Na Manaomia A’u e le Atua i Auseteria

Ata na saunia Agnieszka Więckowska

Ina ua ou toe foi mai mai la’u misiona i Sepania, sa ou lagonaina le saunia mo le isi laasaga e sosoo ai o lo’u olaga. Sa ou manao e iloa le Ekalesia i se auala e sili atu ona telē, i tala atu o tuaoi o lo’u aiga i Viena, i Auseteria, o tagata o le ekaleseia e tuuto ae toalaiti lava.

Sa ou lagonaina e tatau ona ou i ai faatasi ma tagata talavou e tutusa o matou mafaufau i le Iunivesite o Polika Iaga i Provo, Iuta, ISA, ma sa ou faamoemoe e feiloai i se tamaitai talavou iina e mafai ona ou faaipoipo i ai ma e mafai ona ou amataina se aiga. Sa pasi la’u suega o le gagana Peretania ma sa lei umi ae taliaina a’u. Na ofo mai o’u matua e fesoasoani e totogi a’u tupe faaalu.

Ae peitai, sa ou popole i se tasi o manatu faigatā. Ou te lei talanoa i le Alii. “Aisea e manaomia ai ona ou fesili atu?” Sa ou manatunatu ai. Pe sa ou le “auai ea i se faamoemoega lelei,” e le manaomia ona taitaiina i mea uma? (tagai i le Mataupu Faavae ma Feagaiga 58:26–27). E ono teena faapefea e le lagi?

Ae sa faaauau pea ona uunaia a’u e le Agaga Paia, “E tatau ona e tatalo ae e te lei filifili.” I le faamoemoe atoatoa ai e faamaonia e le Alii, sa ou mafaufau ai, “Ua lelei.”

Na vave ma malosi se tali mai—o se tasi o tali sili ona manino ua ou mauaina. Sa ou faalogoina i lo’u loto, “Ou te manaomia oe iinei i Auseteria e fausia le malo.”

Sa ou tuu ese le faatulagaga o vasega a le IPI ma faaleaogaina a’u fuafuaga. Sa ou mafaufau i lo’u aiga, le auala na fesoasoani ai le Alii ia i matou e malaga atu i Auseteria mai Iurukuei a o ou laitiiti. Sa ou iloaina ai e faapea atonu sa manaomia lava au e le Alii iinei. Faatasi ai ma se agaga fou, sa ou taulai atu ai i le fausiaina o le malo i Auseteria, lea ua iloga le matagofie, mauoa i le talafaasolopito, ma o le aiga lea o le tele o matai maoae o le musika, e pei o Beethoven ma Mozart.

E na o ni nai vaiaso mulimuli ane, sa ou feiloai ai i se tamaitai talavou, e pei foi o a’u, na malaga mai Amerika i Saute ma lona aiga. Sa vave ona avea i ma’ua o se uo mamae E le o ia o se tagata o le Au Paia o Aso e Gata Ai ae sa ia suesueina ma le toto’a lo’u tuuto i le Faaola ma Lana Ekalesia ma iu ai ina maua lana lava molimau. E lua tausaga mulimuli ane, na ma faaipoipo ai.

Talu mai lo ma faamauina i le malumalu, ua ma tausia ma Katerin ni atalii se toatolu ma se afafine, o e ua tumau ma tuuto. Matou te taumafai ia faasusulu atu lo matou malamalama (tagai i le Mataio 5:16) e ala i le faauo atu i tagata uma ma tatala atu o matou talitonuga i lo matou aiga i Auseteria. Ou te faafetai mo le meaalofa o faaaliga patino e fesoasoani e taialaina ai o tatou olaga a o tatou auauna atu i le Alii.