Bwaai aika Maiu Man te Iti: Bwanaaia Aika Itiaki ni Boong aika Kaitira
Kairaki iroun te Uea
E ataira te Uea ao bwa tera ae eti ibukira ngkai.
Tamnei iroun Cody Bell
Giselle
Imwaain marera, Andre e mwakuri iaon ana beeba ae te PHD ao e reke a na tabo ni mwakuri n te Kuura ae e Rietaata ae Michigan. Ti mareaki ao ti mwaing nako Michigan. Inanon te tai, e moanna n reke ana kangaanga Andre n te mwakuri ao e tangiria ni bita ana mwakuri.
Ti bon ataei, ti a bon tibwa mareaki, ao ti aki ataa te bwai ae ti na karaoia. Ti iangoia bwa ti na tataroakinna.
André
N te bongina I nakon te kuura ae e rietaata ao I noora te raubaba ake a tei iai taekan mwakuri ake a katekeaki. I korea au reta ibukin teniua te mwakuri. Inanon te wiiki, I a bane n anganaki teniua mwakuri.
Giselle
E warenako ara iango bwa tera ae ti na karaoia. Ti a manga tataroakinna riki. Teuana te nakoa i Engiran, ma ti kan tiku n te United States. Teuana i Texas, ao te mwakuri are teuana e mena Maryland ni kaan ma Washington, D.C. Te mwakuri i Maryland ma te NASA. Te Tia rabakau n te Tiaienti Andre, ngaia e taraa n ae Nasa te tabo ae e tamaroa kawarana.
André
Ni mwaingira nako Maryland, I turaiwa ao e matu Giselle. E tibwa moaningabong ngke I noora Temboran Washington D.C.
“Teirake! Teirake! Ko kona n nooria?” I taku nakon Gibselle. “Kanga aiaron te kaatio!”
Giselle
I tuanga Andre bwa tao ti na kona n nako ni kawaria n te tai teuana. Akea ara iango iai bwa tera. Tabeua te bong imwiin rokora i Maryland, I nakon te tabo n tangoboki bwa N na kabongana te intanete bwa N na karaoa au reta ni bubuti ibukin te mwakuri ao n tuoa au meeri.
Te aine a e mwakuri ikekei e ongo au ee ao e titiraki bwa I nako mai iaa. I tuangnga ae kaain Brazil ngai ao ti a marooro. Aran neiei bon Edna. I tuangnga ti a tibwa mwaing mai Michigan ao I taekina te tabo are ti mena iai.
“I mena n te tabo ni maeka naba anne.” E taku Edna.
Ngke I a manga okira te tabo n tangoboki n te bong are imwiina, e taku Edna,” I rangi ni kukurei ngkai ko a oki. I kan kaoko ma buum nakon au auti ibukin te katairiki.”
I iangoia bwa e kamimi anne ibukina bwa e aki kinaai. Ngkanne e taku,”I tataro ibukim ibukina bwa I namakina te bwai teuana ae e rangi n okoro ngke I kaitibo ma ngkoe ngkoananoa.”
Ti nakon ana auti ao ti ataia bwa e a tia ni motirawa buuna. Imwiin te katairiki, e katangitang, “Lord, I Would Follow Thee” (Anene n Taromauri, nambwa. 220) iaon te biaano. E taku bwa te kuna ae mamatennanon buuna ao e aneneaki n tain ana tau ni mate. Ngkanne e taekinna nakoira taekan te babaire ni kamaiu ao e kaoira bwa ti na nako n taromauri ma ngaia.
Ti nako n taromauri, ao aomata ake a mena ikekei a rangi ni bubutimwaai. Ti baireia bwa ti na nako n te Tabati are imwiina. Ti bonnanoia bwa ti na anganaki te reirei mairouia mitinare. E anga nanona Edna bwa e na karaoakii te angareirei n ana auti. Inanon nimaua namwakaina ti nanako n taromauri ni katoa Tabati. Nanora ma tamneira a tia ni katauraoaki nakon ara bwabetito.
André
A bane ni mata ni kubanako aomata, ngke e katanoataaki taekan ara bwabetito. “Wow, tiaki ngkami kaain te aro?” a taku. “Ma kam mena ikai ni katoa wiiki!” E rang onoti ara bwabetito. A kuri ni bane kaain te uoote n iiri.
Ti kabaeaki n Temboran Washington D.C. teuana te ririki imwiina. Ngke ti a rin n te tembora, ti a ataia bwa ngaia bon te kaatioo are ti nooria teuana te ririki n nako!
Giselle
Imwiiin kabaeara n te tembora, a mwaiti bwaai aika kangaanga.
Imwiin Tebetembwa 11, 2001 e a bon kangaanga iroura manga kaboouan beeban tikura. I nanokawaki ibukina bwa I a tibwa angabeebaman ana kaoreti te komiuniti ao Ibubuti ibukin kabwaninan reken te tikaoratibu n ana kuura ae e Rietata Maryland. E aki reke irou te tikaoratibu, ao te lab are e mwakuri iai André e a kainaki.
Ti iangoia bwa tao ai bon te tai are ti a riai n oki n nako Brazil.
André
E tuangira ara bitiobi bwa ti na kona ni buokiia membwa aika a mwaiti i Brazilao n rikirake ni kawai aika a na aki reke n te United States. E reireiniira bwa ti na tiku ni kaan ma te Ekaretia.
“Nako Brazil ao mwakuri ibukin te Uea,” e taku.
Imwiin maekara i Brazil inanon tabeua te tai, e roko n ara auti te beretitenti n ara titeiki ao e tuangai bwa N na riki bwa te bitiobi. Kanga I ataia ae N na weteaki. Inanon tabeua te tairiki imwaain weteakiu, I aki kona ni matu. I iango ao man kamwatebwai.
Giselle
I miimi bwa tera ae riki. I nooria ni bitaki imwaain weteana.
André
Ngke I a moana weteau, iai n ara uoote 80 membwa aika a kakaonimaki. Ngke I a motirawa, a mwaiti riki ake a roroko n taromauri, ao 12 mitinare a nako ni karoa aia mwakuri ni mitinare man ara uoote. “E tamaroa!
Ni kaan ma te tai are I a kamotirawaaki iai, e kamotirawaaki naba Beretitenti Dieter F. Uchdorf n te nakoa n te Moan Beretitentii. I uringa ae e kangai Beretitenti Russell M. Nelson bwa Beretitenti Uchtdorf iai tibwananga aika a bongana man boou n aia botaki Abotoro ake Tengaun ma Uoman.
Teniua namwakaina imwiina, I a weteaki bwa te moan kauntira n te beretitentii n te mition. I aki te roko n nako ni mitinare, ma I tangira nakoau. I tangiria ni mwakuri ma mitinare. “E kinaai te Uea. E ataia I riai ni kamotirawaaki ngkai te bitiobi bwa I aonga ni kona ni beku n te tai ao te tabo ae riai ibukiu ngkai.