Faatuatua ia te Ia, Faatuatua ia Maua

O se tasi o sini o le Taulaiga a le Eria mo le 2025 o le faapotopotoina lea o tagata taitoatasi ma aiga i le malumalu. O faailoga autu e aofia ai le autalavou o loo i ai se pepa faataga o le malumalu o loo aoga i le taimi nei, tagata matutua o loo mauaina o latou faaeega paia, ulugalii ma aiga ua faamauina, ma tagata matutua o loo i ai se pepa faataga o le malumalu o loo aoga i le taimi nei. 

I le 2024, e 18,746 talavou na i ai pepa faataga o le malumalu—e 2,000 e sili atu ai nai lo le 2023—e faaalia ai lo latou faalagolago ia Iesu Keriso. O le tausaga lava lena, e 4,484 tagata o le ekalesia na mauaina o latou faaeega paia, ma e silia ma le 600 tagata na faamauina i se toalua. O fesili o le pepa faataga o le malumalu e amata i le: “E i ai sou faatuatua ma sau molimau i le Atua, le Tama Faavavau; o Lona Alo, o Iesu Keriso, ma le Agaga Paia? E i ai sau molimau i le Togiola a Iesu Keriso ma Lana matafaioi i le avea ai ma ou Faaola ma Togiola? E amata mea uma i le faatuatua. 

O le toatele o le autalavou o loo nonofo latalata i malumalu e fiafia e auai i papatisoga mo o latou tuaa i vaiaso taitasi. E fesoasoani lenei mea ia i latou e lagona ai le fesootai atu i ē pele ia i latou ma “mafaufau ai faaselesitila.” I totonu o le isi lua i le fa tausaga, o le a toatele atu le autalavou i le Pasefika o le a nonofo latalata i malumalu o loo fausiaina i le taimi nei i Port Vila, Vanuatu; Pago Pago, Amerika Samoa; Neiafu, Toga; Tarawa, Kiripati; ma Port Moresby, Papua Niu Kini. 

Ia Ianuari, sa ou faamauina ai Kara ma Mafi i le Malumalu o Hamilitone, lea sa la osia ai feagaiga i le tasi ma le isi ma le Atua. Sa molimauina le faamauga e le tina o Mafi, matua o Kara (o e o loo auauna atu o ni taitai misiona i Perth), ma isi sa auauna faatasi ma i latou i le misiona. O le faamauga o se ulugalii po o se aiga o le sauniga lona lima lea o le faaolataga ma le faaeaga. O le faatuatua ia Iesu Keriso na fesoasoani ia Kara ma Mafi e maua ai sauniga ma osia ai feagaiga i le Maota o le Alii. 

Pe a ulu atu tagata taitoatasi i le feagaiga o le faaipoipoga i le malumalu, latou te osia feagaiga ma le Atua ma o latou toalua. E folafola atu e taitoalua le faamaoni o le tasi i le isi ma le Atua ma ua folafola mai i ai le faaeaga ma sootaga faaleaiga e faavavau (tagai i le MF&F 132:19–20). O fanau e fananau mai i matua ua faamauina, po o e mulimuli ane faamauina ia i latou, ua i ai le aia tatau e avea ai ma se vaega o se aiga e faavavau. 

Sa faapena foi i le aiga o Haraga, o e na o mai foi i le Malumalu o Hamilitone ia Aperila 2024. Na maua e matua o la’ua faaeega paia ma faamauina ai le tasi i le isi ma le la tama teine, o Barbara. Sa faamauina foi Uso Haraga i ona matua ua maliliu. 

O Uso Haraga o le tagata muamua lea i lona aiga na taliaina le talalelei toefuataiina ina ua papatisoina o ia i le 2011. Sa faatasi atu lona toalua ma lana fanau teine ia te ia i le 2015. 

O le manao sili o le Aiga o Haraga o le auai faatasi lea i le malumalu ina ia avea ma se aiga e faavavau. Na taunuu la latou miti ia Aperila 2024 ina ua latou ulufale atu i le Malumalu o Hamilitone ia maua faaeega paia ma faamauina. O le faatuatua ia Iesu Keriso na taitai atu ai i latou e maua sauniga ma osia feagaiga i le Maota o le Alii. 

Aisea e taua ai le faaipoipoga faalemalumalu? 

Na aoao mai Peresitene Russell M. Nelson, “O le faaolataga o se mataupu a le tagata lava ia, ma o le faaeaga o se mataupu faaleaiga.” O sauniga o le malumalu, e aofia ai faamauga, e fatuina ai sootaga e faavavau i le va o le tane ma le ava lea e mafai ona tumau i tua atu o le oti pe afai la te faamaoni. E mafai foi ona faaauau pea sootaga a matua ma fanau i tua atu o le olaga faaletino, e fesootai ai augatupulaga i sootaga faaleaiga e faavavau. 

“Ma o ia o lē na te talia nei mea ua ia taliaina aʼu; ma o le a faapotopotoina i latou ia te aʼu i le olaga nei ma i le faavavau.”(MF&F 39:22). 

Na toe aoao mai Peresitene Nelson: “[E ala i feagaiga], tatou te . . . fatu se sootaga ma le Atua lea e mafai ai e Ia ona faamanuia ma suia i tatou. Afai tatou te faamuamua le Atua i o tatou olaga, o lena feagaiga o le a taitai atu ai i tatou ia latalata atili atu ia te Ia. . . . O tagata tausi feagaiga o e alolofa i le Atua ma faatagaina o Ia e manumalo i isi mea uma ua avea o Ia ma faatosinaga sili ona mamana i o latou olaga.”

Na faamatala mai e Elder Jeffrey R. Holland “o se feagaiga o se maliega e fusia ai faaleagaga, o se tautoga faamaoni i le Atua lo tatou Tama o le a tatou ola ma mafaufau ma galulue i se ala faapitoa—o le ala a Lona Alo, le Alii o Iesu Keriso. O le taui, o le Tama, le Alo, ma le Agaga Paia ua folafola ia i tatou le matagofie atoatoa o le ola e faavavau.”

E pei lava o isi sauniga, e manaomia le faamaoni o le tagata lava ia mo se sauniga faalelalolagi e faamauina, pe faamaonia, i le lagi e le Agaga Paia o Folafolaga. 

“Ma o lenei, ona o le feagaiga ua outou faia, o le a taʼua ai outou o le fanau a Keriso, o ona atalii, ma ona afafine; ona faauta, o le asō ua fanauina ai e ia outou faaleagaga; ona ua outou fai mai ua liua o outou loto e ala i le faatuatua i lona suafa; o lea, ua fanauina ai outou e ia ma ua avea ai outou ma ona atalii ma ona afafine” (Mosaea 5:7). 

Valaaulia e Faatino

Ou te valaaulia: 

• Talavou e leai se pepa faataga o le malumalu. 

• Tagata matutua e silia i le 18 tausaga ua lē o toe i ai i le a’oga maualuga. 

• O ulugalii ma aiga e le’i faamauina. 

• Tagata matutua e leai se pepa faataga o le malumalu. 

Feiloai ma o outou epikopo ma peresitene o paranesi e amata lenei faagasologa. Maua sauniga, osia feagaiga, ma maua faamanuiaga e faavavau o loo maua i le Maota o le Alii.