Aine n Taai Akekei ni Kaokan Bwai

Jane E Kimwareirei rinanon te Mwananga

Arora naba ngaira, n aron Jane Manning James, n nanomatoa ni kabanea mwanangara ma te onimaki?

Jane Manning James e a kua n rianna, ma e rawa n tei.

Natina te mwaane ae te ikawai, Sylvester, e a bon ikawai n rianna irarikin te aenika. Ma natina Silas, are e bungiaki inanon te mwananga, e kainnanoa uotakina. Bon 1847, ao ana utu James e na raoniia moan bwaeoniia n roko n te mwanono n Great Salt Lake.

Jane e bon aki boou ni mwamwananga aika abwabwaki.

Aua te ririki mai imwaina, ana utu a tia ni kitana mweengaia mai mainikun te kaawa n raoniia aika Itiaki i Nauvoo, iaon te aontia mai maeao. Te mwananga e na bon ana tabeua te bong irarikin te karaanga. Ma ibukina bwa a mwaiti aomata aika ibwatabwata aika toro n te United States of America n te tai anne, ana utu Jane n tainako a bae ni kaoti beebwa ni kaota inaomataia. Ao n tabeua taabo e matoa tuana bwa a totokoaki aomata aika ibwatabwatani mwananga rinanon te tabo anne—n raonaki ma te bwakamwane ae nakon $500 n temanna.

Tao ibukin te roo ae korakora ke tao ibukin aia kairiribai tabeman, kaimoan bootin te karaanga a rawa ni uootiia Jane ma ana utu nakon ae raroa riki. E aki bwara nanoia, a katikui aia bwai aika a mwaiti ao a waaki nako ni mwananga n rianna ma bwaai ake a kona n uoti.

Ana utu Jane a rianna n te raroa ae raka iaon 800 te maire (1,287 km). A rianna rinanon mwaitoron te ngaina ao rotongitongin te bong. N te tai are a bae iai n te buakonikai, a matu iaan karawa ae tangaina. Ngke a uti, aia kunnikai a mainaina n te buraoki.

“Ti rianna ni karokoa a raeraeaki ara kau, ao waera a moanna n ikoaki ao a raeuaki man rara,” Jane e kauringnga. “… Ti bubutia te Atua te Tama ae Akea Tokina bwa e na kamaoi waera ao e kaekaaki ara tataro.”¹

Ngkai ti nanomatoa inanon te mwanaga ae matoatoa aei, Jane e anenei kuna n taromauri ma ana karo ao tarina ma mwanena, n neboa te Atua. N tokina, imwiin ae kaniia teniua namwakaina n rianna, a roko i Nauvoo. Ririki ake imwiina, ngkana aika a Itiaki a nako n rinuukan te aba ae aoraoi, Jane e mena ibuakoia taian moan bwaeoniia ni waaki n nakonako n te kawai.