O le Galuega a le Atua e Aumaia ai le Faamoemoe ma le Filemu

I o tatou aso ua faaali mai ai e le Alii:

“Outou o e e o atu i le galuega a le Atua, vaai ia outou auauna atu ia te ia ma o outou loto atoa, mafaufau atoa, manatu atoa, ma le malosi atoa. …

“O lea, afai ua ia te outou le manao e auauna atu i le Atua, ua valaaulia outou i le galuega” (Mataupu Faavae ma Feagaiga 4:2–3).

E finagalo le Atua ia tatou auauna atu ia te Ia ma o tatou loto atoa, manatu atoa, mafaufau, ma le malosi atoa ma ia tatou alolofa ia te Ia i lena lava malosi e tasi (tagai i le Mataupu Faavae ma Feagaiga 59:5). O lo tatou alofa i le Atua e mafai ona, faamalosia, ma faaleleia ai o tatou manaoga e auauna atu. A o tatou galueaiina na manaoga, e faamalosia lo tatou gafatia e auauna atu ma alolofa ia te Ia faapea ma o tatou tuaoi. Ona oo mai lea o le mana o le Atua, ma e mafai ona tatou vaaia Lona aao i o tatou olaga.

A o ou auauna atu i le Atua—aua ou te alofa ia te Ia—e mafai ona ou lagonaina Lona alofa ma le faamautinoaga e alofa o Ia i Ana fanau uma ma e finagalo ia tatou toe foi atu i le aiga e toe nonofo faatasi ma Ia. E le finagalo foi o Ia tatou foi atu na o i tatou. E finagalo o Ia ia tatou aumaia o tatou aiga ma isi i le talalelei a o tatou auauna atu ma le alofa mo Ia ma Lana fanau.

E sili atu ona aoga lo tatou auai i le galuega a le Atua pe a tatou maua Lana fesoasoani. A o tatou faia la tatou vaega ma saili musumusuga, e mafai e le Agaga Paia ona taialaina i tatou i le galuega. Ina ua valaauina e le Alii Enoka o se perofeta, sa ia faapea mai: “Faauta ua i ou luga loʼu Agaga, o le mea lea o au upu uma o le a Ou taʼutonuina; ma o le a sosola mauga ai ou luma, ma o le a liliu vaitafe mai i o latou alātafe; ma o le a mau oe ia te aʼu, ma aʼu ia te oe; o lea, savali faatasi ma aʼu” (Mose 6:34).

E oo mai se fesoasoani faaopoopo ia i tatou a o tatou mauaina sauniga o le malumalu ma osia ma tausia feagaiga. Pe a tatou o atu mai le na o le auai i le malumalu i le tapuai i le maota o le Alii, tatou te malamalama ai e faapea o sauniga ma feagaiga e fesootai ai i tatou i le Tama Faalelagi ma Iesu Keriso i se auala mamana ma le vavalalata.

Na aoao mai Peresitene Nelson o lenei sootaga o le feagaiga “e faia ai mea uma e uiga i le olaga ia faigofie atu.” E le faia ai ia faigofiele olaga, ae o le fusia o i tatou lava i le Tama Faalelagi ma Iesu Keriso e mafai ai ona tatou maua lo La’ua malosi, lea e faateleina ai lo tatou gafatia e auai i la La’ua galuega. A o tatou o atu i luma, e mafai ona tatou savavali faatasi ma i La’ua ma lagonaina lo La’ua mana ma faatosinaga i o tatou olaga.

Manatua le Aisea

E le faigofie pea le galuega a le Atua. Pe a i ai ni aso ou te lagona ai le lotovaivai po o le le fiafia, ou te faamanatu ia te au lava ia le “aisea” o le faia o Lana galuega, lea o lona uiga ua ou iloa e faapea o loo soifua le Atua ma o Iesu o le Keriso. Ua molimauina ma faamautu mai pea lava pea e le Agaga Paia lenei mea ia te a’u. E le mafai lava ona ou faafitia lena mea. Ona ou te alofa i le Tama Faalelagi ma Lona Alo, ou te saili ai e faafiafia i La’ua e ala i le auai faatasi ma i La’ua i la La’ua galuega maoae.

Afai e i ai se taimi e te lagona ai le le agavaa pe e le o ia te oe le tomai sa’o mo lenei galuega, e le na’o oe! O le toatele o i tatou e lagonaina lenā lagona mai lea taimi i lea taimi. I na taimi e manaomia ai ona tatou pei o Nifae ma ia “taitaiina e le Agaga, sa ou le mua’i iloa muamua mea e tatau ona [matou] faia” (1 Nifae 4:6). Afai tatou te agai i luma ma le faatuatua ma faia mea tatou te mafaia, o le a taialaina ma fesoasoani mai le Alii ia i tatou ma faateleina a tatou taumafaiga e pei lava ona Ia faia i areto e lima ma ia e lua (tagai i le Mareko 6:41–44). Po o le a lava se mea tatou te aumaia i le Alii, o le a Ia faaaogaina e faalautele ai Lana galuega o le faaolataga ma le faaeaga.

O le isi mafuaaga ua valaaulia ai i tatou e auai i le galuega a le Atua o le faaolataga ma le faaeaga, ona e finagalo o Ia ma Lona Alo, o Iesu Keriso, ia tatou paia, e pei lava ona i ai i La’ua. A o tatou galulue faatasi ma i La’ua, tatou te aoao atili ai e uiga i le auala e mafai ona avea ai i tatou e faapei o i La’ua.

I lenei galuega tatou te valaaulia ai isi ia avea faapei o Iesu Keriso e ala i le iloaina o le olioli o le salamo. Na saunoa Peresitene Nelson o le salamo o se faagasologa “o le faia ma le avea ma se tagata lelei teisi i aso taitasi.” O se avanoa e suia ai, ia tuputupu ae faaleagaga, ma “ia avea atili e faapei o Iesu Keriso!”

E mafai ona tatou fesoasoani i isi ia faia o latou aiga ia lagona ua pei o le lagi ina ia i ai se aso o le a lagona ai o le lagi ua pei o le aiga ma mafai ai ona latou saunia mo le olaga a sau.

E i ai le olioli i lenei galuega! Na aoao mai Peresitene Nelson e faapea “e tusa lava po o le a mea o tutupu—pe le o tutupu foi—i o tatou olaga,” e mafai ona tatou maua le olioli pe a tatou taulai atu i le fuafuaga a le Tama Faalelagi ma lo tatou Faaola, o Iesu Keriso. E na o le ala atu i Lona Alo lava e mafai ai ona faataunuuina le fuafuaga a le Tama Faalelagi. Sa naunau Iesu Keriso e fai le finagalo o Lona Tama ma ositaulagaina mea uma mo i tatou. Afai e leai, semanu tatou te leiloloa e faavavau. Sa ia iloaina ua na o le pau lea o le ala mo i tatou e toe foi atu ai i le aiga e nonofo faatasi ma le Tama Faalelagi ma maua ai le olioli. Na aoao mai e Peresitene Nelson: “O le olioli e sau mai [ia te Ia] ma ona o [Iesu Keriso]. O Ia o le puna o le olioli uma.”

Oka se faamanuiaga ma se avanoa matagofie mo i tatou e fesoasoani ai i lenei galuega taua o le faaolataga ma le faaeaga ma fesoasoani i isi ia toe foi saogalemu atu i le aiga, lea e moomoo ai lo tatou Tama oi le Lagi ma Iesu Keriso ia tatou i ai.