Mungu Alinipa Amani

Tulipojiandaa kuimba wakati wa kikao cha kuweka wakfu Hekalu la Concepción Chile mwaka 2018, waumini wote wa kwaya ya vijana wakubwa niliyokuwa nikiiongoza ilikuwa na lengo sawa: kufanya kazi ya muziki na kiroho inayohitajika ili kumpa Mungu matoleo yetu bora.

Pamoja na waumini wa kwaya, kutoka vigingi viwili katika mji wa Chillán, nilijitoa mwenyewe kuwa msafi kama ninavyoweza kuwa. Nilitaka kuakisi Nuru ya Kristo katika maisha yangu. Nilitaka matoleo tuliyompa Mungu katika nyumba Yake takatifu kuwa kamili iwezekanavyo. Nilijua kwamba kama tungefanya sehemu yetu, Baba wa Mbinguni angetusaidia, na tungeimba kama ambavyo Yeye angetaka tuimbe.

Wakati wa kuweka wakfu, tuliimba kwa sauti zetu na mioyo yetu. Nadhani malaika waliimba pamoja nasi. Sauti ya kwaya ilikuwa kamilifu. Tulihisi kwamba neema ya Mungu ilikuwa pamoja nasi na kwamba alipendezwa na matoleo yetu. Hisia hiyo ilibaki nami kwa muda mrefu.

Baada ya kuwekwa wakfu hekalu, nilihisi kurutubishwa kiroho moja kwa moja na Baba wa Mbinguni. Nilihisi muunganiko mkubwa na Yeye kuliko nilivyowahi kupitia. Muunganiko huo ulikuwa imara sana kiasi kwamba nilihisi kuelekezwa kiroho katika kile ninachoomba wakati ninaposali (ona 3 Nefi 19:24).

Kufikia wakati wa kuweka wakfu hekalu, nilikuwa na ujauzito wa wiki tano. Miezi michache baadaye, mimba yangu iliharibika. Huo ulikuwa wakati wa kutisha. Nilihisi huzuni sana, hususani nilipojifunza kwamba sitaweza kupata watoto zaidi.

Lakini uzoefu huu mgumu ulitokea wakati nilipohisi kuwa mwenye nguvu zaidi kiroho. Nilielewa kwamba nilikuwa nimejitayarisha kwa wakati huu kwa njia ya sadaka tuliyotoa hekaluni. Nguvu za kiroho nilizopata zilinisaidia kushinda jaribu hili kwa sababu Baba wa Mbinguni alikuwa pamoja nami na akanipa amani.

Muda mfupi baadaye, Mungu alimbariki mume wangu na mimi kwa muujiza. Tulijawa na furaha wakati mwana wetu, Arturo, alipompokea dada mdogo, Daniela.

Nisingeweza kushinda tukio hilo bila uhusiano wa karibu niliokuwa nimefurahia na Baba wa Mbinguni. Nilijua kwamba kila kitu kingekuwa SAWA na kulingana na mapenzi Yake. Kukumbuka mambo haya bado kunajaza moyo wangu kwa shangwe na shukrani.