Sa Ou Lagonaina le Alofa o le Atua

Ata na saunia e Agnieszka Więckowska

A o laitiiti lo’u tina, sa tuulafoaiina o ia e lona tina. I ni nai tausaga mulimuli ane, na maliu ai lona tamā, ma sa tuuina atu o ia i se aiga sa le agalelei ia te ia. O lenei aafiaga na ia talitonu ai e le mafai ona ia maua le fiafia i se aiga.

Peitai, ina ua auai o ia i le Ekalesia, sa suia ona uiga faaalia ina ua oo ina ia malamalama i le taua o le aiga i le fuafuaga o le fiafia a le Atua. Sa auauna atu o ia i se misiona ma iu ai ina faaipoipo i lo’u tamā. Sa laua faatuina faatasi se aiga e tumu i le faatuatua ia Iesu Keriso ma faia le mea sili la te mafaia e ola ai e tusa ai ma a laua feagaiga ma le Atua. O le ituaiga aiga lena sa ou ola ae ai i se tamai taulaga i Atenitina e ta’ua o Lima.

Ina ua uma ona auauna atu i se misiona talai, ou te manatua lo’u lagona faanoanoa ma le le mautonu i le mea e fai faalegaluega. Ae na faamalosia a’u e le Tama Faalelagi e tausisia lo’u faatuatua ma a’u feagaiga, ma sa Ia faamanuiaina a’u i se tina sa tausia foi ana feagaiga. O lona faatuatua ma lona naunautaiga na avea ma se punavai o musumusuga ia te a’u.

A o ou mafaufau i aoga i le kolisi, sa ou mafaufau i se mea taua e le o le mea tonu lea sa ou moemiti i ai e suesue ai. I le matauina o lo’u faanoanoa, sa fai mai ai lo’u tina, “Piimau i au miti. Filifili le ala ua e iloa e lou loto e sa’o.”

A o ou laitiiti, sa i ai ni a’u miti e faatatau i musika ma faafiafiaga. Sa ou aoao e taina le piano, taitai aufaipese a le Ekalesia, ma faasoa atu le talalelei e ala i musika. Mo se taimi, o luitau ma mea faalavefau o le olaga na aveesea ai a’u mai na miti.

Na saunoa Peresitene Russell M. Nelson o i latou o e osia feagaiga ma le Atua “e mafai ona maua se ituaiga alofa ma le alofa mutimutivale faapitoa” ma o le osiaina o na feagaiga “e aafia ai i tatou ma le auala o le a fesoasoani ai le Atua ia i tatou ia avea ma tagata e mafai ona avea ai i tatou.”

O a tatou feagaiga e aumaia ai ia i tatou le saogalemu. A o ou tausia a’u feagaiga, sa ou lagonaina Lona alofa faapitoa mo a’u. Sa Ia aveesea faafitauli mai lo’u ala seia oo ina manino lo’u ala.

Sa ou sau mai se tamai taulaga sa itiiti se folafolaga na ofoina mai mo se tamaitiiti e le mailoa. O le asō, ou te faatonutonu ai konaseti faapolofesa ma faaaliga o falefaafiafia i Buenos Aires. O lo’u toalua, fanau, ma galuega faapolofesa o a’u miti ia ua taunuu.

Ou te talitonu e finagalo le Atua ia tatou manuia. Afai tatou te faaauau pea, o le a Ia saunia se auala mo i tatou e ausia ai mea uma e finagalo o Ia tatou te ausia. O le mea e sili ona taua, o le a Ia fesoasoani ia i tatou e avea ma se meafaigaluega i Ona aao i le aumaia o isi ia te Ia.