Ola i le Talalelei a Iesu Keriso i le Pasefika i Saute i Auala e Tausia ai le Siosiomaga

I aai, taulaga, ma nuu o le Pasefika i Saute, o loo taliaina e Le Ekalesia a Iesu Keriso o le Au Paia o Aso e Gata Ai ni vaifofo mataalia e lagolago ai le soifua manuia faaleagaga ma le faaletino. 

O le faaaofia ai o faiga o le tausiaina ma le fausiaina lelei o le siosiomaga i falelotu fou, ua le gata ai ona saunia e le Ekalesia ni avanoa paia mo tagata o le ekalesia e tapuai ai, ae o loo puipuia foi ma faatupuina ai punaoa taua, ma faamanuiaina ai nuu atoa. 

I se faatalanoaga talu ai nei, na taua ai e Elder Peter F. Meurs, le Peresitene o le Eria a le Pasefika o Le Ekalesia a Iesu Keriso o le Au Paia o Aso e Gata Ai, e tele fale fou o le Ekalesia e i ai faiga e aoina mai ai vai. A aunoa ma nei faiga, o le mauaina o se punavai o vai mama o se tauiviga ma e masani ona faamalosia ai tagata e faaaoga vai ua faaleagaina pe savavali i le tele o kilomita i aso uma e sue ai se vai e talafeagai ona faaaogaina. 

“E mafai ona matou aoina mai vai mai taualuga i totonu o tane,” o le tala lea a Elder Meurs. “I nofoaga e pei o Papua Niu Kini, Vanuatu, ma Atumotu o Solomona, e le gata ina e maua le susulu o le la, ae e tele foi timuga, o lea e vave ai ona faatumuina tane.” 

“A o matou fausia se falelotu i se nuu, e tuuina atu ai ia i latou se sapalai o vai mama ma matagofie. O sina aoga laitiiti le i ai o se lotu a le Au Paia o Aso e Gata Ai i lo latou nuu,” o lana tala lea. 

O le isi aogā e maua mai i le tele o fale fou o le paoa e maua mai i le malosiaga o le la, lea e suia ai masini faaleoleo kiso i se punavai tumau o le malosiaga. 

O na tau e aoga ma faigofie ona faaleleia e taua tele i se nofoaga e pei o Papua Niu Kini lea e tusa ma le 85% o le faitau aofai e le maua ai le eletise. 

I se tasi falelotu i Kuiniselani, Ausetalia, ua maualalo nei le pili o le eletise i le 70% ona o le faaaogaina o malosiaga o le la. I le eria lava lea e tasi, e 6 mai falelotu e 24 e faaaogaina le malosiaga o le la ma o loo fuafuaina e faapipii ai le malosiaga i fale e 18 o loo totoe. O le faaaogaina o le malosiaga o le la, ua avea ai nei falelotu ma sulu o le malamalama faaleagaga ma le faaletino mo le nuu. 

I Kiripati, ua saunia ai e le Ekalesia se tupe mo malosiaga o le la e faamama ai le vai e faafetaiaia ai le faaleagaina o punavai o vai fou ona o le siisii maualuga o le suasami. O nei punavai fou mo vai fou e faasaoina ai ola ma faaleleia ai le ola ai i nuu ua faapipiiina ai. “O se taunuuga ua sili atu ona atoatoa le lelei o le vai ma ua lelei le soifua maloloina,” o le tala lea a Elder Meurs. 

O le tautinoga a le Ekalesia i le tausiga e ogatasi ma lona talitonuga i le tausimea, po o le tiutetauave paia, i le lalolagi. Na faamamafa mai e Epikopo Gérald Caussé, le Epikopo Pulefaamalumalu o le Ekalesia, lenei mataupu faavae, i le faapea mai, “E mafai faapefea ona tatou faamamaluina ma alolofa i le Tama Faalelagi ma Iesu Keriso e aunoa ma le faamamaluina ma le alofa i a La’ua foafoaga?” 

E ala mai i nei taumafaiga ma isi taumafaiga, o loo faaauau pea ona faamalosia e le Ekalesia ia nuu i le Pasefika i Saute, ma faataitaia ai le mataupu faavae e faapea o le avea ma soo e aofia ai le tausia o tagata ma le siosiomaga.