Ana Iteraniba te Aono
2020 Nonori “mai Buki”
I taraa Rongorongon te Ekaretia bwa ‘rongorongoia’ ao ‘aia karaki’ . . . tiaki ngai!
I bungiaki ao ni ikawairake i Aberika irouia au karo ae te Imatang ao tinau ae tei Rhodes/Itari, I namakinna bwa bon akea rekerekeu ma kain te bwaeoniia n taai ake ngkoa n te Ekaretia i Amerika. Ma koauana, I taraa Rongorongon te Ekaretia bwa ‘rongorongoia’ ao ‘aia karaki’ . . . tiaki ngai!
Ngaia are, iangoa mimiiu ngke te rongorongo man te FamilySearch e kaoti iaon au iteraniba iaon te Facebook ni kauringai ae iai au bakatibu ae te bwaeoniia! N te tai ae waekoa I namakina te reitaki nakoia kain te Ekaretia rimoa ao I a kunea bwa Ia rin n te karaki ae boou.
Aran neiei bon Margaret Rebecca Bird; ngke 13 ana ririki e kitana Kanesville, Indiana ma ana kambwana n aenika Wilford Woodruff nakon te Mwanono ae Bubura i Salt Lake. Bwaeoniia akanne a teimatoa inanon te korakai n rianna 120 te bong i nuukan te aba ae Aoraoi ae Bubura nako Utah.
N te tai aei I a namakina riki mwakoron ana taetae ni burabeti Maraki, are nanoia nati e na rairaki nakoia aia karo1—riki au karo n te aba ae raroanako.
Ao kakabwaia e teimatoa n roko. I a kona ngkai ni wareki karakinaia bwaeoniia aika ninikoria irouia aika Itiaki, te kaua ni waorium ni karaki, are bon karakinaia Aika a Itiaki n ana Ekaretia Iesu Kristo ibukiia Aika Itiaki ni boong aika Kaitira. Waorium 1 ao 2 a kaman tia ni boretiaki.
Unimwaane Dale G. Renlund man te Kooram n Abotoro n te Tengaun ma Uoman e taku: “rongorongon te Ekaretia e rang kakaawaki irouia kain te Ekaretia ao iroun te Uea.”2 N Eberi 1830, e taku te Uea: “Nooria, e na iai te rongorongo ae e na kawakinaki iroumi”3 ao Oliver Cowdery e kawakina te rekooti anne inanon teuana te ririki. Imwiina te Uea e wetea John Whitmer bwa e na “reitinako ni kawakin rekooti n te Ekaretia”4 ao e karekea te berita are te tia karaunano e ana anganna bwa e na “korei bwaai aikai”5 ngkai e kakaonimaki. John Whitmer e reiakinna bwa “te rongorongo e na bon rang n raoiroi ibukin te Ekaretia ao riki nakon te roro ae tabe n rikirake.”6
E kamatata te Uea n aron te rekooti are e na riai ni kawakinaki, iaan ana kairiiri te Tamnei ae Raoiroi.
Aia iteraniba aika Itiaki a kaonaki tii n rongorongo aika koaua are e anaaki aia rongorongo aomata n tatabemaniia membwa aika kakaonimaki ake a karikirakea ae ai aron anuan Kristo ngke a kaitara ma te kaitaraaki ngkai a maiuakina te euangkerio n aia kabanea n tamaroa.
Ibukiia membwa ake a rang kan kakae riki iaon bwaai aika a riki rimoa n ae nano riki, iai bubua mwaitin bwaai n ibuobuoki ake a karinanaki i akuun te boki.
Hindsight bon te bwai ni mwakuri ae rang ibuobuoki naba; I kunea arou ni miiu ngke I waekoa n namakina te reitaki ma au koraki ae te bwaeoniia . . . ao tiaki tii nakon Margaret Bird ma ngaiia ni kabane! Inanon te ririki aei, 2020, I a tia ni kunea rinanon te FamilySearch bwa e mwaiti au koraki aika bwaeoniia.
E reirei Unimwaane Renlund: “Te Uea e kabonganai rongorongoia aomata nako n reireiniia arora ni kaan riki nakoIna, n raira n nano ao n riki n ai Arona. Anne oin ara kantaninga ngkai ti roko n te aonaaba, te kantaninga ibukin te euangkerio, ao te kantaninga ibukin Ana Ekaretia Iesu Kristo ibukiia Aika Itiaki ni Boong Aika Kaitira”.7
Ai kakatongara ngai ibukin au utu ao te reitaki are ti a karekea rinanon mwamwanangan te tai ao mwawana. Au kantaninga bwa, n te bong teuana, kanoau a na wareka rongorongou ao n namakinna are I a tia ni korei bwaai aika I rinanona aika kakaawaki bwa e na buokiia n nakon Kristo n ai arou, ni kataia ni mwakuri iaan ana kairiiri te Tamnei ae Raoiroi.