E Autasi Faapefea se Uarota po o se Paranesi?

Ata na tusia e Dilleen Marsh

Lotogatasi e ala i Gaoioiga

E lei atoa se tausaga talu ona auai i le Ekalesia, ae valaauina Ernesto Gabriel Manhique e avea ma peresitene o le Paranesi fou faatoa faatuina o Homoine i Inhambane, Mozambique. I lena taimi, e lua tausaga o le paranesi ma e tusa ma le 20 tagata o le ekalesia na auai.

Sa manao Peresitene Manhique ia avea le alofa ma faavae o le paranesi. “Ona o o’u aafiaga,” na ia saunoa ai, “sa ou filifili ai e avea ma se taitai e atiina ae se faauoga ma tagata o le ekalesia ma faaalia lo’u alofa mo i latou.”

Fai mai Peresitene Manhique o a latou fonotaga a le aufono a le paranesi e taulai atu i le aapa atu ia i latou o e ua le toe auai i le lotu ona sa latou tauivi e lagona le alofagia ma le faatauaina. O nei talanoaga na taitai atu ai i se gaoioiga sa latou ta’ua o “afiafi faaleaiga a le paranesi i le po o le Aso Faraile.”

“Matou te fuafuaina faapenei: Matou te mafaufau i uso ma tuafafine e lei o mai i le lotu i le Aso Sa ua mavae pe e lei auai mai foi i ni nai Aso Sa,” o le tala lea a Peresitene Manhique. “Ona matou fesili atu lea i le tagata pe mafai ona faia se afiafi faaleaiga a le paranesi i lo latou fale i lena vaiaso.”

E faapotopoto le paranesi i le fale o le tagata ma valaaulia le pitonuu atoa. Na faamalamalama mai e Peresitene Manhique e fesoasoani lenei mea i le tagata po o le aiga e lagona ai le alofagia, faatauaina, ma le manaomia.

“E masani lava, e toe foi mai le tagata [o le sa talimalo] faatasi ma tuaoi, o e fiafia i afiafi faaleaiga a le paranesi ma filifili e auai i le lotu,” o le saunoaga lea a Peresitene Manhique. Ua silia nei ma le 250 tagata o le Paranesi a Homoine. O le toatele e auai e le aunoa i le lotu.

A o fuafuaina ma faatinoina e uarota ma paranesi ni gaoioiga faifai pea, ma faagaeetia, o le a tuputupu ae o latou tagata i le lotogatasi ma le alofa. Na faapea mai Elder Gerrit W. Gong o le Korama a Aposetolo e Toasefululua, “I le tele o nofoaga i le Ekalesia, o ni nai isi gaoioiga a le uarota, ioe, pe a fuafuaina ma faatinoina ma faamoemoega o le talalelei, e mafai ona lalagaina faatasi ai i tatou ma se auai sili atu ma le lotogatasi.”

Lotogatasi e ala i Auaunaga

I ni nai tausaga ua mavae, sa oo ai le Uarota a Eagle Valley i Colorado, ISA, i le tele o tofotofoga o le faatuatua. E toatele tagata o le uarota na maliliu, ma sa manaomia e o latou aiga le malosi ma le lagolago. Semanu e mafai lava ona faamalumaluina le uarota i lagona faanoanoa ae nai lo lena, na maua le olioli i le auaunaga.

“Sa faaauau pea ona matou auauna atu i isi,” o le tala lea a Karie Grayson, le peresitene o le Aualofa i lena taimi. I se tasi aso, a o asiasi atu i le fale o se tuafafine ma’i, sa maua ai e Sister Grayson se faaaliga i le auala e siitia ai lenei tuafafine i le alofa o lana uarota.

“A o matou nonofo ai ma la’u au peresitene iina i le potu e asia o ia, sa matou mafaufau taitoatasi, ‘O le a se isi mea e mafai ona matou faia?’” o le tala lea a Sister Grayson. “Na oo mai se manatu ia te au. Sa ou iloaina i lena lava taimi ma iina le mea e tatau ona matou faia.”

Sa fiafia lenei tuafafine i fugalaau, o lea na aumaia ai e le uarota le ola i lana togalaau fugalaau ua togavaoa. O taeao uma o Aso Lua, e o mai ai tagata o le uarota e tausia le togalaau.

Sa faatupulaia le fiafia e auauna atu e le gata i le Uarota a Eagle Valley ae faapea foi i le nuu. Sa fesoasoani tagata taitoatasi ma kamupani i le eria atoa e saunia palapala, fugalaau, ma se faiga faatulagaina o le vai e fui ai.

“Ou te lagona e pei o le mea sa matou faia sa taitaia e le Tama Faalelagi,” o le tala lea a Sister Grayson “Sa tele galuega e tatau ona fai, ae sa tele le taliē faatasi o tagata uma. Sa matuā manaia lava.”

A o latou galulue ma auauna faatasi, na suia lagona i le Uarota a Eagle Valley. Na mou atu le faanoanoa a o latou maua le olioli i auaunaga.

Fai mai Epikopo Greg Adair, “A o matou auai faatasi uma, sa amata ona lagona e le uarota le pei o se aiga. O lenei vaitaimi o se tofotofoga mo la matou uarota, ae na matou o mai faatasi ma fesoasoani le tasi i le isi.”

Fai mai Sister Grayson, sa i ai le sootaga i le uarota e ala i le auaunaga e le faapea ona sa tatau ai ae ona sa latou mananao ai. Ma a o latou faia, sa latou maua le faamalologa i a latou lava tauiviga. “Sa i ai se lagona malosi i le uarota,” o lana tala lea. “Pe a e suia loto o tagata taitoatasi i le uarota, e te suia le loto o le uarota.”

Sa naunau tagata o le uarota a Eagle Valley e “loto e fefaasoaa’i ona tauave o a outou avega, ina ia māmā ai; … ma faamafanafana atu ia te i latou o e e manaomia le faamafanafanaga” (Mosaea 18:8--9).

“O le auauna faatasi ai e aumaia ai outou ia felatai atili ai,” o le tala lea a Epikopo Adair. “Sa faigofie ona auauna atu aua sa matou iloa lelei uma lava le tasi ma le isi. Ua aoaoina i tatou e Keriso ina ia alolofa i le Atua ma o tatou tuaoi, ma a o tatou taumafai e faia soo se valaauga e talosagaina i tatou e fai, tatou te fusi faatasi i tatou lava i le alofa.”

Ina ua matamata Epikopo Ernest White o le Uarota a Holywood Road i Belfast, Aialani i Matu, i le tamomoe a ona atalii e toalua i se malafoni, sa ia faamoemoe o lona atalii o Tavita, o lē sa koleni mo le tele o masina, ia vave tele atu ona faamae’a le tuuga nai lo lona atalii e itiiti lona saunia o Peteru. Sa faateia Epikopo White ina ua tumau ai pea Tavita i autafa o Peteru e oo atu i le tini.

“O lea ou te taofia oe. “Alu atu ia e aunoa ma a’u,” na fai atu ai Peteru i lona uso.

“Ou te le tuua oe,” o le tali lea a Tavita.

O lenei aafiaga na taitai atu ai Epikopo White e mafaufau e uiga i tagata o lana uarota. O le toatele o i latou o ni tuafafine matutua, ma e faigata ia i latou ona malaga atu i le malumalu aupito lata ane i Preston, Egelani. Sa vaai faalemafaufau Epikopo White i nei tuafafine taitasi o fai mai, “O atu i le malumalu e aunoa ma au. O le a o’u taofia maia oe. Aua le faatali mo au.”

E ui lava i faigata, ae sa le’i mananao Epikopo White ma isi taitai o le uarota e tuua nei tuafafine. Sa latou filifili e faatulaga se malaga faaletausaga a le uarota i le malumalu, e fesoasoani ai i tagata taitoatasi o le uarota o e sa mananao e auai ina ia olioli i faamanuiaga o le malumalu.

Na iloa e Epikopo White e ui e taugata ma faigata ona fuafua le malaga, “ae e aumaia ai se faatasiga tele.”

O le malaga faaletausaga e aofia ai tagata uma o le uarota i ni auala eseese. E fesoasoani tagata matutua e faatulaga ni taimi faatulagaina ma faia ni fuafuaga o femalagaaiga. E fesoasoani le autalavou i tagata matutua e faaaoga tekinolosi e fai ai sailiiliga o talafaasolopito o aiga ma saunia ai kata o igoa o aiga. O foai agalelei a nisi o tagata o le ekalesia e fesoasoani e totogi ai le tau o nofoaga mo tagata malaga uma o le malumalu.

“O le savali ua matou tuuina atu ma le manuia i o matou tagata—o tagata taitoatasi uma—o le, afai ua latou tautino e mulimuli i le ala o le feagaiga ma agai i luma, e leai se tasi o i latou o le a tuua,” o le tala lea a Epikopo White. “E manaomia, ma e alofagia i latou, ma e latou te le o taofia mai i latou.”

Mo malaga muamua e lua faaletausaga, na felelei atu ai tagata o le uarota i Egelani. Ae peitai, i le 2024 sa le mafai ai e nisi o tagata o le ekalesia ona toe a’ea’e i faasitepu i vaalele, o lea na filifili ai le uarota e malaga i taavale. O lenei mea na manaomia ai le malaga atu i se vaa e sopo’ia le Sami Aialani.

E silia ma le 30 tagata o le ekalesia na faia le malaga e auai i le malumalu ia Aokuso ua tea. Mo se vaiaso, sa latou auai faatasi i sauniga o le malumalu. O nei aafiaga na faamanatu atu ai i tagata o le ekalesia o i latou taitoatasi o se vaega o se aiga alolofa o le uarota.

“Pe a matou savavali faatasi e ui atu i faitotoa o le malumalu, e taua tele ia i matou,” o le tala lea a Epikopo White. “Pe a matou vaai i le tasi ma le isi—o i matou uma faatasi i le potu selesitila—e pei lava o sina vaega itiiti o le lagi i le lalolagi.”

E ui lava o le aumaia o le Uarota atoa o Holywood Road i le isi itu o le Sami Aialani e asiasi i le malumalu e le faigofie, ae ua matua aoga tele mo tagata o le ekalesia ma e pele ia i latou. “O le mea lena e finagalo le Faaola tatou te faia,” o le tala lea a Epikopo White. “E le manao o ia e tuua se tasi. E finagalo o Ia ia tatou agai faatasi i luma, o le mea lena o loo matou taumafai e fai.”

E ui o nei tala taitasi o loo faaalia ai se mataupu faavae eseese mo le atiina ae o le lotogatasi, ae o loo faaalia uma ai le auala e fesoasoani ai Iesu Keriso ia i tatou ia tasi ma a tatou uarota ma paranesi. O le a Ia taitaia tagata o le Ekalesia a o latou fuafuaina gaoioiga, auauna atu ia i latou e manaomia le fesoasoani, tapuai i malumalu, ma faia isi taumafaiga ina ia lotogatasi. O le alofa ma aoaoga a le Faaola ua mafai ai e faapotopotoga taitasi ona “faaatoatoaina i latou ia tasi” (tagai i le Ioane 17:23).