Auauna Atu e pei ona Faia e le Faaola

Sa taitaiina atu se tuafafine o auaunaga i Niu Sila i se auala tulaga ese e fesoasoani ai i se uso i lana uarota. E lei leva ona nofo valavala mai lona toalua. Sa tuai ona ala le tuafafine o auaunaga ma lana pepe ma matauina ai e foliga mai e malosi lenei uso i le initoneti i le tuneva o le po, o lea na ia filifili ai e lafo atu se feau ia te ia. Ina ua uma ona tatalo e uiga i le auala e mafai ona ia fesoasoani atu ai, sa musuia o ia e faaalu sina taimi e moe ai i le ao ma faatulaga lana faailo e ala i le leva o le po e mafuta ai ma lenei uso e ala i le feau atu i lana initoneti aua o le taimi lenei o le aso na lagona ai e le uso le faanoanoa ma le tuuatoatasi ma faapitoa lava le misia o lona toalua.

Faatasi ai ma fegalegaleaiga masani ma valaaulia mai tuafafine o auaunaga uma e lua, i le aluga o taimi na amata ai ona toe foi mai lenei tuafafine i le lotu. E pikiina o ia e ona uso o auaunaga ma o faatasi ma ia i sauniga ma gaoioiga. Ona ia maua lea o le manao e talanoa i lona epikopo e uiga i le faafouina o lana pepa faataga o le malumalu.

I le vaiaso na soo ai talu ona maua lana pepa faataga, sa la auai faatasi ai ma ona uso o auaunaga i le malumalu. E ala mai i lenei taimi o le tausiga musuia, sa le toe lagonaina ai e ia le tuuatoatasi.

O nei tuafafine o auaunaga na avea moni lava ma ni uo faatuatuaina ma ni tagata e tali atu muamua faaleagaga mo lenei tuafafine pele o loo feagai ma se taimi faigata i lona olaga. Sa latou tuuina atu le toomaga faaletino ma le faaleagaga. Ae sa manaomia ai le taimi, onosai, agalelei alofa, ma valaaulia agamalu.

O le sailia o musumusuga a le Alii, na taitai atu ai lenei tuafafine o auaunaga i se auala tulaga ese e mafai ona ia fesoasoani atu ai. Mulimuli ane, o lena auaunaga musuia na toe taitai atu ai lenei tuafafine i le malumalu ma faamanuiaga o se sootaga o le feagaiga ma le Atua.

Peitai, ina ia tumau taumafaiga a nei tuafafine o auaunaga, sa manaomia ai lo latou alofa i le Atua ma le alofa sa latou maua mo lenei tuafafine. E mafai ona tatou tatalo mo lena alofa pe afai tatou te le lagonaina muamua. O le auauna atu i isi ona o se lagona o le tiute o le a le tumau mo se taimi umi, aemaise lava pe afai e tetee i latou ua tofia i tatou i ai i le taimi muamua.

Na saunoa Elder Dale G. Renlund o le Korama a Aposetolo e Toasefululua e tatau ona tatou “alolofa ma auauna atu i se ala e tosina atu ai isi ia Iesu Keriso.” Ina ia faia lena mea, e manaomia ona tatou atiina ae ni sootaga o le faatuatuaina ma i latou ua tofia i tatou i ai. O le a atiina a’e lenā ituaiga o sootaga i le aluga o taimi. E sili atu mea e manaomia nai lo le na o le auina atu o se feau tusitusia i nisi taimi po o le fesootai atu i le fale faafiafia i le lotu.

Afai tatou te mafaufau i le auala na auauna atu ai le Faaola ma tatalo ia iloa le auala e auauna atu ai i o tatou uso ma tuafafine e pei ona tatou mafaufauina o le a Ia faia, o le a tatou iloa le mea e fai. Ua ia i tatou le avanoa e fai ma sui o le Faaola i a tatou taumafaiga auauna atu. Mafaufau i se tagata i lou olaga ua e i ai nei pe sa i ai i le taimi ua tuanai, pe moomoo e i ai, o lē e te lagonaina le alofagia ma le faatauaina ma uunaia oe ia avea ma se tagata sili atu ona lelei e ala i le faatasi ai ma ia, o lē e uunaia oe e te manao e mulimuli i le Faaola.

O le mea lena e faatatau i ai le auaunaga maualuga atu ma le paia. E le faigata; e faigofie, ae e manaomia se manao ia avea ma se tagata faapena mo isi, o le ituaiga tagata lea na avea ai le Faaola mo i latou o e na fesootai ma Ia. O le auauna atu e pei lava o se faaaperenitisi ma le Faaola aua o loo tatou faataitaia le avea faapei o Ia ma aoao e alolofa ma tausia isi i le ala o le a Ia faia ai.

Talu ai e tulaga ese tagata taitoatasi, o le a tofu i latou ma se mea e manaomia e ese mai ai, e pei lava ona sa manaomia e le tuafafine mai Niu Sila. A o tatou tatalo mo, faaalu se taimi e faatasi ai, ma faalogologo ma le faamaoni i isi, o le a tatou iloaina o latou manaoga taitoatasi ma mafai ona maua musumusuga e iloa ai pe faapefea ma po o afea e auauna atu ai ia i latou, faaletino ma faaleagaga.

A o tatou atiina ae sootaga o le faatuatuaina, o le a mafai ona tatou fesoasoani e faamalosia le faatuatua o isi i le Faaola e ala i la tatou auaunaga ma e ala i savali taitasi tatou te lagonaina le musuia e faasoa atu. Ua faamanuiaina a’u i le aluga o tausaga i tuafafine o auaunaga musuia o e na avea ma nisi o a’u uo mamae. O na sootaga o le faatuatuaina na faamalosia ai a’u i le tele o auala ma fesoasoani ia te a’u e lagona ai le alofa ma le tausiga a le Faaola mo a’u.

E taua tele le lagonaina foi e i latou tatou te auauna atu i ai o le alofa ma le tausiga a le Faaola mo i latou. O le auala lenei tatou te aumaia ai le toomaga a le Faaola i isi ma, i le faagasologa, maua ai lo tatou lava toomaga ia te Ia.

Avea Ai Faapei o le Faaola

O le faataitaiga a le Faaola o se auaunaga ma le alofa faaletagata taitoatasi lava ia. A o tatou faataitai le auauna atu e pei ona faia e le Faaola, o le a liua i tatou ia avea atili e faapei o Ia. O le auauna atu o le a avea ma tagata ua tatou i ai, ae le na o mea tatou te faia. A o faagasolo taimi, o le a avea le auauna atu ma se vaega o i tatou, ma o le a tatou o atu e fai mea lelei, e pei ona sa faia e le Faaola, pe o i ai pe leai foi se tofiga.

Na valaaulia i tatou e Peresitene Jeffrey R. Holland, o le Sui Peresitene o le Korama a Aposetolo e Toasefululua, ina ia “faalolotoina atili le tuuto atu i le tausiga faamaoni mo le tasi ma le isi, ua na o le alofa le pona lava o Keriso o loo uunaia i latou e faia faapena. E ui i mea tatou te lagonaina uma o o tatou tapulaa ma ni le atoatoa—ma e tofu uma i tatou ma luitau—ae ui i lea, tau ina ia tatou galulue faatasi ma le Alii o le tovine, ma tuu atu i le Atua ma le Tama o i tatou uma se lima fesoasoani i Lana galuega taua o le taliina o tatalo, tuuina atu o le faamafanafanaga, soloia o loimata, ma le faamalosia o tulivae vaivai. Afai o le a tatou faia lena mea, o le a avea atili i tatou ma soo moni o Keriso e pei ona tatau ona avea ai i tatou. … Tau ina ia tatou alolofa i le tasi ma le isi e pei ona Ia alofa mai ia i tatou.”

O se galuega paia le faipaaga ma Iesu Keriso i le faamanuiaina o olaga o fanau a lo tatou Tama Faalelagi. Afai tatou te taulimaina lenei mea ma se agaga o le alofa ma le faafetai mo le avanoa e faamanuia ai olaga o isi, o le a matua faamanuiaina o tatou lava olaga i le faagasologa.