Auauna Atu o ni Tagata e Tali Muamua Atu

A o ou mafaufau i la tatou matafaioi o ni tagata o le Ekalesia a le Atua i le faapotopotoina o Isaraelu, sa ou mafaufau ai, e pei o Abby, o i tatou o tagata e tali muamua atu. O tagata taitoatasi tatou te fetaiai e i ai luitau tulaga ese, ma e manaomia e i latou taitoatasi se tali eseese. O le tausia o o tatou uso ma tuafafine e le tupu i se siosiomaga e mafai ona iloa, ma puleaina. O loo tatou galulue ma tagata moni ma tulaga moni o le olaga, ma e mafai ona vevesi.

E pei o se tagata e tali atu muamua, e tatau ona tatou iloiloina manaoga ona tali atu lea i le mea sili tatou te iloa i le malamalama ua tatou maua. Pe a le masani ai se tulaga ma tatou te le o mautinoa po o le a le mea e fai, e mafai foi ona tatou valaau atu mo ni faatonuga faaopoopo e ala i le tatalo ina ia maua le taitaiga e ala i le Agaga ia iloa ai le ala e tatau ona tatou faia ai. E mafai foi ona tatou fesili atu i o tatou taitai, e pei o au peresitene o le Aualofa ma korama a toeaina, mo se fesoasoani.

I le Mosaea 18, ua talanoa Alema e uiga i manaoga amiotonu o i latou o e o mai i le lafu a le Atua: fefaasoaai ona tauave o a latou avega, faanoanoa faatasi ma e e faanoanoa, faamafanafana atu ia te i latou o e e manaomia le faamafanafanaga, ma tutulai o ni molimau a le Atua (tagai i fuaiupu 8–9). Pe a ou i ai i se tulaga sili ona faigata i lo’u olaga, i le lagonaina o le tuulafoaiina ma e pei ua tapunia le lagi ia te au, ma ua tu mai se tasi e nofo faatasi ma a’u, tagi faatasi ma a’u, pe faalogo mai ia te a’u, sa ou lagonaina le alofa o le Atua e ala mai i lena tagata ma maua ai se molimau o loo Ia silafia a’u ma lo’u tulaga.

E masani ona tatou manatu o le tutulai ai o se molimau o lona uiga o le faasoaina atu o o tatou talitonuga i isi ma molimau atu i le upumoni, ma o nisi taimi o le mea tonu lava lena e taitaiina i tatou e le Agaga e fai. Ae e le o le mea muamua lenei e manaomia e tagata pe a latou i ai i tulaga faigata. Pe a oo Abby i se tasi ua taofia le fatu, atonu e le o le taimi lelei lea e amata ai se talanoaga e uiga i mausa o meaai maloloina ma faamalositino. O lana galuega e le o le faamasinoina o le auala na iu ai i le mea o i ai i latou pe iloa ai po o ai e tatau ona ia tausia. Afai e manaomia e se tagata le fesoasoani, e na te fesoasoani atu iā i latou.

E pei lava ona le faamaloloina e Abby tagata ma auina atu i latou i lo latou ala, e le mafai foi ona tatou faamaloloina tagata, faaleleia i latou, pe laveaiina i latou. E matua taua tele la tatou matafaioi: o le alofa ma le tausia o o tatou uso ma tuafafine ma taitai atu i latou ia Keriso, le Fomai o Fomai, o lē e mafai ona faia le faamalologa ma le faaolataga.

E faigofie lava ona lagona le leai o se faamoemoe i la tatou auaunaga pe a tatou fetaiai ma i latou o loo i ai avega mamafa, lavelave, pe le masani ai, po o a latou agasala ua matua tetele lava, o vaisu ua matua faapologaina ai, tiga ma faanoanoaga ua matua malolosi lava, po o le faatuatua ua matua vaivai lava ma ua tatou le iloa ai pe faapefea ona fesoasoani ia i latou. O le a tatou le fiafia pe a tatou taumafai e faaleleia pe suia tagata aua e le o se mea ua ia i tatou le mana e faia ai mo isi. E pei ona ta’ua e Elder Dale G. Renlund o le Korama a Aposetolo e Toasefululua “O le galuega a le Faaola o le faamalolo. O la tatou galuega o le alolofa—ia alolofa ma auauna atu i se ala e tosina atu ai isi ia Iesu Keriso.”

Ata o tamaitai talavou na pueina e Judith Ann Beck

O La Tatou Galuega O Le Alolofa i Isi

Pe a talanoa Alema e uiga i le faamafanafana atu ia te i latou o e e manaomia le faamafanafanaga, e leai se faafetu, faaopoopoga, po o se faaupuga e faapea mai, “Faamafanafana atu ia te i latou oe e manaomia le faamafanafanaga pe afai e ia i latou ou talitonuga, laei e pei o oe, ua saoloto mai le agasala, pe ola i se olaga e te faamaonia.” I le avea ai ma tagata e tali atu muamua, e le o la tatou galuega le faamasinoina o isi pe iloilo pe agavaa mo lo tatou alofa ma le tausiga. E matua manino lava a tatou faatonuga:

• “Ia outou fealofani” (Ioane 13:34).

• “Fafaga i a’u mamoe” (Ioane 21:17).

• “Ia taitasi le tagata ma manatu taua i lona uso e pei o ia lava ia te ia” (Mataupu Faavae ma Feagaiga 38:25).

Na faapea mai le Perofeta o Iosefa Samita:

“O le latalata tatou te oo atu ai i lo tatou Tama Faalelagi, o le faateleina foi lena o lo tatou naunau e vaai atu ma le alofa mutimutivale i agaga o le a fano; tatou te lagona tatou te mananao e tauaveina i latou i luga o o tatou tauau, ma lafoai a latou agasala i o tatou tua….

“Afai tou te mananao ia i ai le alofa mutimutivale o le Atua i luga ia te outou, ia outou alofa mutimutivale foi le tasi i le isi.”

Sa faaalia e o’u matua lenei alofa i le tele o auala. Sa toatele lo latou aiga, ma le toatele o fanau a fanau, o nisi o i latou sa filifili e laa ese mai le Ekalesia pe mulimuli i ala e ese mai ona aoaoga. Ae, i lo’u iloa, e lei faitioina lava e o’u matua, faamalosia, pe taumafai e sui fanau a le la fanau i se taumafaiga e “laveai” i latou. Sa latou tuua le faamasinoina ma le faaolataga i le Faaola ae na o le alofa lava ia i latou. O lo la fale o se nofoaga lea sa lagona ai e tagata uma le taliaina ma le saogalemu, e tusa lava po o a o latou talitonuga faalelotu, tulaga faaleitupa, po o manatu faapolokiki po o le lalolagi.

E mafai e fanau a fanau ona ta’u atu ia i la’ua soo se mea ma latou faia e pei ona latou masani ai ao faatasi ma i la’ua e aunoa ma le fefefe e teenaina. Sa faaalu e o’u matua le taimi e faatasi ai ma i latou, faalogologo ia i latou, ma fausia ni sootaga ma i latou.

I aso na muamua atu i le maliu o lo’u tina, sa ou molimauina ai fanau a lana fanau—o le toatele lava ua silia ma le 20 ma le 30 tausaga—o fetagisi a o latou faapotopoto faataamilo i le moega o lo latou tinamatua pele. O lenei tamaitai lauulu paepae laitiiti, faatasi ai ma lo’u tamā, sa auauna atu ia i latou, faatauaina i latou, taliaina i latou, ma alofa ia i latou e aunoa ma ni tuutuuga. O o’u matua o ni Au Paia o Aso e Gata Ai faamaoni o e na malamalama o le alofa i isi, e tusa lava pe ese o latou talitonuga po o filifiliga mai o tatou lava talitonuga, e le faaitiitia ai lo tatou faatuatua pe suia ai o tatou talitonuga. E leai se mea o le a leiloloa mai ia i tatou e ala i le alofa i fanau uma a le Atua.

E le faapea tatou te le amanaiaina le aoaoina atu o le taua o le usiusitai i poloaiga a le Atua. E pei ona aoao mai Peresitene Dallin H. Oaks, Fesoasoani Muamua i le Au Peresitene Sili: “Ina ia faapaleni a tatou tautinoga i le alofa ma le tulafono e tatau ona faaauau pea ona tatou faaalia le alofa e pei lava ona tatou faaauau pea ona faamamaluina ma tausi poloaiga. E tatau ona tatou taumafai e faasaoina sootaga taua ma i le taimi lava e tasi ia aua nei fetuutuunai o tatou tiutetauave ina ia usiusitai ma lagolagoina tulafono o le talalelei.”

I le avea ai ma tagata e tali atu muamua ma soo o Keriso, e mafai ona tatou alolofa e pei ona alofa o Ia ma fatuina ni nofoaga saogalemu mo i latou o siomia i tatou—i a tatou sootaga, o tatou aiga, o tatou pitonuu, ma la tatou ekalesia. O nofoaga nei e mafai ai e tagata ona maua le alofa, taliaina, ma le faaaofia ai, ma e mafai ona latou faamasani ai i le Faaola, o lē ua i ai le mana e faamalolo ai, faamagalo atu, laveai, ma faasa’o mea uma.

Ata na pueina e Carol Christine Porter