O Le Olioli na Aumaia e le Tala Fou

Iosefa Viliamu Billy Johnson: E Paia i le Alii, saunia e Emmalee Rose Glauser Powell

I se tasi afiafi ia Iuni 1978, na toe foi atu ai Billy Johnson i lona aiga i Cape Coast, Kana. Sa anapopogi o ia ma isi tagata o lana faapotopotoga, e pei ona latou masani ai, ae e leai se mea aoga na faia e le anapogi e siitia ai lona agaga. Sa lelavā ma lotovaivai o ia ona ua toatele atu tagata talitonu ua le toe tapuai faatasi ma ia ma toe foi atu i a latou lotu tuai.

Sa moomoo Billy e toe lagona le malosi faaleagaga ma faalelagona. I ni nai masina na muamua atu, na ta’u atu ai e se tasi o lana aulotu iā te ia se faaaliga na ia maua. “E le o toe mamao ona o mai lea o faifeautalai,” o lana tala lea. “Ua ou vaai i alii papae o o mai i la tatou lotu. Sa latou opoina i tatou ma auai faatasi ma i tatou i le tapuaiga.” Na faasilasila mai e se isi tamaitai na ia mauaina se faaaliga faapena. Sa moemiti Billy lava ia i ni alii papae o ulufale atu i lona falesa ma fai mai, “O i matou o ou uso, ma ua matou o mai e papatiso oe.” Mulimuli ane, sa moemiti o ia i tagata uli o o mai mai mea mamao ma lautele e auai i le Ekalesia.

Ae peitai, sa lē mafai e Billy ona aveesea lona lotovaivai.

Ua faasolo atu ina umi le aso, tuai, ae sa le mafai ona moe. Sa oo mai se uunaiga malosi ia te ia e faalogologo i le British Broadcasting Corporation (BBC) i luga o le leitio—o se mea na te lei faia mo le tele o tausaga.

Sa ia mauaina le leitio, o se ituaiga e enaena e i ai ni faamau siliva se fa e latalata i le pito i lalo. Na faasolo ina ola le leitio a o ia kiina. Sa ia faaaogaina faamau, ma sa faasee atu le faasino lanumumu i le isi itu o le faailo o le leitio. Ae sa le mafai ona ia maua le faasalalauga.

Ina ua mavae se itula o sailiili, na iu lava ina maua e Billy se talafou faasalalau mai le BBC. Na faasilasila mai e le failipoti ua maua e le Peresitene o Le Ekalesia a Iesu Keriso o le Au Paia o Aso e Gata Ai se faaaliga. O alii agavaa uma i le Ekalesia, e tusa lava po o le a le ituaiga, ua mafai nei ona umia le perisitua.

Na soloviifo Billy, ma tagi o loimata o le olioli. O le a iu lava ina oo mai le pule o le perisitua i Kana, ma aumaia faamanuiaga uma o le talalelei i ona tagata.

Na taunuu faifeautalai i Cape Coast i se taimi mulimuli ane o lena tausaga, ma papatisoina Billy Johnson ma le faitau selau o isi tagata talitonu. Talu mai lena taimi, ua vave ona salalau atu le Ekalesia i Kana ma atunuu tuaoi i Aferika i Sisifo. Na fofogaina mai le Malumalu o Cape Coast Ghana ia Oketopa 2023; o le malumalu lona tolu lea i le atunuu.