“Araka ny nanaovan’ Andriamanitra azy: Fampianaran’ny Apôstôly momba ny fianakaviana,” Liahona, sept. 2025.

Araka ny nanaovan’ Andriamanitra azy: Fampianaran’ny Apôstôly momba ny fianakaviana

Amin’ny maha-zanakalahy sy zanakavavin’ Andriamanitra antsika dia isan’ny fianakavian’ Andriamanitra avokoa isika rehetra, izay maodely arahan’ny fianakaviantsika eto an-tany.

Sary ôfisialin’ny Fiadidiana Voalohany tamin’ny 2018

“Ny Tompo dia nanao ny fianakaviana ho rafitra fototry ny Fiangonana sy ny fiarahamonina.” Ny fianakaviana dia mety ahitana mpivady manan-janaka, ary afaka ny ho olona tokan-tena ihany koa izany, na ray na reny tokan-tena manan-janaka, na mpivady tsy manan-janaka koa izy ireo. Ary indraindray dia mety ahitana havana hafa ao amin’ireo fianakaviana ireo. Na manambady isika na tsia, na manao ahoana na manao ahoana ny toe-javatra iainantsika manokana, dia ao anatin’ny fianakavian’ Andriamanitra ny tsirairay avy amintsika, samy ao anatina fianakaviana ety an-tany isika, ary samy miomana ny ho lasa ray aman-dreny mandrakizay.

Nandritra ny arivo taona dia nanambara ny fahamasinan’ny fianakaviana ireo mpaminany sy apôstôly ary nampitandrina ny amin’ireo loza hianjady amin’ny isam-batan’olona sy ny firenena ary izao tontolo izao raha toa ka tsy voatandrina sy voaro ny fianakaviana. Ireto misy teny vitsivitsy nentanim-panahy avy amin’ireo mpaminany sy apôstôly mahakasika ny fianakaviana sy ny maha-zava-dehibe ny “Ny Fianakaviana: Fanambarana ho an’izao tontolo izao.”

Ny Fianakaviana no ivon’ny drafitr’ Andriamanitra.

Filoha Russell M. Nelson

Filohan’ Ny Fiangonan’i Jesoa Kristy ho an’ny Olomasin’ny Andro Farany

“Mitana toerana manan-danja ao amin’ny drafitr’ Andriamanitra ny fianakaviana. Raha ny marina dia isan’ny tanjon’ilay drafitra ny hanandratra ny fianakaviana. Nohariana ny tany mba hahafahantsika fanahy zanaky ny Raintsika any An-danitra tany amin’ny fiainana talohan’ny nahaterahantsika ho tonga eto an-tany ary hahazo vatana. Tonga eto isika mba hotsapaina sy hosedraina [jereo ny Abrahama 3:24–25]. Tonga eto isika mba -hifidy ny fahafahana sy ny fiainana mandrakizay … na hifidy ny fahababoana sy ny fahafatesana- [2 Nefia 2:27]. Ary ny tena tsara indrindra dia avela ho latsa-pitia isika, dia hanambady ary hanasa ireo zanaka ho tonga ao amin’ny fianakaviantsika” (“Faith and Families,” Ensign, Mar. 2007, 39).

Manomana antsika amin’ny mandrakizay ny fiainam-pianakaviana eto an-tany

Filoha Henry B. Eyring

Mpanolotsaina Faharoa ao amin’ny Fiadidiana Voalohany

“Tsy vitan’ny hoe fototra iorenan’ny fiarahamonina sy ny Fiangonana fotsiny ny rafitry ny fianakaviana fa fototry ny fanantenantsika hahazo ny fiainana mandrakizay koa. Atombotsika ampiharina ao amin’ny fianakaviana, ilay rafitra kely kokoa, ny zavatra izay hampiharintsika ao amin’ny Fiangonana sy ny fiarahamonina honenantsika eto amin’ity izao tontolo izao ity ary izany avy eo no zavatra izay hampiharintsika ao amin’ireo fianakaviana voafatotra mandrakizay amin’ny alalan’ny fanekempihavanana sy ny fahatokiana” (“The Family” [fampaherezam-panahy nataon’ny Brigham Young University, Nov. 5, 1995], 8, speeches.byu.edu).

Natokana ho an’ny fanambadiana ny firaisana ara-nofo

Filoha Jeffrey R. Holland

Filoha mpisolo toerana ao amin’ny Kôlejin’ny Apôstôly Roambinifolo

“Ny firaisana ara-nofo eo amin’ny olombelona dia natokana ho an’ny mpivady satria izany no tandindona faratampon’ny fiombonana feno, fahafenoana sy fiombonana voatendry sy narafitr’ Andriamanitra. Nanomboka tao amin’ny Saha Edena ary mitohy hatrany, ny fanambadiana dia natao mba hidika hoe fitambaran’ny lehilahy iray sy ny vehivavy iray tanteraka ho iray—ny fanirian’izy ireo, ny fanantenany, ny fiainany, ny fitiavany, ny fianakaviany, ny hoaviny, ny zavatra rehetra. … Fitambarana feno tanteraka toy izany ilay izy hany ka mampiasa ny teny hoe mamehy isika mba hampitana ny fampanantenana mandrakizay ampitain’izany” (“Personal Purity,” Ensign, Nov. 1998, 76; Liahona, Jan. 1999, 91).

Manamafy orina ny rohy mampifandray ny fianakaviana, na dia mety ho tapaka aza ny sasany

Loholona David A. Bednar

Ao amin’ny Kôlejin’ny Apôstôly Roambinifolo

Ho anareo [tanora] izay niaina ratram-po noho ny fisaraham-panambadiana tao amin’ny fianakavianareo na nahatsapa ny fangirifirian’ny faharavam-pitokisana, dia tsarovy fa manomboka aminareo indray izany! Mety nisy masombỳ iray simba tao amin’ny rojom-pitohizan’ny taranakareo, saingy ireo masombỳ marina hafa sy ny sisa tavela amin’ilay rojo kosa anefa dia manan-danja mandrakizay. Afaka manampy hery ao amin’ny rojo misy anareo ianareo ary mety hanampy amin’ny famerenana amin’ny laoniny ilay masombỳ simba mihitsy aza. Izany asa izany dia hotanterahin’ny tsirairay” (“A Welding Link” [fampaherezam-panahy maneran-tany ho an’ny tanora, 10 sept. 2017], Médiathèque de l’Évangile).

Tokony hitarika ny zanaka hanana fanantenana ao amin’i Kristy ny ray aman-dreny

Loholona D. Todd Christofferson

Ao amin’ny Kôlejin’ny Apôstôly Roambinifolo

“Nanome didy Andriamanitra fa tokony hanambady ny lehilahy sy ny vehivavy ary hiteraka, amin’izay dia miara-miasa amin’ Andriamanitra eo amin’ny famoronana vatana izay tena zava-dehibe ho an’ny fisedrana mandritra ny fiainana an-tany ary tena ilaina amin’ny fahazoana voninahitra mandrakizay miaraka Aminy. Nanome didy koa izy ny mba hanorenan’ny ray aman-dreny fianakaviana sy hitaizany ny zanany ao anatin’ny fahazavana sy fahamarinana, [jereo ny Fotopampianarana sy Fanekempihavanana 93:36–40], ka hitarika azy ireo hananana fanantenana ao amin’i Kristy.” (“Nahoana no ilaina ny manambady sy manorina fianakaviana?,” Liahona, mey 2015, 51).