Te Onaroka n Tain te Rokanaki e Kakabwaiaia Utu mai Biti ao Tabeman

Te butinaoraki n te aonaaba ae COVID-19 ao kainakin tabo aika a mwaiti e a tia ni bita aron tein te maiu n aro aika a mwaiti. Katokan bwaai aika kakaawaki, kauarerekean bobotaki n inonoo, ao te kakaokoroaki e a tia n rang ni kangaanga aron karaoana, ma a mwaiti aomata aika a kunei kawai n reiakinaki, rikirake ao n tokanikai.

Sulueti Kama e beku bwa te tia koroboki ibukin te Fiji Suva Mition Beretitenti n Ana Ekaretia Iesu Kristo ibukiia Aika Itiaki ni Boong aika Kaitira ao e karekei bwaai aika a mwaiti—Intitute (kamatebwai n aro) tia reirei, tarekita n te reitaki n te Ekaretia, tia kaunga te Zumba . . . ma tuai man riki bwa te tia ununiki.

Ma n reken ana tai ngkai ae mwawa n tain te kainiin n te COVID-19, e a karikirakei rabakauna iaon te ununiki.

Ni Meei 2020, neiei ma kainnabana a buti mai Suva nako Nadi n nooria raraoia ake a tia ni bua aia mwakuri. Raraona iai aia tabo n ununiki ae bubura are a kaikawai iai oin kanaia. N rokoia n te tabo ni kabwebwe ngaia uoman, Sulueti e noori rinanin taian kabwebwe. E a reke iai. Anaakin nanona n te ununiki e a waaki.

Turee ni kabwebwe, tomato, kabiti, ao bwaingan a iria nakon mweengana. E baireia bwa e na uniki inanon te boora ao ngkai iai 84 ni boora aika a kaonaki n aroka aika kakanaki, n raonaki ma kukambwa, biin, kabiti are e tena, ao banikai ake a kakanaki baia n aron cilantro, dill, oregano, ao beneka.

E a mwaatai iaon te tano ae te kabanea n raoiroi ibukin te ununiki, kakae iaon bwaai n tiriman ao ni karakini karaki nakoia raraona aika taan ununiki. Buuna e katea autin arokana.

“Bon te bwai ae te kabanea n tamaroa ae riki nakoira, ti kunea te bwai ni kakibotu ao te konabwai are ti tuai ni karekea mai imwaina ao tia reke iai,” Sulu e taekinna.

N ana tamnei Sulu are e katokai n te Facebook n angiin te tai bon tamnein arokana n raonaki ma aikai: “Imwiin teuana te aoa n Zumba n te aoa 5 n te karangaina, I aki kan tataninga n okira mweengau n noori arokau ao ni karini n te boora riki tabeua. I rang kukurei n noori arokau banikai—oregano ao dill ni bwebwe irarikin taian kukambwa . . . tibwa kabwebwe koraaia n te Kaonobong.”

“I ingainga n okira mweengau ni katoa bong n noori arokau ao aron maiuraoia e ngae ngke I a tibwa tia ni mwakuri ma ngaiia ni katoa moaningabong.”

Tera ae e a nang karaoia ma aia uanikai ma bukinikai ngkana a tai? E ataia Sulu. “Bon ti ngai ma kainnabau ngkai ao tina karawatai riki nakon are ti kainnanoia, bwa tina kaongoa te bitiobi. Ti tataro bwa ara onaroka e na nakoraoi bwa ti aonga n anganiia aomata ake a kainnanoia.”