Ua Tofotofoina e le Savaliga a Tasemania le Autalavou

O le ofuina o ofu o le seneturi lona 19, o le tuleia ma le tosoina o taavale toso, ma tuua ai mea e fiafia i ai le aiga ma tekinolosi, sa auai talu ai nei se vaega o talavou i Tasemania i se savaliga. 

O le faamoemoega o le gaoioiga – na faatulagaina e Le Ekalesia a Iesu Keriso o le Au Paia o Aso e Gata Ai – o le fesoasoani lea i tagata talavou taitoatasi ia lagonaina - e oo lava i sina fuataga itiiti - mea na oo i uluai paionia o lo latou faatuatuaga ina ua latou malaga atu i laufanua valevalenoa o Amerika i Matu. 

Mo le ekalesia a Iesu Keriso, o se savaliga e faamanatu atu ai i tagata o le ekalesia ia osigataulaga ma lesona na aoaoina e tagata liliu mai o le Ekalesia i le seneturi lona 19 a o latou malaga mai le ogatotonu o Amerika i le Vanu o Sate Leki. Mo nei talavou, sa fesoasoani foi ia i latou e manatua ai le talafaasolopito o le Ekalesia i Tasemania. 

I le 1854, na papatisoina ai uluai tagata o le Ekalesia i Tasemania i se tamai vaitafe i Glen Huon. I le taimi o le savaliga sa tutu ai le vaega i le vaitafe e faailoa atu osigataulaga na faia e i latou na muamua atu ia i latou. 

Na faamatalaina e Rachael Sayers, o se tasi o ē na faatulagaina le savaliga, le mea na tupu i le auala lenei: “Se’i manatu i le mea lenei: E silia ma le 80 talavou ua faapotopoto faatasi mo aso e fā, ua latou manana’o uma e galulue faatasi i vaega e lē o ni mea latou te filifilia, e savavali i laufanua eseese, e ui atu i palapala ma vaituloto, i luga ma lalo o mauga papa, maseesee, ma galulue faatasi, auauna atu le tasi i le isi, tuuina atu o latou taimi, afu, ma le malosi, faasoa atu o latou faatuatua ma molimau, ma e aunoa ma se nofoaga lelei e moe ai, e aunoa ma le lotoleaga, e aunoa ma le muimui, e aunoa ma ni feteenaiga. E foliga mai e faigata ona mafaufau i ai, a ea?” 

Fai mai se tasi o tagata auai talavou, o Ema, “E matuai o’u talisapaia le malosiaga o le autalavou ma mea e mafai ona latou ausia pe a latou lotogatasi ma o ese mai o latou nofoaga toafimalie.”

Na amata sauniuniga mo le savaliga i le ono masina talu ai ma o le aofaiga o itula na tuuto atu i le auaunaga mo le autalavou sa musuia. 

Na saunoa Tim Jack, o se taitai o le Ekalesia i le eria o Hobart, “Sa matagofie le vaai atu ua tuufaatasia uma, aemaise lava, i masina a’o loma le gaoioiga.” 

Sa savavali le autalavou i luga o le mauga mo ni taimi uumi ma tuuina atu e le tasi i le isi le faamalosiauga ma sa naunau e laa atu i totonu ma faia lo latou taimi e tulei ai pe toso mai ai le avega ina ia malolo ai le tasi ma le isi. 

Fai mai Isabel, o se tasi o le autalavou na auai, “Sa ou fiafia i le na o le faatasitasi ma le autalavou, o se vaega atoa, ma fetaiai faatasi ai ma se luitau. Sa faigata, ae na ou maua ai se aafiaga fou ma na ou latalata atili ai i le lagonaina o le Agaga ma le iloaina e mafai ona tatou faia soo se mea e ala ia Keriso.” 

 Na saunoa mai se isi tagata faatulaga, o Steve King, “E faigata ona faamatalaina le malosi ma le galulue faatasi lea na susulu atu a o avea le autalavou ma taitai ma sa tasi i le faamoemoega ma o ese atu o se tino e faia le malaga faigata.” 

E tele taimi e tutu ai le vaega e faataga taavaletoso lima e oo mai ma o le a faia se talosaga mo i latou o e na naunau ma mafai ona fesoasoani i isi. E le’i manaomia ona talosagaina faalua le autalavou, o le a latou oso i le avanoa e auauna atu ai, e toe savavali i luga o se tulaga papa po o le toe foi i lalo i se vaega tifato o le auala e fesoasoani ai i taavale toso ua tuai. 

E tusa ai ma se tasi taitai talavou, o vavega laiti e le o ni mea e le masani ai i le savaliga, aua ua mamanuina e fausia ai le faatuatua e ala i le ositaulaga, lototele ma le galue malosi. O i latou na auai i le savaliga i Tasemania na iloaina po o ai moni i latou. O i latou o paionia i ona po nei o loo feagai ma luitau ma le naunautai, faatuatua, ma le alofa.