Մնացեք կապված Փրկչի հետ

Նկարը՝ Դեյվիդ Մայլսի

Մի ամառ, արձակուրդի ժամանակ, ընտանիքով մեկնեցինք հարավային Չինաստան, որտեղ ամենագնացներ (ATV) վարեցինք արևադարձային անտառում: Երբ հասանք ամենագնացների ճամբարը, զարմացանք, երբ զբոսավարները մեզ տվեցին ամբողջ մարմինը պաշտպանող կոստյումներ, հսկայական սաղավարտներ և ակնոցներ: Սիրողական վարողների համար նման շոգ, խոնավ եղանակին մի քիչ ավելորդ էին թվում կոստյումները, բայց մենք, այնուամենայնիվ, հագանք դրանք:

Վարորդական հրահանգներ ստանալուց հետո մենք ճամփա ընկանք և, ի վերջո, հասանք մեր ճամփորդության գագաթնակետին։ Այնտեղ կանգ առանք՝ ջուր խմելու և մեր դեմքի քրտինքը սրբելու։

Հետո մեր զբոսավարը բացատրեց, որ իջնելն ավելի դժվար է լինելու։ Մենք պետք է իրար մոտ մնայինք և ձևավորեինք ATV գնացք, որտեղ յուրաքանչյուր ATV-ն դիպչում էր առջևի և հետևի մեքենային, որպեսզի կայունացնեինք խումբը:

Իջնելու ընթացքում մենք կանչում էինք իրար, որպեսզի համակարգեինք մեր ընթացքը։ Այնուամենայնիվ, մենք դանդաղորեն բաժանվեցինք, և մի փոքրիկ միջանցք բացվեց իմ և այն մեքենայի միջև, որը վարում էին հայրս ու փոքր քույրս՝ Վիվին։ Հանկարծ Վիվին ու հայրս դուրս նետվեցին իրենց մեքենայից։ Հայրս ժամանակին ցատկեց և իր մարմնով ծածկեց Վիվիին, որպեսզի պաշտպաներ նրան ամենագնացից, որը գլորվում էր նրա կողմ։

Մենք աներևակայելի հանգստություն զգացինք, երբ տեսանք, որ հայրս և Վիվին ոտքի կանգնեցին և թափ տվեցին փոշին իրենց տաբատներից: Շնորհիվ իրենց կրած պաշտպանական հագուստի՝ հայրս քիչ վնասվածքներ էր ստացել։ Վիվին սարսափահար էր, բայց չէր վնասվել։ Երբ մենք վերախմբվեցինք, զբոսավարը հստակ ձայնով հիշեցրեց մեզ, որ մենք պետք է միացված պահենք մեր մեքենաները, եթե չենք ուզում նորից ցած գլորվել բլրից:

Կյանքում մենք երբեմն գայթակղվում ենք մտածելու, որ կարող ենք ինքնուրույն ինչ-որ բան անել: Մենք կարծում ենք, որ կարիք չկա հագնելու ավետարանի պաշտպանական սպառազինությունը, որը կարող է անհարմարավետ թվալ: Նմանապես, երբեմն մենք գուցե դժվարանանք կապված մնալ մեր Երկնային Հոր հետ։ Երբ թերանում ենք դա անել, մենք վտանգի տակ ենք՝ ինքնուրույն նավարկելու աշխարհի սարսափելի և դավաճանական ճանապարհներով, ենթարկվելով ծանր հոգևոր վթարների և վնասվածքների:

Եթե մենք օգտագործենք ավետարանի առաջարկած պաշտպանությունը և կապված մնանք Երկնային Հոր և Հիսուս Քրիստոսի հետ, մենք կարող ենք դիմակայել այն մարտահրավերներին, որոնք սպասվում են մեր կյանքում: Անկախ նրանից, թե որքան սարսափելի կամ դժվար է ճանապարհը, Նրանց հետ մենք հաջողության կհասնենք: