“Sa Puipuia A’u,” Liahona, Iuni 2025.
O Leo o le Au Paia o Aso e Gata Ai
Sa Puipuia A’u
Sa ou taumafai e aua le amanaiaina le uunaiga, ae e lei umi ae ou aoaoina se lesona taua e uiga i le mulimuli i le Agaga Paia.
Ata na saunia e Agnieszka Więckowska
I se tasi afiafi a o ou tietie atu i le patī o le aso fanau o se uo, sa ou afe ai I se auala tuufua, pogisa e lua ituala. Na faafuasei lava ona ou maua se lagona leaga. Na oo mai le manatu ia te a’u e tatau ona ou toe liliu. Sa ou manatu ua na o lo’u popole lava.
Ae peitai, na toe faalua ona toe oo mai le uunaiga. “Tama Faalelagi e,” sa ou fai atu leotele ai, “e leai se nofoaga e toe liliu ai. Afai e manaomia ona ou faia, faamolemole faaali mai ia te a’u le mea e toe liliu ai.”
Sa vave ona ou vaaia se auala taavale ou te lei matauina muamua lava i le tele o taimi na ou alu ai i lenei auala. Sa vave ona ou toe liliu ai ma toe foi i le fale.
Sa le fiafia a’u uo ina ua ou fai atu ia i latou o le a ou le alu atu i le patī. I le manatu ai ua ou toe liliu atu ona ou te le manao e tuua na o a’u, sa latou fautuaina ai ma te o atu ma lo’u toalua i se malaga e toe foi atu ai. Sa ioe i ai lo’u toalua. Sa ia tuuina a’u i le patī ma alu atu i le fale.
Mulimuli ane, na valaau mai ai lo’u toalua ia te a’u. Sa popole mai lona leo. Fai mai o ia, a o alu atu o ia i le fale, sa taofi o ia e leoleo e fesili atu pe na ia vaaia se mea masalomia. Sa latou fai mai sa faamalosia se loli mai le auala e ni tagata o se kegi o e na sasaina ma faoa mea a le avetaavale. Na masalosalo leoleo na tuliloaina e le kegi le loli ona sa leai ni isi taavale na latalata ane i lena taimi.
Sa ou te’i! I se taimi na muamua atu, sa na o a’u lava le taavale i lena lava auala. Sa ou iloaina ai o la’u uunaiga na sau mai le Agaga Paia ma sa puipuia a’u e mana o le lagi. A o o’u mafaufau loloto i le mea na tupu, na oo mai i lo’u mafaufau isi mea na tutupu i lo’u olaga. Sa ou iloaina ai o mea sa ou manatu sa na o ni mea na tutupu faafuasei, o uunaiga moni lava mai le Agaga Paia.
Na aoao mai Peresitene Russell M. Nelson, “I aso a sau, o le a lē mafai ona tatou ola faaleagaga e aunoa ma le taiala, taitaiga, faamafanafanaga, ma le faatosinaga faifai pea a le Agaga Paia.”
O lena aso, o le i ai o le uunaiga a le Agaga Paia sa le na ona faasaoina ai a’u faaleagaga; na puipuia ai foi a’u faaletino. Ou te iloa o loo silafia i tatou e le Atua ma afai tatou te faalogo ia te Ia, o le a Ia taialaina o tatou laasaga.