Fuafuaga Paia a le Tama Faalelagi

Ata na saunia e Agnieszka Więckowska

I le avea ai ma se taitai misiona i Pasila, sa ou faaaluina ai se vaiaso e latalata i le faaiuga o le 2023 e faatalanoa ai le 60 o a matou faifeautalai e 160. O se tasi o i latou, o se taitai sone, na talosaga mai e talanoa faalilolilo mai ia te a’u. Ina ua ma feiloai, sa ia tuuina mai ia te a’u se pusa seevae ma fai mai ua faatau mai e ona matua se pea seevae faaopoopo mo se tasi i le misiona e ono manaomia.

I le ootia ai, sa ou faafetai atu ai ia te ia mo le agalelei ma le magafagafa o ona matua. Peitai, sa ou moomoo le leoa, pe ana faapea o seevae laiti, e 8.5 le lapopoa, o se lapopoa tele, ma masani ona seevaeina e le toatele o a matou faifeautalai. Ae sa ou faafetai ma tuu seevae i la’u taavale.

I le lua o aso mulimuli ane, sa ou faatalanoaina ai nisi faifeautalai, ina ua ou valaaulia se faifeautalai mata ataata i lo’u ofisa. Na taunuu mai o ia i le na o le fa vaiaso talu ai mai Kuatemala. Ina ua ou fesili atu ia te ia pe o a mai o ia, sa liua lona ataata i le tagi masūsū.

Sa ia talanoa ma loimata e uiga i lona maasiasi ina ua taufaalili ma le le sala se isi faifeautalai ia te ia ona o le le faamauina o le faamau pito i luga o lona ofutino. O ia o se tagata liliu mai talu ai nei ma sa ola ae i se aiga e toatasi le matua. Sa tau le lava tupe na maua e lona tina e tausia ai o ia ma ona tei e toalua. Sa laiti tele ona ofutino na foai mai, o lea sa ia faaaogaina ai le faapona o lona fusiua faaaoga soo e nanā ai le faamau pito i luga e le’i faamauina.

Sa ou tuuina atu ia te ia se tupe na foai atu e se tagata o le Ekalesia mo faifeautalai o e na manaomia ni lavalava ma fai atu ia te ia e faatau ni ofutino fou. Ona ou matauina lea ua leaga ona seevae. Na faafuasei lava ona ou manatuaina seevae o i la’u taavale! Sa ou fesili atu ia te ia po o le a le tetele o ona seevae, ma iloa ai e laiti ona vae.

“Ou te see i le 8.5,” o lana tali lea.

Sa faatumulia o’u mata i loimata a o ou faamatala atu faapea, na faatoa foai mai e matua o se isi faifeautalai se pea seevae e ofi ia te ia. Sa ma pueina faatasi se ata ma auina atu i le taitai sone. O lona tamā, o se tagata na iloa ane foi o se tagata Kuatemala, sa lagona le ootia ona sa ia fesoasoani i se faifeautalai mai lona atunuu moni.

I la matou misiona, o nei ituaiga o faamanuiaga e tutupu i aso taitasi. Atonu e fai mai nisi ua na o ni mea na tutupu fua, ae ou te ioe faatasi ma Elder Neal A. Maxwell (1926–2004), o lē na faasino atu o nei mea o le “fuafuaga paia” a se Tama Faalelagi alofa.