini Bwana anajua tunapaswa kuwa wapi. Yeye pia anajua jinsi ya kutubariki, na Atatuongoza kutenda katika mahali Pake ili kuwabariki wengine. Ikiwa tutajiamini katika hekima na mwelekeo Wake, ninajua anaweza kufanya zaidi ya maisha yetu kuliko tunavyoweza peke yetu.