“Tatou te Mulimuli ia Iesu Keriso e ala i le Auai Faatasi ma Ia i Lana Galuega,” Liahona, Iuni 2025.
Tatou te Mulimuli ia Iesu Keriso e ala i le Auai Faatasi ma Ia i Lana Galuega
Tatou te auai i le galuega a le Faaola a o tatou taulai atu i Ona faamoemoega, tausia o Ana poloaiga, ma alofa le tasi i le isi.
Faamatalaga mai le Keriso ma le Taulealea Mauoa, saunia e Heinrich Hofmann
Pe a tatou papatiso, tatou te amataina le faagasologa o le tauaveina i o tatou luga o le suafa o Iesu Keriso. O se vaega o lenei faagasologa ua faailoa mai ai ua tatou auai faatasi ma le Faaola i Lana galuega. Na tusia e Peresitene Dallin H. Oaks, Fesoasoani Muamua i le Au Peresitene Sili, “O se tasi o uiga aupito sili ona taua o le tauaveina i o tatou luga o le suafa o Keriso [o] se naunautaiga ma se tautinoga e tauave i o tatou luga le galuega a le Faaola ma Lona malo.”
O Lana galuega, o le “aumaia le tino ola pea ma le ola faavavau o le tagata” (Mose 1:39). O le tino ola pea o se meaalofa e le faatuaoia ua uma ona faamaonia e Iesu Keriso e ala i Lona Toetu. Peitai, o le ola e faavavau, e le tutusa ma le tino ola pea. O le meaalofa aupito sili lea e mafai e le Atua ona tuuina mai i le tagata (tagai i le Mataupu Faavae ma Feagaiga 14:7). O le ola faavavau ai o ni aiga i Lona afioaga. Ina ia tatou maua le ola e faavavau, e tatau ona avea i tatou ma soo faamaoni o Iesu Keriso. O lona uiga tatou te maua le talalelei toefuataiina e ala i le faatuatua i le Faaola ma Lana Togiola, salamo, papatisoina, maua le meaalofa o le Agaga Paia, osia ma tausia feagaiga o le malumalu, ma tumau e oo i le iuga. O le tumau e oo i le iuga e aofia ai le auai faatasi ma le Faaola i Lana galuega.
Auai ma le Naunautai
Tatou te auai i le galuega a le Faaola a o tatou fesoasoani i fanau a le Atua ia avea foi ma soo faamaoni o Iesu Keriso. E aofia ai le faasoaina atu o Lana talalelei, ma faapotopotoina ai Isaraelu ua faataapeapeina, e ala i le faataunuuina o tiutetauave i le Ekalesia a le Faaola ma le taumafai ia avea faapei o Ia. O lo tatou “manuia [i Lana galuega] e lē faalagolago i le auala e filifili ai isi e tali [mai ia i tatou], i a [tatou] valaaulia, po o [a tatou] galuega faamaoni o le agalelei.” Na faamautu mai e Peresitene Russell M. Nelson: “Soo se taimi e te faia ai soo se mea e fesoasoani ai i soo se tasi—po o le fea lava itu o le veli—ua e faia feagaiga taua ma le Atua ma maua o latou papatisoga e tatau ai ma sauniga o le malumalu, ua e fesoasoani i le faapotopotoina o Isaraelu.”
Ina ia avea le galuega a le Faaola ma a tatou galuega, tatou te taulai atu i Ona faamoemoega, tausia Ana poloaiga, ma alolofa le tasi i le isi. A o tatou faia Lana galuega i Lana ala (tagai i le Mataupu Faavae ma Feagaiga 51:2), o nisi mea ua tuua mo i tatou e fuafuaina e i tatou lava. Sa ta’u atu e le Faaola i le Au Paia o e na faapotopoto i le Itumalo o Jackson, Misuri:
“Aua faauta, e le tatau ona Ou poloai atu i mea uma; aua o ia o le e tau faamalosia i mea uma, o ia lava lea o se auauna paie ma lē poto; o le mea lea e le maua e ia se taui.
“E moni Ou te fai atu, e tatau i tagata ona auai ma le naunautai i se faamoemoega lelei, ma fai mea e tele i lo latou lava loto malie, ma aumai le amiotonu tele;
“Aua ua i totonu ia te i latou le mana, lea ua latou pule ai ia te i latou lava. Ma e tusa ai ma le faia e tagata o mea lelei, o le a leai lava se ala o le a aveesea ai lo latou taui” (Mataupu Faavae ma Feagaiga 58:26–28).
A o tatou mulimuli i le Faaola, auai faatasi ma Ia i Lana galuega, ma fesoasoani i isi ia avea ma Ona soo faamaoni, ua tatou aoao atu mea o le a Ia aoao atu. Talu ai e le o faatagaina i tatou e aoao atu se isi lava mea (tagai i le Mataupu Faavae ma Feagaiga 52:9, 36), tatou te taulai atu ai ma le le mafaagaeetia i Lana aoaoga faavae (tagai i le Mataupu Faavae ma Feagaiga 68:25). E le gata i lea, tatou te gauai faapitoa atu ia i latou o e matitiva, le tagolima, ma vaivai (tagai i le Mataupu Faavae ma Feagaiga 52:40). Na faamanino mai nei faamamafa ina ua sii mai e le Faaola mai ia Isaia i se sunako i Nasareta:
“Ua i o’u luga le Agaga o le Alii, aua ua na faauu mai ia te au e folafola le tala lelei i e matitiva; ua auina mai a’u e ia e faamalolo i e loto momomo, e tala’i le saolotoga i le tafeaga, ma ia pupula mata o e tauaso, e tuu saoloto i e ua faasauaina,
“E talai le tausaga e finagalo malie mai ai le Alii” (Luka 4:18–19; tagai foi i le Isaia 61:1–2).
O le tausaga e finagalo malie mai ai le Alii e faasino i le taimi o le a liligi tele mai ai faamanuiaga uma o le feagaiga a le Atua i Ona tagata. Tatou te mulimuli ia Iesu Keriso e ala i le valaauliaina o isi ia maua faamanuiaga o le osia ma le tausia o feagaiga ma le Atua ma e ala i le tausia o i latou o e matitiva ma le tagolima.
O le auai faatasi ma Iesu Keriso i Lana galuega e fiafia aua o Ana galuega, fuafuaga, ma faamoemoega “e le mafai ona taofia, pe mafai foi ona avea i latou ma meanoa” (Mataupu Faavae ma Feagaiga 3:1). Mo i latou o e lagona le faavaivai, ua fautua mai le Alii: “O le mea lea, aua le faavaivai i le faia o mea lelei, ona o lo o oulua faataatiaina le faavae o se galuega tele. Ma e mai mea iti e tutupu mai ai mea tetele” (Mataupu Faavae ma Feagaiga 64:33). Tatou te tuu atu i le Alii e popole i le seleselega, ma e na o lo tatou faia lava o la tatou vaega.
Le Loto ma le Mafaufau Malie
O le faia o la tatou vaega e faigofie atu nai lo le mea tatou te ono mafaufauina aua e le manaomia ona tatou aumaia ni taleni po o ni tomai tulaga ese i le galuega a le Alii. O Lana tulaga manaomia ua na o se tautinoga ma se naunautaiga. Na fetalai le Alii i le Au Paia i Katelani, Ohaio, “Faauta, e manaomia e le Alii le loto ma le mafaufau malie” (Mataupu Faavae ma Feagaiga 64:34). E mafai e le Alii ona faia e loto i ai ia mafai, a e Na te le mafai ma po o le o le a Ia le faia lava le e mafaia ia loto i ai. I se isi faaupuga, afai tatou te tautino atu ma naunautai, e mafai ona Ia faaaogaina i tatou. Ae e tusa lava po o le a lo tatou talenia, o le a Ia le faaaogaina i tatou sei vagana ua tatou tuuto atu i Lana galuega ma naunau e fesoasoani ia te Ia.
Sa faaalia e Samuelu ma Ana-Maria Koivisto le tautinoga ma le naunautai. E le’i leva ona uma le la faaipoipoga, ae siitia atu le au Koivisto mai Jyväskylä, i Finelani, i Göteborg, Suetena, ina ia sailia ni avanoa faigaluega. Ina ua taunuu atu, sa valaaulia Uso Koivisto e asiasi atu ia Peresitene Leif G. Mattsson, o se fesoasoani i le au peresitene o le Siteki a Göteborg Suetena. Talu ai sa le’i tautala Samuelu i le gagana Suetena, o lea na faia ai le faatalanoaga i le gagana Peretania.
Ina ua mavae se asiasiga puupuu, sa talosagaina e Peresitene Mattsson ia Samuelu e avea ma taitai misiona a le uarota i le Uarota a Utby. Na faasino mai e Samuelu le mea manino: “Ae ou te le tautala i le gagana Suetena.”
Sa faalagolago atu Peresitene Mattsson i luga o lana kesi ma fesili sa’o atu, “Pe na ou fesili atu pe mafai ona e tautala i le gagana faaSuetena, pe e te naunau e auauna atu i le Alii?”
Sa tali atu Samuelu, “Sa e fesili mai pe ou te naunau e auauna atu i le Alii. Ma ou te naunau.”
Na talia e Samuelu le valaauga. Sa talia foi e Ana-Maria ia valaauga. Sa la auauna atu ma le faamaoni ma aoao e tautatala ma le matagofie i le faaSuetena i le aluga o le [olaga].
O le tautinoga ma le naunautai e auauna atu i le Alii ua faamatalaina ai olaga o Samuelu ma Ana-Maria. O i la’ua o ni toa masani i le Ekalesia. Sa la’ua auauna atu ma le faamaoni i taimi uma lava na talosagaina ai i la’ua. Ua la aoaoina a’u a tatou auauna atu, tatou te faaaogaina taleni ua tatou maua (tagai i le Mataupu Faavae ma Feagaiga 60:13), ona fesoasoani lea o le Alii ia i tatou e faataunuu Ona faamoemoega.
Pe a tatou naunau e auauna atu, tatou te taumafai e aua le faitio pe muimui, aua tatou te le mananao e faaleagaina la tatou auaunaga i soo se itu. O le faitio atonu o se faailoga o le tautinoga faavaivai, pe o lo tatou alofa mo le Faaola e le o le mea lea e tatau ona i ai. Pe a tuu e aunoa ma le puleaina, o le muimui e mafai ona agai atu ai i le fouvale tuusao e faasaga i le Alii. O lenei alualu i luma ua vaaia i le olaga o Ezra Booth, o se uluai tagata liliu mai i le Ekalesia i Ohaio o lē na valaauina o se faifeautalai i Misuri.
A o ia tuua Ohaio ia Iuni 1831, sa le fiafia Ezra ona sa mafai e nisi o faifeautalai ona malaga i taavale solofanua a o savali o ia i le vevela o le taumafanafana, ma talai atu i le ala. Sa muimui o ia. Ina ua taunuu o ia i Misuri, sa ia lagona le faavaivai. O foliga o Misuri e le o le mea lea sa ia faamoemoeina. Nai lo lena, sa ia tilotilo solo ma matauina “sa foliga mai ua faanoanoa le faamoemoe.”
Na faateleina le faatauemu, faatalasua, ma le faitio o Esera. Ina ua tuua Misuri, nai lo le talai atu a o alu o ia, e pei ona talosagaina ai o ia e fai, sa toe foi atu o ia i Ohaio i le vave na te mafaia. O lana uluai muimui na oo ina faasolo ina faavaivai ma iu ai ina leai se talitonuga i ona aafiaga faaleagaga na muamua atu. E lei umi ae tuua e Esera le Ekalesia ma na “iu lava ina ia ‘lafoaiina le faaKerisiano ma avea ai ma se tagata le talitonu.’”
E mafai foi ona tupu lenā mea iā i tatou pe afai tatou te lē faaeteete. Afai tatou te le faatumauina se vaaiga e faavavau, ma faamanatu ia i tatou lava po o ai moni lava e ana lenei galuega, atonu tatou te faitio, faavaivai, ma iu ai ina leai so tatou faatuatua.
Ou te tatalo ina ia mafai ona tatou filifili e mulimuli ia Iesu Keriso e ala i le auai faatasi ma Ia i Lana galuega. A o tatou faia, ua tuuina mai ia i tatou le “folafolaina mai ai o mea e silisili ese lava ma le aoga” (2 Peteru 1:4). O nei faamanuiaga e aofia ai le faamagaloga o agasala (tagai i le Mataupu Faavae ma Feagaiga 60:7; 61:2, 34; 62:3; 64:3), faaolataga (tagai i le Mataupu Faavae ma Feagaiga 6:13; 56:2), ma le faaeaga (tagai i le Mataupu Faavae ma Feagaiga 58:3–11; 59:23). E moni, ua folafola mai ia i tatou le meaalofa silisili e mafai ona tuuina mai e le Atua—o le ola e faavavau.