Faiga Faaleagaga ma Faaletagata Lava Ia mo le Soifua Maloloina o le Mafaufau

A o tatou feagai ma luitau o le soifua maloloina faalemafaufau, atonu tatou te pauu atu i mamanu o mafaufauga lamatia, e pei o le fefe, faanoanoa, po o le faitioina o le tagata lava ia. Ae e finagalo le Alii e fesoasoani ia i tatou ia maua ni manatu o le faatuatua, faamoemoe, ma le agaalofa mo i tatou lava.

“Ia nofouta i lou lava leo i totonu,” o le tala lea a Nicole De Klerk, o se fomai o le Tautua mo Aiga i Aferika i Saute. “O le toatele o i tatou o o tatou lava faitioga sili ona leaga. Ia e tautala atu ia te oe lava e pei ona fetalai mai ai le Faaola, o lē e alofa tele ia te oe.” Nai lo le faamasinoina po o le tuuaia o i tatou lava mo o tatou luitau faalemafaufau, e mafai ona tatou taumafai e faaalia le agaalofa, alofa mutimutivale, ma le agalelei ia i tatou lava. E mafai ona tatou faaaogaina lo tatou faitalia e filifili ai manatu ia e agalelei, e moni, faamalosiauina, ma loto fesoasoani.

E mafai foi ona tatou saili e atiina ae isi mamanu o mafaufauga lelei, e pei o le faatuina o faamoemoega moni, taulai atu i le lotofaafetai, ma mafaufau loloto i le soifuaga ma le alofa o Iesu Keriso. Sa fetalai mai le Faaola, “Vaai mai ia te a’u i mafaufauga uma” (Mataupu Faavae ma Feagaiga 6:36).

Faataitai le mea lenei: O le kosi o le maufetuunai faalelagona a le Ekalesia ua fautuaina mai ai le iloaina o mamanu o mafaufauga e le sao ma saili e suia i “mafaufauga e sili atu ona sa’o, ma faamaoni.”

E mafai foi ona tatou faamalosia lo tatou soifua maloloina faalemafaufau e ala i le sailia o faiga faigofie lea e fesootai atu ai tatou i le Atua. “O le tatalo o se tasi lea o meafaigaluega sili mo lo tatou soifua manuia faalemafaufau ma le faaleagaga,” o le faaopoopo mai lea a Katarina Alhovuori, o se fomai o le Tautua mo Aiga i Finelani. “E mafai ona fesoasoani le tatalo ia i tatou e faailoa atu o tatou lagona ma iloilo faatasi ma le Atua.”

O isi faiga faaleagaga e mafai ona lagolagoina ai le soifua maloloina faalemafaufau e aofia ai le auai i le lotu ma tapuaiga i le maota o le Alii.

O luitau o le soifua maloloina faalemafaufau e mafai ona faigata ai ona maua le malosi po o le uunaiga e auai i nei gaoioiga faagaeetia, ae e oo lava i a tatou taumafaiga “laiti ma faigofie” e mafai ona faasolosolo malie ona aumaia “mea sili” (Alema 37:6). Fai mai Susana Neiva, o se fomai o le Au Paia o Aso e Gata Ai i Potukale, “Ou te fautuaina atu ni faiga faaleagaga lea e ono lagonaina le sili atu ona maua i taimi o tauiviga faalelagona, e pei o le faalogologo i musika faagaeetia, faalogologo po o le faitauina o mau faamafanafana po o tusitusiga musuia, po o le auai i faatinoga o auaunaga.”

E ui atonu e le mou ese atu o tatou luitau, ae e mafai ona tatou feagai ma na luitau ma le malosi sili atu ma le faamoemoe a o tatou latalata atili atu i le Atua.

Faataitai le mea lenei: Fuafua se gaoioiga fiafia e mafai ona e faia i lenei vaiaso. E toatele tagata e maua le malosi i gaoioiga lelei, e pei o le faaaluina o taimi i fafo, feoeoea’i ma ē pele, auai i mea e fiafia i ai, sailiili i talafaasolopito o aiga, taumafa i meaai maloloina, ma faamalositino.

Mai le tele o faiga patino lea e mafai ona fesoasoani ia i tatou, o se tasi o faiga e sili ona taua atonu o le mauaina lea o se malologa talafeagai mo o tatou tino ma mafaufau. Na aoao mai Peresitene Jeffrey R. Holland, Sui Peresitene o le Korama a Aposetolo e Toasefululua, “O le lelavā o le fili taatele lea o i tatou uma—o lea la, ia faifailemu, faamalolo le mafaufau, toe faafou ma toe saili malosi.”

O le a se mea e saofaga i le lelavā i lou olaga? E tusa lava pe ua e vaivai i galuega, faafitauli i le aotauina, atuatuvale i mea tautupe, anotusi i le Initoneti, po o isi mea, e ono fesoasoani le faia o se malologa. E pei ona fautuaina e le Alii, “Aua le momo’e televave pe galue sili atu nai lo le malosi ua ia te oe” (Mataupu Faavae ma Feagaiga 10:4).

Na saunoa Carolina Perego, o se fomai o le Tautua mo Aiga i Chile, “Afai e i ai so tatou tiga, faanoanoa, vaivai, po o le lelavā, e tatau ona tatou mafaufau e malolo.”

O le aso Sapati e maua ai se avanoa faapitoa i vaiaso taitasi e malolo ai ma faafou ai o tatou agaga. Ua aoao mai le Alii, “Aua e moni o se aso lenei ua tofia mo oe e te malolo ai mai au galuega, ma avatu ai au tapuaiga i le Silisili Ese” (Mataupu Faavae ma Feagaiga 59:10). O le Sapati o se aso e tapuai ai, e faafou ai feagaiga, o le “siitia lea o la tatou vaaiga mamao mai mea o le lalolagi i faamanuiaga o le faavavau.”

Afai e i ai sou valaauga e i ai le tele o le taimi e manaomia i Aso Sa, atonu e te le lagonaina o le Sapati o se aso o le malologa faaletino po o le mafaufau. Atonu e te manao e faaavanoa sina taimi i isi aso e malolo ai. Ma ia manatua a o e pisi i lou valaauga, e fiafia le Alii i au taumafaiga e auauna atu ia te Ia ma Lana fanau. Manatua le folafolaga a le Alii ia i latou o e ua vaivai, “Ia outou o mai ia te a’u, o outou uma o e tigaina ma mafatia i avega, o a’u foi e malolo ai outou” (Mataio 11:28). Na aoao mai Peresitene Russell M. Nelson e faapea, o lo tatou sootaga ma le Alii e ala i feagaiga e fesoasoani ia i tatou e “manumalo i mala faataumaoi faaleagaga ma faalelagona o le lalolagi.”

Faataitai le mea lenei: E faapefea ona e faaleleia lau taimi faatulagaina o le moe? Na folafola mai e le Alii faamanuiaga mo le lava o le moe: “Tuu le moe umi nai lo le mea e tatau ai; vave momoe ina ia outou le vaivai; alapo a’e, ina ia olaola o outou tino ma o outou mafaufau” (Mataupu Faavae ma Feagaiga 88:124).

Faatuatua ia Iesu Keriso

O lo tatou faatuatua i le Faaola e mafai ona avea ma a tatou punaoa sili pe a tatou feagai ma luitau o le soifua maloloina faalemafaufau. E ui atonu e le vave ona foia o tatou tauiviga, ae e mafai e Iesu Keriso ona tuuina mai ia i tatou le malosi ma le faamalologa a o tatou faatino le faatuatua ia te Ia.

Na aoao mai Elder Gerrit W. Gong o le Korama a Aposetolo e Toasefululua e faapea o le Faaola “ua malamalama lelei foi i o tatou tiga uma, o mafatiaga, ma’i, faanoanoaga, ma le tuueseeseina. … Ua fesoasoani o Ia e faamalolo ē loto nutimomoia ma tauemua, faalelei ē ita ma ua fevaevaea’i, faamafanafana e tuulafoaiina ma faaāunuua, faamalosiau i ē e lē mautinoa ma lē atoatoa, ma aumaia vavega e na o le Atua e mafai ai”

Ua faamautinoa mai foi e Iesu Keriso ia i tatou e le tuua lava na o i tatou. Na te silafia atoatoa i tatou, malamalama i o tatou tiga uma, ma tu saunia e sii ae i tatou i luga.

Fai mai Sister Alhovuori: “E masani ona ou mafaufau ia Peteru, o lē na lototele e savali i luga o le vai agai ia Iesu [tagai i le Mataio 14:28–31]. … Ou te molimau atu e finagalo [Iesu Keriso] e faamalosiau mai ia i tatou ma uu o tatou lima i taimi uma, e pei lava ona sa Ia faia ia Peteru. E fiafia foi o Ia i laasaga uma o le faatuatua tatou te uia.”

O luitau o le soifua maloloina faalemafaufau e moni ma faigata, ae e le tatau ona faauigaina pe faatoilaloina i tatou. Ma e tatou te le faafesagai ma ia mea na o i tatou. Ua saunia e le Alii mo i tatou punavai o le malosi e faaaoga ai, e pei o punaoa mai le Ekalesia, sootaga lagolago, ma fesoasoaniga faapolofesa. A o tatou faalagolago ia Iesu Keriso ma nei punaoa, e mafai ona tatou feagai ma o tatou luitau ma le malosi ma le faamoemoe.